Dende hai un par d’años un colectivu de ciudadanos mierense vien trabayando por sacar alantre’l proyectu de Fundación Muséu de la Tonada. Esti colectivu, nomáu IDEA, aglutina alredor a tolos axentes políticos y sociales de Mieres, asina como a les asociaciones d’intérpretes de la canción asturiana. El so fin últimu ye consiguir poner en funcionamientu un centru de recopilación, investigación, promoción, difusión y educación relacionao cola música asturiana, en xeneral, y más en concreto con un los sos aspectos más identificativos, la tonada o asturianada. José Manuel García, intérprete y mierense, amás de coordinador de les Xornaes d’Estudiu de la Canción Asturiana qu’anualmente se cellebren na Casa de Cultura "Teodoro Cuesta" de Mieres, ye una de les figures mas identificatives d’esti colectivu. Estes son les sos palabres en relación a los oríxenes y l’estáu actual d’esti proyectu.   Ismael Arias: ¿En qué situación s’alcuentra nesti momentu el proyectu de Fundación Muséu de la Tonada? José Manuel García: Actualmente la Fundación Muséu de la Tonada ta nun periodu de definición económica y estatutaria. Per un llau, ta llevándose al acabu la redacción d’unos estatutos polos que rexise la Fundación y na que se definiríen los miembros que la integraríen y les funciones d’un organismu d’estes característiques. Per otra parte, tamos a la espera d’alcontrar un llugar nel que ubicalu y una dotación económica cola qu’empezar andar. I.A.: ¿Qué entidaes cuidáis que deberíen formar parte d’esta Fundación? J.M.G.: Empezando per casa, debería tar l’Ayuntamientu de Mieres, al través del so Area de Cultura. Tendría tar tamién la Conseyería de Cultura del Gobiernu del Principáu d’Asturies, nesti casu al través de les sos direcciones xenerales de Cultura y d’Educación, por motivos dambes que más tarde voi esplicar. Tamién tendría tar la Universidá, d’una parte pol fechu de tener Mieres Campus Universitariu y d’otra pola necesidá de vincular la investigación y l’estudiu a nivel universitariu a les diferentes variantes de la nuestra música tradicional. Como non, tamién tendría facese una invitación a entidaes del tipu de la Obra Social y Cultural de CaxAstur, ensín escaecer otres entidaes que nesti momentu tienen una apuesta firme cola música y la tonada asturiana. Amás d’a infinidá d’empreses privaes, grandes y pequeñes, a les que-yos prestaría mostrar la so asturianía per medies d’un proyectu d’estes característiques. I.A.: Contamos tamién con colectivos relacionaos cola tonada asturiana, arriendes d’otros dedicaos a otros aspectos del folclor. J.M.G.: Les diferentes asociaciones d’intérpretes de canción asturiana tienen un gradu d’implicación total, yá que dende un primer momentu tuvieron a favor de la creación d’esta Fundación Muséu de la Tonada. Sabemos tamién de la esistencia d’otros asociaciones folclóriques con importantes fondos documentales, archivos sonoros y de imaxen, relacionaos cola nuestra música, y cuido que sedría importante aglutinalos, de manera que nadie se sintiera escaecíu nesti proyectu y que toos vieran nél un instrumentu necesariu pa trabayar per un futuru de la cultura musical asturiana. Esta collaboración debiera de facerse estensible a otros ayuntamientos, prósimos y allonxaos del de Mieres, pero a los que-yos prestaría entrar a formar parte d’un proyectu d’estes característiques. I.A.: Fálame del colectivu IDEA. J.M.G.: Esti colectivu créase namás col fin de sacar alantre esti proyectu y facelo nel conceyu de Mieres, pola so particular relación col mundu de la tonada. Ta integráu por xente de tol arcu políticu y social, amás de tener nél representación toles asociaciones d’intérpretes que comentaba. I.A.: A la vista del resultáu del repartu de los Fondos Mineros, ¿qué pensáis que tuvo d’haber pasao como pa qu’al proyectu de Fundación Muséu de la Tonada nun se-y diera nenguna aportación económica? J.M.G.: Ahí hai dos coses estremaes. Per un llau, cuido qu’el proyectu fue valoráu poles diferentes fuerces polítiques y sindicales mui positivamente, polos menos no qu’a nosotros particularmente nos dixeron. El fechu ye que lu asumieron y lu presentaron. Otra cosa aparte ye que nesti momentu nun se-y diera una aportación económica pa sacalu alantre. Tírome a pensar que s’atendió principalmente a proyectos que fueran un revulsivu económicu pa Les Cuenques y que se dexó pel momentu de llau otros proyectos que tuvieran más tresfondu cultural, como yera’l casu del nuestru. Falábase de creación de puestos d’empléu y nesi sentíu’l nuestru proyectu diba encamináu a otru tipu de valores. Namás salieron alantre dellos proyectos culturales no que se refier a Llangréu. I.A.: ¿Pa cuándo’l borrador d’estatutos de la Fundación? J.M.G.: El borrador d’estututos tá redactándose dende ún de los servicios técnicos de la Conseyería de Cultura y tamos al aguarde de la so redacción definitiva nestos díes. Cuido que podría facese la so presentación nel mes de septiembre. Tien de tenese en cuenta que se trataría d’una presentación a los diferentes organismos que se piensa deberíen entrar a formar parte como sociaos d’esta Fundación. Depués, ente ellos fadríase una redación definitiva d’estatutos. I.A.: ¿Por qué pensáis que ye Mieres el llugar idoneu como pa sacar alantre un proyectu d’estes característiques? J.M.G.: Bueno, Mieres siempre fue de dalguna manera la capital de la canción asturiana. Dellos de los sos principales intérpretes nacieron aquí o tuvieron de dalguna forma una vinculación con esti conceyu. Nesti momentu, les dos principales figures clásiques vives de la tonada asturiana son mierenses. Toi falando de Diamantina Rodríguez y de Juanín de Mieres. Pero, nun tenemos d’escaecer a xente como Manuel Gadoy, como Silvino Argüelles, o como la mesma Busdonga, que viviera munchos años na plaza de Requexo de Mieres y qu’aprendiera a cantar sintiendo a los mierenses que lo facíen nel chigre del so padre. Tamién ta la propia respuesta de públicu que se da en Mieres a tolos actos relacionaos cola tonada asturiana, una respuesta masiva. Too esto sos aspectos importantes a la hora de considerar un llugar nel qu’ubicar la sé d’una Fundación relacionada cola tonada asturiana. Amás de ser el propiu Mieres el que presenta esti proyectu. I.A.: Una de les necesidaes prioritaries sedría un local. J.M.G.: Sí, per un llau ta baraxándose la posibilidá de dir a ún de nueva construcción, pero ensin dexar de llau la posibilidá de recuperación d’ún de los edificios históricos del nuestru patrimoniu. Nel casu de falar d’una rehabilitación, sedría interesante poder contar con dalgún edificiu na zona de Requexo. Tan mirándose igualmente dellos edificios antiguos del cascu urbanu. I.A.: ¿Qué pensáis que sedría lo elemental colo que debería contar una Fundación como ésta? J.M.G.: Tendría de tener un apartáu espositivu, tanto permanente como rotatoriu. Pero, fundamentalmente, debería d’atender a aspectos educativos y d’investigación y promoción de la música asturiana. Tien de ser un motor de desarrollu de la tonada y de tantos otros aspectos relacionaos cola nuestra cultura tradicional. Al través de la enseñanza debería de trabayase pola consecuación d’introducir la tonada nos estudios de la EXB y de la ESO y consiguir, polo menos, un mínimu gradu de conocimientu de la población moza de la cultura musical propia de la so tierra.Y, por mediu de la promoción, tendría de trabayase por dexar constacia en tolos foros posibles de la esistencia de la tonada y de les sos característiques principales, de manera que se reconoza como una seña d’identidá d’Asturies y que sirva pa pa dar a conocer la so singularidá. I.A.: La referencia siempre ye’l flamencu. J.M.G.: Tien de selo obligatoriamente. El flamenco son families, una saga, una profesión, un arte... nun dexa de ser siempre un exemplu nel que mirase. Ye un mundu tan ampliu, nel qu’hai sitiu pa too, pa lo más antiguo y pa lo más moderno, que merez la pena nun perder de vista. I.A.: Falando un poco de futuru, ¿qué plazos vos echáis pa ver en funcionamientu un proyectu como ésti? J.M.G.: Ye complicao d’axustar. Ye un proyectu al que naide nos ta diciendo que non, pero que non por ello dexa d’alcontrar trabes per toes partes. Tien dificultaes económiques, de situación y de propia deficinión del so cometíu y de los sos miembros. Pero, bueno, ahí ta y esperemos que la nuestra insistencia y el nuestru empeñu vean un resultáu positivu a la mayor brevedá posible. Pensamos en serio que ye un proyectu necesariu pa Mieres y p’Asturies. Pa Mieres porque se trata d’un proyectu mui vinculáu a la so xente y p’Asturies porque, como yá dicía anteriormente, la tonada ye una referencia obligada de la nuestra particular forma d’espresión artística.		José Manuel García y Xaime Arias col presidente de LibrOviedo José Manuel García y Rosi Fernández interpretando Dialogaes Juanín de Mieres con Ismael González Arias