12 muyeres ensin piedá

2010 / 01 / 08 - Les Noticies

Esti sábadu 9 de xineru, como vien ocurriendo nes últimes ediciones, va tener llugar la primera de les grandes cites de la canción asturiana del añu: la semifinal femenina del Concursu Cuenca del Caudal. Disputábense diez puestos. Ocupáronlos, como tamién ocurriera notres ocasiones, más de diez voces. Nesti casu doce, al quedar empataes a puntos nel séptimu puestu nada menos que tres d’elles.

Los entendíos y aficionaos podrán echar a faltar un par de nomes. La gripe, qu’esti añu fizo estragos. Pero, tamién, reconocerán que nel llistáu afáyase una docena suficientemente represenativa del bon momentu pol que tá pasando la canción asturiana femenina, la primera qu’apostó pol cambiu xeneracional y qu’agora empieza a recoyer los sos frutos.

La llista de les convocaes ye la siguiente: Lorena Corripio, Marisa Valle Roso, Rosario González, María Teresa González Soto, María José García, María Sánchez “La Pastorina del Cares”, Rosi Fernández Torre, Pilar Barreñada, Jesusa Fernández “Chucha de Nembra”, Noemí Torrado, Carmen Camporro y Liliana Castañón. A la final namás van pasar que cinco d’elles.

Noemí Torrado ye una de les voces nueves qu’empieza a aparecer polos certámenes. Lleva tiempu cantando, a pesar de la mocedá. Pero razones d’estudios y Erasmus tuviéronla estos dos últimos años fuera del circuitu. Agora, con una voz fuerte y enllena de matices, comienza a dexase notar. Como ye interesante tamién la presencia d’otres voces que lleven bien d’años concursando y que cuenten, en dellos casos, con un hestorial de dedicación a la tonada superior a los cuarenta años.

Esti fenómenu de la pervivencia d’esta xeneración ye una verdadera xoya, porque sigue sirviendo de referencia inmediata pa esta xeneración que lleva años naguando por dar el relevu xeneracional. Pero, en canción como en tantos otros campos relacionaos cola música, la edá nun ye siempre un factor a tener especialmente en cuenta. La mocedá nun ye más que bon síntoma de la posibilidá de futuru.

Esta xeneración mayor, que nesti llistáu representen Rosario González, María Teresa González Soto, Rosi Fernández Torre, Pilar Barreñada, Chucha de Nembra y Carmen Camporro, el cincuenta por cientu. Non exerciendo la función de resistir, ensin más, sinon amosando en tou momentu que la so presencia ye necesaria pa la correcta tresmisión del saber tradicional d’una xeneración a otra. Y tamién, como ye nel caso de Rosario González y María Teresa Soto, que tovía tienen ganes de siguir sobre los escenarios en bones condivciones de voces una montonera d’años.

El casu de Jesusa Fernández “Chucha de Nembra” ye dafechamente especial. Con discos importantes na década de los setenta, el so nome ye ún de los más identificativos del tiempu. Y, con too, na pasada edición del Concursu Cuenca del Caudal tuvo l’aquel de presentase na modalidá de Tonada d’Autor o tonada renovada, acompañada pol pianista Pablo Álvarez (que y’a acompañara venticinco años atrás a Diamantina Rodríguez na so última grabación, A las madres de los mineros). Esti fechu tuvo una trescendencia enorme. Amplificada esta trescendencia al algamar el segundu puestu, xústamente per detrás de Liliana Castañón –de la que-y distaben más de cuarenta años de diferencia.

Pero, en bona midida, la trescendecia de la presencia de Chucha de Nembra nel apartáu de Tonada d’Autor alviértese esti añu cuando pa la presente edición, amás d’ella, que repite, cuéntase con cerca d’una docena de nomes. Ente los que se cuenten bien de los más reputaos del momentu.

Chucha de Nembra, nesti sentíu, representa un modelu que pa sí quixeran otros xéneros musicales empleaos nesta tierra onde la edá lleva a repitir una y mil veces la mesma fórmula baxo l’apariencia de remix, nueves mezcles o nueves voces interpretando los vieyos temes, o a arrastrase pelos escenarios nuna despidida que parez nun tener fin. D’ehí que, agora mesmo, que Chucha de Nembra tá pensando entrar nun estudiu de grabación pa un nuevu trabayu, la xente sabe que va ser quién a facer coses nueves porque, más que los años, cuenta la capacidá pa la sorpresa.

Si Marisa Valle Roso fue la voz qu’arrasó l’añu pasáu, nel presente tan apareciendo otres que tienen intención de da-y batalla. En primer llugar, Lorena Corripio. Una voz fuerte, brengosa, que remite aína a les d’otres grandes de xéneru cuando interpreta maxistralmente tonaes clásiques como “Carretera de Cualloto”.

A partir de les ocho de la tarde, dende l’Auditoriu Teodoro Cuesta de Mieres, la primera de les dos semifinales. Al sábadu siguiente, 16 de xineru, la segunda. El Xuráu tará integráu por Anabel Santiago –cantadora y profesora de la Escuela de Música d’Uviéu-, Narciso Fernández –responsable del Concursu de Canción Asturiana d’Amieva- y Berto Varillas –maestru gaiteru y profesor de la Escuela de Música de les Cinco Villes.