Con Baldomero Fernández, y más llueu con otros compositores como Torner y Manuel del Fresno, los principales cantadores algamen la condición de clásicos. Fechu que propició lo que güei conocemos como cantes por y que fai que, con una devoción cásique sagrada, los intérpretes caltengan inalteraes les canciones que s’asocien a talos autores: A la pipiona, d’El Maragatu; Viva la xente minera, de Xuacu’l de Sama; A la salida del Sella, de Juanín de Mieres, etc. Escasos autores fueron quien a separtase d’estos esquemes ríxidos.

Con too ello, resulta sorprendente como anguañu malapenes esisten collaboraciones ente pianistes y cantadores, nin siquiera na recreación de les obres yá clásiques de los compositores citaos. N’actualidá, dellos intentos, vinieron de la mano de cantantes líricos recreando lo que n’otru tiempu ficieran
les voces de los clásicos de l’asturianada. L’exemplu de Joaquin Pixán ye’l más prolíficu nesti sentíu. Interpreta les obres de Manuel del Fresno, asina como nueves aportaciones de la mano de compositores actuales como Vázquez del Fresno y García Abril. Estos compositores sirven de nexu d’unión ente’l pasáu y el presente, anque en dengún momentu la so obra despierte l’interés del públicu que tuviera la de los sos antecesores.

Baxo’l nome de clásicos conozse a una serie de cantadores que, poles característiques de la so voz y pola so propia personalidá, interpretaron y crearon un conxuntu de composiciones que’l restu de los intérpretes tienen por referencia obligada. La primer serie de cantadores, lo qu’integren lo que podríemos llamar el primer clasicismu, son los que convierten la tonada de canción popular en canción profesional. Les voces indiscutibles son, ensin dulda, les de El Maragatu, Cuchichi, Miranda, Santos Bandera, La Busdonga, Xuacu’l de Sama, Juanín de Mieres y Quin el Pescador. Toos ellos nacíos enantes de 1910. D’ellos namás vive n’actualidá Juanín de Mieres. El siguiente grupu de voces clásiques, los qu’integraríen el segundu momentu del clasicismu, tendríen como nomes indiscutibles los de José Requejo, Silvino Argüelles, José Noriega, Carlitos Fernández, Laudelino Alonso y Diamantina Rodríguez. La nómina, sicasí, nun ye cerrada.

N’otres palabres, dientro del folclore tradicional asturianu podemos dicir que l’asturianada ye’l únicu xéneru qu’algama una profesionalización. Ésta anicia a primeros de sieglu y continúase nos nuestros díes. Anque güei puea falase d’una ampliación d’esta profesionalización a otros campos instrumentales relacionaos col floclore, como les bandes de gaita o dellos gaiteros solistes, amás de dellos grupos folk o solistes de música pop-asturiana.

A esta profesionalización de l’asturianada, a lo llargo d’esti sieglu y más nos tiempos presentes, contribuyeron los concursos, les emisiones radiofóniques, los festivales y les grabaciones. El propiu virtuosismu qu’entraña la so interpretación contribúi netamente a ello. Pa acceder a él ye mester unos estudios vocales importantes. Nel casu de l’asturianada éstos danse a partir de los rexistros sonoros y de la imitación de los autores más reconocíos. Ensin dulda, tien de falase de virtuosismu tanto cuando se fala de la interpretación de delles canciones d’estremada complexidá como "Carromateros" o "A la salida del Sella", como en xeneral de la mayor metada de les canciones del repertoriu de los intérpretes d’asturianada.

Esti casu de profesionalización de l’asturianada ye un fenómenu que se tien dao n’otros folclores, como’l flamenco o cante jondo andaluz. Esta profesionalización básase fundamentalmente nes necesidaes técniques vocales especiales de los cantadores pa interpretar estes canciones, enforma asemeyaes a los de los cantantes d’ópera. La tonada que se cantaba nel sieglu pasáu yá necesitaba d’estes característiques vocales especiales, anque nun llegara al virtuosismu que se consiguió colos clásicos y que güei se continúa nos principales intérpretes (y tien el so principal desarrollu nos concursos de canción asturiana). La tonada nunca foi un xéneru al alcance de tol mundu. Con canciones d’esti tipu, n’otros folclores onde llega a dase esta especialización, ocurre lo mesmo. El folclore ye productu d’individualidaes que’l conxuntu d’un pueblu acaba asumiendo como propies. Nel casu concretu de les asturianaes, ocurre igualmente que la so tresmisión solo pue dase a través d’aquellos cuyu rexistru vocal puea permiti-ylo.

La tonada conlleva unes regles d’aprendizaxe tan ríxides como les de l’armonía na música clásica, anque nesti casu la so tresmisión sea principalmente oral. Estes regles falen de:

1º Estilu: lo que caracteriza esti tipu de canción y especialmente les sos peculariedaes (melismes, formes cadenciales...)

2º Impostación: una particular manera de colocar la voz y emitila.

3º Timbre: el fechu de que la voz s’entone con fuerza y en diapasón eleváu, lo que n’asturiano recibe’l nome de cantar al alto la lleva.

Ensín escaecer qu’estes regles tamién son aplicables a una determinada manera d’interpretar vaqueiras que se popularizó a través de los cantantes d’asturianada. Fidela Uría Líbano, na so conferencia sobre "La Vaqueirada", dientro de les 1es Xornaes d’Estudiu sobre los Estilos de la Canción Asturiana, falaba de la esistencia d’un reducíu grupu de vaqueiras poco conocíu. A diferencia de les que s’axusten a un marcáu ritmu (principalmente ternariu), éstes son de carácter llibre y gran abundancia de melismes, xeneralmente al final de los periodos o frases. Como les asturianaes, estes vaqueiras nun tienen una función social determinada. Al ser poco conocíes, estes vaqueiras nun son les qu’inclúin los cantadores d’asturianada nel so repertoriu.

D’otramiente, estes regles, aplicaes a canciones populares, anque ayenes al repertoriu tradicional de la tonada, dan-yos un aire reconocible en tou momentu como propiamente asturianu. D’una manera más valiente, podría falase de que cumpliendo estes regles esti carácter pue aplicase a cualaquier canción, non esactamente de raigañu popular.

Poro, resulta estrañu que nos concursos de canción asturiana nun se dexe una puerta abierta a un xéneru que, como vimos enantes, tien enforma más de creación individual que colectiva. Na variación afáyase la verdadera esencia del folclore. La so vitalidá depende de la so capacidá d’adecuación al presente. Denguna d’estes dos característiques s’afayen anguañu nestos concursos, los mayores centros de muestra d’esti particular xéneru. L’asturianada camina néllos poles sendes de la reiteración y del anacronismu: repítese a sí mesma y vive d’espaldes al tiempu presente. L’exemplu de les bases del Concurso y Muestra de Folklore "Ciudad de Oviedo", el más importante anguañu, ye evidente nesti sentíu. Arriendes d’esistir unes canciones a escoyer dientro d’un llistáu cerráu, les de llibre elección enxamás son de llibre interpretación. El casu del restu de los concursos qu’hai pola xeografía asturiana ye enforma asemeyáu.

Esta repetición (dalgo que s’evidencia non solo nos concursos sinon tamién nes grabaciones) ta dándose nun xéneru como l’asturianada, únicu xéneru vivu, a diferencia del restu del folclore asturianu nel que la vitalidá débese a grupos conservacionistes folclóricos nos que la representación ta fuera del contestu pal que fueron creaos. Esta repetición fai que tantu’l tema que traten (que s’intenta subsanar cola incorporación de lletres nueves a vieyes melodíes, con resultaos bastante probes) se desvincule de l’actualidá, como la música (reiteración de les melodíes), lleven a l’asturianada hacia l’afectación (l’amaneramientu) y al retrocesu.

Les deficiencies actuales que se constaten nos concursos de canción asturiana resúmense nos siguientes puntos:

1º La predilección de los miembros del xuráu por aquelles canciones que tienen una mayor dificultá dende’l puntu de vista técnicu.

2º Esta predilección conlleva que namás s’acaben interpretando canciones de dos o tres estilos (dalguna ayerana, delles del centru y poco más) nos concursos y que tolos intérpretes repitan el mesmu tipu de canción.

3º Como consecuencia ye raro escuchar nos concursos vaqueiras, soberanas... y una llarga serie de canciones antigües.

4º Dende los xuraos aconséyase que tala canción ta meyor vista cantada por y que’n consecuencia tien d’acomodase a la manera en que foi interpretada por él o dexara grabada.

5º Too ello, fai que nun quede nos concursos dengún espaciu a la innovación y a la llibertá interpretativa.

L’orixen d’estos concursos parte del ésitu collecháu pol que nel añu 1922, baxo la dirección de Manuel de Falla, s’organizara en Granada. Pártese de la idea del seriu peligru de desaparición del cante jondo, en palabres del propiu Falla, y preténdese con él revitalizar tala manera de cantar y estructurar los sos diferentes cantes. Los resultaos algamaos n’Andalucía fueron controvertíos dende’l primer momentu. N’Asturies acabaron siendo, prácticamente, l’únicu foru escénicu de manifestación del xéneru.