Liliana Castañón ye, con dieciséis años, una de les voces más moces y meyor consideraes dientro del panorama de la tonada asturiana. Alumna de Diamantina Rodríguez, una de les nuestres voces más clásiques, les sos magnífiques cualidaes vocales, el so gustu na interpretación y el gran momentu presente que vive la música tradicional asturiana, augúren-y un gran futuru a esta gran cantadora.   Nacida en Mieres n’agostu de 1984, entra en contactu col mundu de la tonada a partir de que siente les interpretaciones de dellos de los participantes del Concursu Ciudá d’Uviéu. Con trece años participa ella mesma nel concursu de La Nueva. Ye’l mes d’avientu de 1997. Depués de tres años de llevar cantando, baxo’l maxisteriu de Chucha de Nembra, en primer términu, y de Diamantina Rodríguez, n’actualidá, el presente añu 2001 ganó’l primer premiu de los concursos de La Nueva, L’Entregu y Ruturbiu, siendo tamién segunda n’Amieva y quinta n’Uviéu.   Ismael Arias: ¿Cómo empieces a cantar tonada? Liliana Castañón: Tuve nel 97 na entrega de premios d’Uviéu. Quedó campeona Anabel Santiago. Namás oyila, pensé: yo métome p’allá. Pasé ensayando toles vacaciones. I.A.: ¿Qué ye lo primero qu’aprendiste? L.C.: "Al pasar por el puertu". Con ella apuntéme al concursu de La Nueva. I.A.: ¿Quién cantaba na to casa? ¿Había tradición de facelo? ¿Dalguién na familia que cantara tamién? L.C.: Mio madre y mio güelu. Pero, tampoco muncho. Prestába-yos facelo, pero nunca se dedicaron a ello, nunca cantaron en nengún concursu. I.A.: Y, ensin tradición nenguna en casa, a ti diote por metete de cabeza. L.C.: Sí, de cabeza. Cantaba coses per casa, pero solo hasta que sentí a los del Campoamor nun me dio por cantar nada de tonada. El casu ye que de la qu’empecé nun sabía nin lo que yera. Yo, namás cantaba. I.A.: Y empieces con trece años. L.C.: Con trece años y con "Al pasar por el puertu" de La Busdonga. I.A.: D’empezar, empezar a lo grande. ¿D’ónde saques tu una grabación de La Busdonga? L.C.: D’unos amigos que trabayen con mio madre, a los que siempre-yos prestara enforma la tonada. Dexáronme la cinta y allí na playa púnxeme a escuchala y hasta que l’aprendí. I.A.: ¿Qué más canciones? L.C.: Amás de "Al pasar por el puertu", pa la semifinal de La Nueva llevé la de "Soi asturianina" ("Paloma blanca"), por Cuchichi. Pero, na final, yá nun m’alcuerdo lo que canté. I.A.: ¿Qué tal el tiempu con Chucha de Nembra? L.C.: Subía a Morea dos veces per selmana y fui asina aprendiendo unes cuantes canciones: "Debaxo d’una panera", "Carretera de Colloto", "La panadera"... y, tamién, la última qu’aprendí, fue "La soberana". I.A.: ¿Y agora con Diamantina Rodríguez? L.C.: Con Diamantina too ye diferente. Mui bien. Ye otra forma de facer. Con Diamantina escucho, aprendo, repito, vuelvo repitir... miramos coses non solo de Diamantina sinon de munches otres voces, mirando que puean axustase a la mía, de Miranda, de Leonides, de Josefina Fernández, de La Busdonga... Llevo dos años con ella y toi contenta porque m’encanta como canta, con una forma d’aprender mui particular, tranquila, enllena de paciencia, esperando que dés de ti lo meyor que tengas. Con ella too t’entra mui fácil, tien muncho interés, ye capaz de llamame a les hores más rares pa enseñame una grabación qu’alcontró y, sobre too, tien kilos de paciencia. I.A.: ¿Qué cantes de Diamantina? L.C.: "Sácalo con garabatu", "Onde la neblina posa", "Caballo al verde", "Tu nun vayas más a mio casa", "Arboleda bien plantada"... y más, y agora toi aprendiendo "Ventanina", que tanto esta como "Sácalo con garabatu" tamién son de Josefina Fernández. I.A.: Diamantina trevióse con too, ¿con qué te lleves atrevío tu? L.C.: Tovía con nada. Yá tendré tiempu. Lo que pasa ye que Diamantina sigue siendo muncho Diamantina. Liliana Castañón de xuru nos tien de deparar abondes allegríes dientro del mundu de la canción tradicional asturiana na qu’ella s’alluga yá con nome propiu.		Liliana Castañón nel añu 2000 Liliana Castañón nel añu 1998