| | | ¿Qué ye tonada y qué ye asturianada? | Dientro de la relativa uniformidá de la música europea, en xeneral, y de la española, en particular, la tonada ye’l xéneru más identificativu y singular de la música asturiana. La particular manera d’interpretar de los cantadores de tonada fizo que, a primeros de sieglu, dellos músicos cultos estudiosos del folclore, influenciaos poles idees rexonalistes na política y nacionalistes na música, afayaran nélla los rasgos más calificativos y diferenciadores de la personalidá asturiana.
L’asturianada -la manera más xeneralizada de nomar a les canciones de tonada- ye quiciás l’elementu musical más identificativu d’Asturies. Y, en xeneral, xunto cola llingua asturiana, na que tan escrites la mayor parte de les sos lletres, ye l’elementu más propiu d’Asturies. El términu asturianada esiste porque esiste Asturies. Ye, pues, a partir d’una visión romántica, rexonalista, nacionalista... una parte claramente identificativa d’esti pueblu. Tien un llinguaxe musical propiu, dase nun ámbitu cultural mui concretu y conviértese, a lo llargo d’esti sieglu, nuna seña d’identidá única y clara, propia y diferente.
D’esti modu, a lo llargo del sieglu estendióse’l términu asturianada pa definir esta manera de cantar a l’asturiana, o sea, coles característiques propies de la tonada tradicional. Anque s’utilicen los términos tonada y asturianada indistintamente nun podemos escaecer esti matiz diferenciador. Los términos de tonada y tonada de la tierra (como recueyen Belmunt y Canella), pudieran ser los más estendíos nel sieglu pasáu pa estremar esta manera de cantar. A lo llargo del presente sieglu, ye’l términu asturianada’l que vien a tomar el so relevu. Asinamesmo, el términu qu’identifica dafechu a la persona qu’interpreta tonada o asturianada ye’l de cantador o cantadora. | | | | | | | ¿Cuálos son los sos oríxenes? | Cuando se pretende facer un estudiu hestóricu de la evolución d’esta particular manera de cantar, afáyense dos importantes obstáculos: el desconocimientu de la situación de la canción enantes de los años caberos del sieglu pasáu y la incertidume de los sos oríxenes. Los documentos o referencies anteriores al añu 1885 son escases en xeneral pa tolo tocante a la música asturiana. Nesti añu publícase en Madrid el cancioneru de Rufino G. Nuevo y Miranda Todo por Asturias. Primer capricho pot-pourrístico sobre cantos populares de Asturias, una suite al gustu de la época sobre dieciséis temes populares, quince d’ellos colos sos correspondientes testos y una nomada "Zarabanda asturiana al son de gaita y tambor". El segundu de los temes qu’aparez na suite ye la popular "Soi de Pravia", tonada mui renomada na época, como lo demuestra la so incorporación n’otros cancioneros o dando nome a una de les más conocíes y esitoses obres del dramaturgu Vital Aza.
El tema de los oríxenes, como suel suceder nestos casos, ye complexu. Los pocos estudios fechos hasta’l momentu nun lleguen más allá qu’a suposiciones, en buena midida inverosímiles. La búsqueda de les fuentes de les que bebe la tradición cambia coles modes y gustos del momentu, polo que ye d’entender les fáciles abscripciones a oríxenes celtes, mozárabes, cantos gregorianos, parentescu flamencu...
Lo cierto ye que, la tonada y les variaciones actuales que sobre les sos estructures se faen, tienen una hestoria constatada de dalgo más d’un sieglu y una hestoria oculta anterior difícil d’afayar. Fuera como fuera, esta manera de cantar pasa enforma desapercibida pa los escritores y estudiosos de les dómines anteriores a 1885, y queda por primer vez reflexada na obra recopilatoria del avilesín Nuevo y Miranda. Hasta esti momentu, bien parez que los cantos populares, incorporaos por mediu de la so trescripción pianística al gustu de los salones de la época, nun merecieran l’atención de naide. | | | | | | | ¿Por qué se diz que la tonada ye un xéneru vivu? | | La especialización que naz de la dificultá técnica y el carácter lúdico de la propia tonada, ye lo que permite qu’anguañu sea ésta la única espresión non anacrónica del nuestru folclore. Ye dicir, la tonada ye una manifestación actual de la cultura musical asturiana, con abondos raigaños nel pasáu, pero indiscutiblemente viva nel presente. La danza alredor de la foguera na nueche de San Xuan, cualquiera de los pericotes que se dancen en Llanes o los blincos d’un fandangu como’l "Xiringüelu", son manifestaciones recreaes polos sos intérpretes, al gustu d’una época y naguando por caltener la pureza d’una manifestación, tanto nel cantu, como nel son, como na propia ropa de los danzantes y bailladores. La tonada, pola contra, ye una manifestación d’ayeri, de güei y de xuru que de mañana. Cuerre, como la mayor parte de les manifestaciones populares, dellos peligros. Pero, n’actualidá nun pue dicise que se trate d’un xéneru muertu, nin siquiera en víes de desaparición. | | | | | | | ¿Cuálu ye’l momentu presente y el futuru de la tonada? | La tonada y les sos variantes necesiten d’un nuevu impulsu p’afrontar con garantíes de continuidá’l futuru. Precísase recalcar que tamos delantre de la única, probablemente, manifestación del nuestru folclore actual que nun ye anacrónica y que goza d’un ciertu gradu de profesionalización importante. Del so mestizaxe con otres músiques dio buena cuenta esti sieglu y particularmente la última metada. Queda la batalla de la orixinalidá: de la innovación y la creación.
Anque, como nos recuerda Bruno Nettl, na música folclórica la orixinalidá pue nun ser importante y cabe que se discrimine contra l’innovador: una nueva canción namás pue sobrevivir si resulta aceptable pa los demás, ya que pa qu’una música seya vidable nuna cultura determinada tien de ser comprensible y aceptada por una gran metada de la población.
El tema de l’autenticidá tamién ta y tuvo presente. Fueron importantes nel so momentu les crítiques a El Presi y a La Pastorina, como posteriormente a Nuberu o a Xaréu, por parte d’un sector purista qu’enxamás entendió que son perfectamente compatibles la pureza y el mestizaxe, pola cenciella razón que dengún de los dos son valores eternos. Entendiendo siempre que les músiques que güei esisten nel mundu son en cierta manera híbrides, resultáu del contactu ente cultures mui diverxentes.
La tonada continúa viva nos nuestros díes per enriba de les voces agoreres que vienen pronosticando la so defunción cada ciertu tiempu. El momentu quiciabes nun seya’l meyor de los deseaos, pero ensin dulda tampocu ye’l peor. El camín que-y queda por percorrer a otres manifestaciones como la vaqueira, l’añada y la xirandilla inda ye más abegoso. Dalgunos trabayos recientes ya apunten na dirección de la recuperación de vieyes canciones, de manera que puean sirvir de documentu de base y análisis pa un desarrollu posterior a les nueves xeneraciones de cantadores. Asina ye’l casu del trabayu englobáu baxu la denominación Muyeres, un poco na llinia d’otros mui anteriores y tamién mui meritorios como los del Cuarteto Cea o dellos otros temáticos como’l dedicáu a una amuesa de vaqueiras de Juan Uría Maqua. Mesmamente, ente abondos de los cantadores de tonada, dende antiguu, vien dándose’l fenómenu de combinar tonada y canción asturiana en xeneral, como ye’l casu de Diamantina Rodríguez en bon númebru de los sos discos, por exemplu nel tituláu A las madres de los mineros, nel que s’afayen siete tonaes, una añada, una vaqueira y tres xirandilles (meyor dicir, aires de xota).
Nada meyor pa ello que nun escaecer que la tonada y la so ductilidá p’asturianizar otres músiques del repertoriu asturiano y foranu, permítenos creyer serio nes grandes posibilidaes de supervivencia y esporpolle.
La tonada ye, pues, un mundu propiu pero non aparte dientro de la canción asturiana. Los cantadores de tonada averáronse y avérense dende ella, colos sos xiros y cadencies peculiares, a otres formes musicales tradicionales. Esti cruce y mestura podría ser inda más grande. El tiempu y la capacidá d’innovación de los propios cantadores van tener muncho que ver nello. | | | | | | | ¿Nun se ta dando un estancamientu de la tonada nel presente? | La tonada continúa siendo n’actualidá’l xéneru más identificativu de la música asturiana. La so ductilidá permite-y afrontar el futuru con grandes espectatives. Pero, los sos intérpretes actuales afáyense na encrucixada del desconocimientu y de la reiteración.
El desconocimientu que los cantadores de tonada tienen del xéneru orixina una repetición reiterativa de les canciones de los llamaos clásicos. Escaeciendo qu’estos clásicos, nel so tiempu, fueron tresmisores d’unos estilos y creadores n’ellos. La limitación de la creatividá ye, nel momentu presente, el más grande obstáculu col que s’afaya’l desarrollu futuru de la tonada. Esta limitación a la creatividá vien fomentándose dende hai años a través de los concursos de canción asturiana, onde se premia, per encima d’otros valores, la fidelidá de la interpretación d’una canción al modelu conocíu na voz de dalgún de los sos cantadores clásicos. Nel presente, nengún de los concursos esistentes -y son varios- cuenta nes sos bases con una base espresa que fomente la creación de nueves tonaes.
Ensin creatividá la tonada tien de pasar, en nada de tiempu, a ser un xéneru a conservar, netamente anacrónicu, pero non vivu. Imitar a los clásicos pue ser un buen exerciciu d’estilu. Los clásicos fuéronlo porque llograron imprimir el so sellu a una serie de tonaes que güei los representen. Esti sigue siendo’l camín a siguir polos cantadores actuales.
Neto, ún de los grandes problemes ye’l de la poca prodigalidá de los compositores. La mestura que dende’l cambiu de sieglu se diera ente la música nomada culta y la nuestra más característica espresión folclórica debióse principalmente al fechu de qu’estos compositores alcontráronse con una manifestación artística lo sufucientemente desarrollada, definida y asinamesmo culta como pa ser homologada, dientro de la humildá del so orixen, coles meyores coples flamenques, lieder europeos y aries d’ópera. Como diz la tonada tradicional, hai una llinia trazada.
A diferencia del flamenco, la tonada nun sufrió n’escesu los abatares del folclornacionalismu de mediaos de sieglu, nin tuvo d’arrecostinar col fechu de ser una espresión del más fondu sentir de la raza. Un periodu que la espresión más pura del cante jondo paso con dificultá, como dexó escrito l’estudioso sevillanu Manuel Urbano Pérez, al señalar que’l flamencu "para muchos se quedó en producto de consumo por señoritos marchosos, para recitales de protíbulo o para degustación de cabales que lo escuchan, mientras le miran al repetido trasluz de las botellas de jerez, como pasada y aséptica reliquia museable; o que es algo colorista, relumbrón y típico apto para que el más huero de los folclornacionalismos de consumo interior. Parece que existan eternas miradas por declarársele; de ahí que se le revista para sacarle a la calle o se le desprecie cuando huele a cueva, taberna, esparto, sudor y chigre", nel so llibru Pueblo y política en el cante jondo. La tonada medró nel maxisteriu tradicional del chigre y la romería y foi quien a facese oyer nes sales de conciertos, ensín escaecer enxamás los sos nicios y volviendo a ellos cola facilidá que da’l mesmu fechu de que’l chigre o’l prau s’afayen siempre en cualquier requexu d’Asturies al final d’un conciertu, seya esti nel llugar que seya. Les ordenances municipales de dellos conceyos asturianos tan vedando la tonada en chigre y les comisiones de fiestes de los pueblos tan dexando de programar canción asturiana dientro del programa de festeyos. Naide dulda, y menos que naide l’asturianu nel so pesimismu ancestral, que tienen de venir tiempos meyores. | | | | | | | ¿Por qué ye la tonada música moderna? | La tonada, nestos caberos años del fin del sieglu, ta viéndose necesitada d’un regresu a los oríxenes como una manera d’afrontar dende los sos propios raigaños el futuru. Esto, como toles verdades con apariencia d’absolutes, nun dexa de ser una verdá a medies.
L’asturianada pue considerase como un claru exemplu d’intentu de facer una música asturiana moderna, de raigañu folclóricu. Ensín duldar del orixen "ancestral" de la tonada, la escasa información qu’hasta lo cabero’l sieglu XIX se tien d’ella fainos pensar que’l verdaderu desarrollu de la mesma dase nesti sieglu. El so espoxigue débese a qu’estes canciones individuales, munches d’elles de clara creación personal, recueyen nel so estilu, a partir del ésitu que tienen ente’l pueblu, una forma de facer moderno enraigonao col sentir popular.
Asina, nesti tiempu que podríemos denominar d’entesieglu, surde un xéneru popular que ruempe’l so aisllamientu d’orixen pa convertise en representativu por escelencia de la canción asturiana. Si l’exemplu de la tonada se nos fai difícil d’entender, bástenos el cercanu casu de la vaqueirada que, como’l so nome indica yera esclusiva de los vaqueiros. Asina, la tonada arriera abaxa de la montaña vestida d’asturianada. | | | | | | | ¿Qué tipos de tonaes hai? | Nes bases del Concurso y Muestra de Folklore "Ciudad de Oviedo" estipúlase que los cantadores solistes van poder interpretar, según la so voluntá, canciones completes, ensin supresiones nin añadíos, con o ensin acompañamientu o utilizando los servicios del gaiteru oficial del Concurso. Dase, a escoyer, arriendes d’unes canciones de llibre elección, una riestra de canciones de repertoriu obligatoriu. Too ello fai referencia a canciones que podríamos denominar asturianaes en xeneral. Les bases del Concurso de San Martín del Rei Aureliu, que se celebra nel restorán El Urogallo, dixebren dos modalidaes: la d’asturianada y la de vaqueirada.
Trátase d’una división simple que, mayormente, nun entraña complicaciones pa los sos intérpretes, al diferenciar éstos perfectamente de que se ta falando cuando refier a asturianada y cuando se fala de vaqueirada. En dambos casos se ta falando de canciones non orixinales de les qu’esiste una referencia grabada por dalgún cantador de los nomaos clásicos, principalmente.
Malapenes se plantea dengún otru tipu de división. Pero, vistos los comentarios xenerales fechos hasta’l momentu, podríen plantease otra serie de divisiones que, en llinies xenerales, nun entrañaríen gran problema de comprensión por parte de los sos intérpretes.
D’esta manera, vamos plantear un modelu de división de los diferentes cantes que conformen esta peculiar manera de cantar que conocemos baxo’l nome d’asturianada y que se definiríen en xunto como la serie de modalidaes, perfectamente diferenciaes, qu’integren la canción asturiana interpretada por cantadores de tonada.
1. Tonada
Entendemos por tonada al tipu d’interpretación más tradicional y que ta relacionao directamente coles canciones denominaes d’arrieru y que tienen el so orixen, principalmente, nes zones altes de puertu, braña y mayáu de la cordelera cantábrica, particularmente de la fastera central d’Asturies. Tradicionalmente los sos intérpretes dicen que les soberanes, una de les sos variantes, ye’l tipu más antiguu. La so característica principal ye la so estructura estrófica: 5a, 8, 8a, 5b, 8, 8b, de la que danse enforma variantes. Asina como les tonaes de llugar, "La Praviana", "Soi de Mieres", "Soi de Grado", "Soi de Llangreo"..., qu’utilicen ya la tradicional cuarteta.
Dientro de les tonaes danse una serie de variantes mui particulares:
1.a Tonada del guo: pol peculiar gritu col que l’acompañen los sos oyentes. Exemplos: "Para castañes, Tremañes" o "Cuatro chavales de Ceares".
1.b Tonada arriera: caracterizada por un ámbitu tonal mayor que les anteriores y resuelve con un gran saltu de voz dende notes mui graves, xeneralmente. Exemplos: "Pasé el puertu de Payares" o "Caminito del puertu".
1.c Tonada d’autor: de marcáu carácter individual, si bien emparentaes coles arrieres, nun tienen porqué contar con autor conocíu pero la so singularidá melódica fáinoslo pensar. Exemplos: "A la salida del Sella" o "La portillera".
1.d Tonada a la gaita: en modu mayor y que, en xeneral, concuerden coles tonaes del guo.
1.e Ayerana: modalidá de tonada caracterizada pol mayor númberu de melismes.
2. Asturianada
Consideramos, pues, que col nome d’asturianada englóbense les canciones de la modalidá anterior, ampliaes a toa una gran riestra de canciones que, proviniendo del cancioneru xeneral, pasen a formar parte del repertoriu de los cantadores tradicionales al dotar a estes canciones de les característiques que definen a aquélla.
Asina, entiéndense como asturianaes:
2.a Canciones o cancios: Ellaboraes a partir de les característiques tradicionales de la tonada. Exemplos: "Soi asturianín" o "La mina y el mar".
2.b Añaes: canciones que tienen el so orixen n’acción d’añar el bierzu, como "Agora non".
2.c Xirandilles: canciones d’acompañamientu de baille, xeneralmente, como la mui conocida: "Baxaben cuatru ayeranos" o "Al pasar por el puertu".
2.d Hestories: romances tradicionales, principalmente de procedencia forana, como "Soi pastor".
2.e Asturianaes dialogaes: cásique siempre hestories o xirandilles interpretaes por dos catadores qu’establecen un diálogu ente ellos: "Ayer vite na fonte".
2.f Tol restu del folclor que, na voz d’un cantador de tonada, acaba por convertilo n’asturianada. Como exemplos pue citase ente les munches habaneres la de "Estuve en Cuba", que ya cita Torner, o les xotes que, baxo’l nome de xirandilles, tan maxistralmente tien grabaes Diamantina Rodríguez, ente otros.
Recordando, per último, que’l modu de cantar toles modalidaes anteriores ye "al alto la lleva", quedando el modu que se conoz como "a la oreya" pa les situaciones que requieren una mayor intimidá o nun ten necesitaes d’un esfuerzu vocal delantre de públicu. | | | | | | | ¿Quién son los clásicos de la tonada? | Con Baldomero Fernández, y más llueu con otros compositores como Torner y Manuel del Fresno, los principales cantadores algamen la condición de clásicos. Fechu que propició lo que güei conocemos como cantes por y que fai que, con una devoción cásique sagrada, los intérpretes caltengan inalteraes les canciones que s’asocien a talos autores: A la pipiona, d’El Maragatu; Viva la xente minera, de Xuacu’l de Sama; A la salida del Sella, de Juanín de Mieres, etc. Escasos autores fueron quien a separtase d’estos esquemes ríxidos.
Con too ello, resulta sorprendente como anguañu malapenes esisten collaboraciones ente pianistes y cantadores, nin siquiera na recreación de les obres yá clásiques de los compositores citaos. N’actualidá, dellos intentos, vinieron de la mano de cantantes líricos recreando lo que n’otru tiempu ficieran les voces de los clásicos de l’asturianada. L’exemplu de Joaquin Pixán ye’l más prolíficu nesti sentíu. Interpreta les obres de Manuel del Fresno, asina como nueves aportaciones de la mano de compositores actuales como Vázquez del Fresno y García Abril. Estos compositores sirven de nexu d’unión ente’l pasáu y el presente, anque en dengún momentu la so obra despierte l’interés del públicu que tuviera la de los sos antecesores.
Baxo’l nome de clásicos conozse a una serie de cantadores que, poles característiques de la so voz y pola so propia personalidá, interpretaron y crearon un conxuntu de composiciones que’l restu de los intérpretes tienen por referencia obligada. La primer serie de cantadores, lo qu’integren lo que podríemos llamar el primer clasicismu, son los que convierten la tonada de canción popular en canción profesional. Les voces indiscutibles son, ensin dulda, les de El Maragatu, Cuchichi, Miranda, Santos Bandera, La Busdonga, Xuacu’l de Sama, Juanín de Mieres y Quin el Pescador. Toos ellos nacíos enantes de 1910. D’ellos namás vive n’actualidá Juanín de Mieres. El siguiente grupu de voces clásiques, los qu’integraríen el segundu momentu del clasicismu, tendríen como nomes indiscutibles los de José Requejo, Silvino Argüelles, José Noriega, Carlitos Fernández, Laudelino Alonso y Diamantina Rodríguez. La nómina, sicasí, nun ye cerrada. | | | | | | | ¿Por qué se fala de la tonada como un xéneru profesional? | Dientro del folclore tradicional asturianu podemos dicir que l’asturianada ye’l únicu xéneru qu’algama una profesionalización. Ésta anicia a primeros de sieglu y continúase nos nuestros díes. Anque güei puea falase d’una ampliación d’esta profesionalización a otros campos instrumentales relacionaos col floclore, como les bandes de gaita o dellos gaiteros solistes, amás de dellos grupos folk o solistes de música pop-asturiana.
A esta profesionalización de l’asturianada, a lo llargo d’esti sieglu y más nos tiempos presentes, contribuyeron los concursos, les emisiones radiofóniques, los festivales y les grabaciones. El propiu virtuosismu qu’entraña la so interpretación contribúi netamente a ello. Pa acceder a él ye mester unos estudios vocales importantes. Nel casu de l’asturianada éstos danse a partir de los rexistros sonoros y de la imitación de los autores más reconocíos. Ensin dulda, tien de falase de virtuosismu tanto cuando se fala de la interpretación de delles canciones d’estremada complexidá como "Carromateros" o "A la salida del Sella", como en xeneral de la mayor metada de les canciones del repertoriu de los intérpretes d’asturianada.
Esti casu de profesionalización de l’asturianada ye un fenómenu que se tien dao n’otros folclores, como’l flamenco o cante jondo andaluz. Esta profesionalización básase fundamentalmente nes necesidaes técniques vocales especiales de los cantadores pa interpretar estes canciones, enforma asemeyaes a los de los cantantes d’ópera. La tonada que se cantaba nel sieglu pasáu yá necesitaba d’estes característiques vocales especiales, anque nun llegara al virtuosismu que se consiguió colos clásicos y que güei se continúa nos principales intérpretes (y tien el so principal desarrollu nos concursos de canción asturiana). La tonada nunca foi un xéneru al alcance de tol mundu. Con canciones d’esti tipu, n’otros folclores onde llega a dase esta especialización, ocurre lo mesmo. El folclore ye productu d’individualidaes que’l conxuntu d’un pueblu acaba asumiendo como propies. Nel casu concretu de les asturianaes, ocurre igualmente que la so tresmisión solo pue dase a través d’aquellos cuyu rexistru vocal puea permiti-ylo. | | | | | | | ¿Cuáles son les regles de la tonada? | La tonada conlleva unes regles d’aprendizaxe tan ríxides como les de l’armonía na música clásica, anque nesti casu la so tresmisión sea principalmente oral. Estes regles falen de:
1º Estilu: lo que caracteriza esti tipu de canción y especialmente les sos peculariedaes (melismes, formes cadenciales...)
2º Impostación: una particular manera de colocar la voz y emitila.
3º Timbre: el fechu de que la voz s’entone con fuerza y en diapasón eleváu, lo que n’asturiano recibe’l nome de cantar al alto la lleva.
Ensín escaecer qu’estes regles tamién son aplicables a una determinada manera d’interpretar vaqueiras que se popularizó a través de los cantantes d’asturianada. Fidela Uría Líbano, na so conferencia sobre "La Vaqueirada", dientro de les 1es Xornaes d’Estudiu sobre los Estilos de la Canción Asturiana, falaba de la esistencia d’un reducíu grupu de vaqueiras poco conocíu. A diferencia de les que s’axusten a un marcáu ritmu (principalmente ternariu), éstes son de carácter llibre y gran abundancia de melismes, xeneralmente al final de los periodos o frases. Como les asturianaes, estes vaqueiras nun tienen una función social determinada. Al ser poco conocíes, estes vaqueiras nun son les qu’inclúin los cantadores d’asturianada nel so repertoriu.
D’otramiente, estes regles, aplicaes a canciones populares, anque ayenes al repertoriu tradicional de la tonada, dan-yos un aire reconocible en tou momentu como propiamente asturianu. D’una manera más valiente, podría falase de que cumpliendo estes regles esti carácter pue aplicase a cualaquier canción, non esactamente de raigañu popular. | | | | | |
| | | | |  | | |  |  | | Baldomero Fernández visto por Miranda | |
| |  | | | "Aires Asturianos" de El Gaitero | |
| | | | | | | | |
|
