|
Les
modes musicales del momentu entren n’Asturies y los cantadores fainse
ecu d’elles.
Talos son los casos de Claverol y les sos interpretaciones de fox-trot
o La Busdonga y los sos cuplés.
Les
interferencies ente’l xéneru flamenco y la tonada son
munches y tan mui necesitaes d’un estudiu más detalláu.
Baste señalar nesti puntu como dellos investigadores actuales
del flamencu, siguiendo una tradición que parte de Falla y otros
contemporáneos, señalen n’Asturies l’orixen de dellos
de los estilos más conocíos del cante jondo, como la farruca,
el garrotín, etc. Munchos de los cantadores consideraos clásicos
de l’asturianada fueron grandes aficionaos al flamenco, llegando
a interpretalo.
Talu
foi’l casu de Josefina Fernández (con
asonsañamientu de guitarra) o d’Armando Montes, más recientemente.
La
Copla Flamenca (tamién nomada Ópera Flamenca o Copla Española)
entra n’Asturies d’enteguerres de la mano de la radio, de les compañíes
de variedaes y de los primeros grandes ésitos grabaos. Del so
mestizaxe cola tonada surde la figura d’El Presi y posteriormente
d’Antoñita Moreno (que de madre payariega incorpora dellos aires
asturianos al so repertoriu). El Presi foi, con más de
trescientos discos grabaos, el más popular de los cantantes asturianos
d’esti sieglu. Contó con un gran númberu de detractores
dientru del mundu purista de la tonada pol so estilu aflamencáu
y los acompañamientos a guitarra y orquesta de les sos canciones,
pero a nivel popular el so ésitu foi lo suficientemente grande
como pa que güei sigan interpretándose delles de les tonaes
como cantes pol Presi.
Los
ritmos americanos tuvieron un gran númberu de siguidores dientru
de l’Asturies de los años cincuenta, incorporándose a
la so interpretación grandes cantadores de tonada. Asina
nacieron grupos como’l cuartetu Los Pamperos, del que tamién
formó parte El Presi y otros munchos qu’incorporaron aires
caribeños y sudamericanos, como’l Trío Calaveras o el
Trío Sanjuanín. La so influencia rítmica déxase
sentir posteriormente nun tipu de canción mui popular nos años
setenta y ochenta de la mano de dos cantantes de gran ésitu:
La Pastorina y Vicente Díaz, y posteriormente nel Duo
Costa Verde.
El
folk song americanu entra n’España nos años sesenta y
orixina un gran númberu de grupos qu’intenten da-y a les canciones
populares un aire nuevu. N’Asturies surde a primeros de los setenta’l
grupu Madreselva con una grabación na qu’incorporen tonaes y
otres canciones tradicionales asturianes. La figura de Víctor
Manuel surde nesti momentu con una serie de canciones basaes n’aires
populares asturianos, p’acabar derivando hacia un tipu de canción
más pop. Continuadores d’ellos, y productu de la fusión
del folk song cola canción protesta sudamericana, surde a finales
de los setenta el grupu Nuberu. Años depués veráse
continuáu esti llabor por Carlos Rubiera, enforma más
centráu na música asturiana nos últimos trabayos.
Nun escaeciendo tampoco’l trabayu de Jerónimo Granda, por un
llau de recuperación de les famoses coples del Coque y
col tratamientu particular de delles canciones asturianes.
Cola
eclosión de la música celta en Bretaña, principalmente
a través del fenómenu Alan Stivell, y del enorme ésitu
del so Festival Intercélticu (nel qu’intervienen los países
consideraos celtes, ente los que l’últimu n’incorporase ye Asturies),
dase n’Asturies un importante surdimientu de los grupos folk (o grupos
celtes). Desarrollen principalmente la música, escaeciendo de
manera particular la tonada. La voz va incorporándose
a estos grupos con vaqueiras, xotes, muñeiras,
bailles de pandeiru, xirandilles, etc. Estos grupos consiguen
un resurdir de la gaita, que más alantre veráse reflexao
na proliferación de les bandes. Ente ellos destacaron: Beleño,
Trasgu, Ubiña, Manolo Quirós, Llan de Cubel, Xaréu,
Lliberdón, Felpeyu... Esti tipu de música continúase
anguañu.
La
influencia del rock y del blues ye mínima na canción asturiana,
dándose nos últimos años un averamientu esclusivu
a la llingua col rock radikal de Dixebra y l’agropop de Los Berrones.
El casu del blues, que tanta influencia vien exerciendo nos grupos flamencos
de la década de los noventa, xunto cola sonoridá latina,
va teniendo’l so reflexu en formaciones asturianes recientes como l’Asturiana
Minning Company.
Nel
tarrén del jazz ye interesante’l trabayu del pianista avilesín
Isaac Turienzo cola incorporación de temes asturianos al so repertoriu
jazzísticu. La versión de Paxarín parleru
ye granible nesti sentíu.
El fin de
sieglu aporta con un conxuntu de músiques que, con raigañu
dafechamente étnicu y folclóricu, nun escaez pa la so
interpretación les sonoridaes electróniques más
modernes. Enmárquense toes elles baxo los nomes de New Age y,
más actualmente, de Word Music. N’Asturies enllaza con esa sonoridá’l
discu "Tierra de Nadie" del gaiteru José Ángel
Hevia. Arriendes de los instrumentos tradicionales asturianos más
característicos, el discu combina otros correspondientes a otres
tradiciones folclóriques allonxaes xunto con voces de tonada
tradicional, canciones de ramu y voces árabes. La peculiaridá
más destacada ye la incorporación de tonada nes voces
de Mari Luz Cristóbal Caunedo y de Ismael Tomás, dos campeones
de reconocíu prestixu.
|
