La tonada, nestos caberos años del fin del sieglu, ta viéndose necesitada d’un regresu a los oríxenes como una manera d’afrontar dende los sos propios raigaños el futuru. Esto, como toles verdades con apariencia d’absolutes, nun dexa de ser una verdá a medies.

L’asturianada pue considerase como un claru exemplu d’intentu de facer una música asturiana moderna, de raigañu folclóricu. Ensín duldar del orixen "ancestral" de la tonada, la escasa información qu’hasta lo cabero’l sieglu XIX se tien d’ella fainos pensar que’l verdaderu desarrollu de la mesma dase nesti sieglu. El so espoxigue débese a qu’estes canciones individuales, munches d’elles de clara creación personal, recueyen nel so estilu, a partir del ésitu que tienen ente’l pueblu, una forma de facer moderno enraigonao col sentir popular.
Asina, nesti tiempu que podríemos denominar d’entesieglu, surde un xéneru popular que ruempe’l so aisllamientu d’orixen pa convertise en representativu por escelencia de la canción asturiana. Si l’exemplu de la tonada se nos fai difícil d’entender, bástenos el cercanu casu de la vaqueirada que, como’l so nome indica yera esclusiva de los vaqueiros. Asina, la tonada arriera abaxa de la montaña vestida d’asturianada.

Nes bases del Concurso y Muestra de Folklore "Ciudad de Oviedo" estipúlase que los cantadores solistes van poder interpretar, según la so voluntá, canciones completes, ensin supresiones nin añadíos, con o ensin acompañamientu o utilizando los servicios del gaiteru oficial del Concurso. Dase, a escoyer, arriendes d’unes canciones de llibre elección, una riestra de canciones de repertoriu obligatoriu. Too ello fai referencia a canciones que podríamos denominar asturianaes en xeneral. Les bases del Concurso de San Martín del Rei Aureliu, que se celebra nel restorán El Urogallo, dixebren dos modalidaes: la d’asturianada y la de vaqueirada.

Trátase d’una división simple que, mayormente, nun entraña complicaciones pa los sos intérpretes, al diferenciar éstos perfectamente de que se ta falando cuando refier a asturianada y cuando se fala de vaqueirada. En dambos casos se ta falando de canciones non orixinales de les qu’esiste una referencia grabada por dalgún cantador de los nomaos clásicos, principalmente.

Malapenes se plantea dengún otru tipu de división. Pero, vistos los comentarios xenerales fechos hasta’l momentu, podríen plantease otra serie de divisiones que, en llinies xenerales, nun entrañaríen gran problema de comprensión por parte de los sos intérpretes.

D’esta manera, vamos plantear un modelu de división de los diferentes cantes que conformen esta peculiar manera de cantar que conocemos baxo’l nome d’asturianada y que se definiríen en xunto como la serie de modalidaes, perfectamente diferenciaes, qu’integren la canción asturiana interpretada por cantadores de tonada.

1. Tonada.

Entendemos por tonada al tipu d’interpretación más tradicional y que ta relacionao directamente coles canciones denominaes d’arrieru y que tienen el so orixen, principalmente, nes zones altes de puertu, braña y mayáu de la cordelera cantábrica, particularmente de la fastera central d’Asturies. Tradicionalmente los sos intérpretes dicen que les soberanes, una de les sos variantes, ye’l tipu más antiguu. La so característica principal ye la so estructura estrófica: 5a, 8, 8a, 5b, 8, 8b, de la que danse enforma variantes. Asina como les tonaes de llugar, "La Praviana", "Soi de Mieres", "Soi de Grado", "Soi de Llangreo"..., qu’utilicen ya la tradicional cuarteta.

Dientro de les tonaes danse una serie de variantes mui particulares:

1.a Tonada del guo: pol peculiar gritu col que l’acompañen los sos oyentes. Exemplos: "Para castañes, Tremañes" o "Cuatro chavales de Ceares".

1.b Tonada arriera: caracterizada por un ámbitu tonal mayor que les anteriores y resuelve con un gran saltu de voz dende notes mui graves, xeneralmente. Exemplos: "Pasé el puertu de Payares" o "Caminito del puertu".

1.c Tonada d’autor: de marcáu carácter individual, si bien emparentaes coles arrieres, nun tienen porqué contar con autor conocíu pero la so singularidá melódica fáinoslo pensar. Exemplos: "A la salida del Sella" o "La portillera".

1.d Tonada a la gaita: en modu mayor y que, en xeneral, concuerden coles tonaes del guo.

1.e Ayerana: modalidá de tonada caracterizada pol mayor númberu de melismes.

2. Asturianada .

Consideramos, pues, que col nome d’asturianada englóbense les canciones de la modalidá anterior, ampliaes a toa una gran riestra de canciones que, proviniendo del cancioneru xeneral, pasen a formar parte del repertoriu de los cantadores tradicionales al dotar a estes canciones de les característiques que definen a aquélla.

Asina, entiéndense como asturianaes:

2.a Canciones o cancios: Ellaboraes a partir de les característiques tradicionales de la tonada. Exemplos: "Soi asturianín" o "La mina y el mar".

2.b Añaes: canciones que tienen el so orixen n’acción d’añar el bierzu, como "Agora non".

2.c Xirandilles: canciones d’acompañamientu de baille, xeneralmente, como la mui conocida: "Baxaben cuatru ayeranos" o "Al pasar por el puertu".

2.d Hestories: romances tradicionales, principalmente de procedencia forana, como "Soi pastor".

2.e Asturianaes dialogaes: cásique siempre hestories o xirandilles interpretaes por dos catadores qu’establecen un diálogu ente ellos: "Ayer vite na fonte".

2.f Tol restu del folclor que, na voz d’un cantador de tonada, acaba por convertilo n’asturianada. Como exemplos pue citase ente les munches habaneres la de "Estuve en Cuba", que ya cita Torner, o les xotes que, baxo’l nome de xirandilles, tan maxistralmente tien grabaes Diamantina Rodríguez, ente otros.

Recordando, per último, que’l modu de cantar toles modalidaes anteriores ye "al alto la lleva", quedando el modu que se conoz como "a la oreya" pa les situaciones que requieren una mayor intimidá o nun ten necesitaes d’un esfuerzu vocal delantre de públicu.