Blo

< P'atrás  |   P'alantre >


10 años, 25 discos

2010 / 01 / 01 - Les Noticies

10 años, 25 discos

Podemos echar la vista atrás cien años. La música de la que falamos tien que ver coles tonaes asturianes que dexaron grabaes el Gaiteru Llibardón, Xuacu’l de Sama, El Maragatu, La Busdonga, Quin el Pescador o los Cuatro Ases. Y, d’aquella, tamién se grabaron cientos d’otres coses: zarzueles que yá nadie escucha, ritmos foranos que pasaron como les modes que los truxeron, cuplés y coples de cantar fácil que como vinieron volvieron dise.

A pesar de que nesti momentu’l pop-rock celebre les bodes d’oro, de que’l folk se dexe cada década influenciar pol folk de munchos otros sitios –USA, Francia, Irlanda… y agora mesmo de tantos otros sitios-, de que nos tocara vivir el tiempu de les descargues d’internet y del top manta… dientro d’otros cien años siguirá falándose nesta parte del mundu que ye la nuestra de la música que se tien como propia.

Malapenes lleven pasaos diez años d’esti nuevu sieglu. Suficientes pa que nos tocara asistir a un relevu xeneracional impresionante. Estos son, nuna mirada rápida, 25 discos pa entender esti tiempu. Dellos van ser imprescindibles pa falar d’esti tiempu dientro d’otros cien años. Dalguién va echar a faltar dalgún discu, más que nada de folk y d’otres músiques averaes. Posiblemente. La distancia de tiempu de la que tamos falando ye tan curtia y la nuestra propia mirada dende la necesaria distancia tan curtia, que nun veo necesidá de facelo.

Valgan, de toles formes, estos 25 discos, como averamientu a la canción asturiana del presente. Por más que yo lu presente de cara al futuru.

  1. Gerardo Orviz. Nueves canciones de la mina. Fonográfica Asturiana. Uviéu, 2000.

  2. Mariluz Cristóbal Caunedo. Ónde la ñublina posa. Fono Astur. Uviéu, 2001.

  3. VVAA. La tonada de la mina. Ámbitu. Uviéu, 2002.

  4. Sergio Agüeros. Adiós puebliquín de Cires. Fonográfica Asturiana. Uviéu, 2002.

  5. Rogelio Suárez. Recordando vieyos tiempos. Fonográfica Asturiana. Uviéu, 2002.

  6. Jorge Tuya, Ismael Tomás, José Manuel Collado y El Che de Cabaños. Cuatro Ases de la Toná. Fono Astur. Uviéu, 2003.

  7. VVAA. Cantares de mina. Ámbitu. Uviéu, 2003.

  8. Rosario González. De L.laciana vengo. Ámbitu. Uviéu, 2004.

  9. Liliana Castañón. Nel café de la esquina. Ámbitu. Uviéu, 2004.

  10. José María García. Entre Puerto y Caces. Fonográfica Asturiana. Uviéu, 2004.

  11. Arsenio Fernández Pérez “El Polenchu”. Históricos de la Música Asturiana. Centro Asturiano de Oviedo. Uviéu, 2004.

  12. Anabel Santiago. Anabel Santiago canta a Diamantina Rodríguez. Malespulgues Records. Mieres, 2005.

  13. Mariluz Cristobal Caumedo. Cantar de seronda. Fono Astur. Uviéu, 2005.

  14. Carlos Rubiera. Asturianaes. La Capitana. Xixón, 2007.

  15. María Sánchez “La Pastorina del Cares”. Aires de Peñamellera. Fonográfica Asturiana. Uviéu, 2007.

  16. Rogelio Suárez. Soi de la villa moscona. Fonográfica Asturiana. Uviéu, 2007.

  17. José Antonio Mallada. Sidra y Toná. Con Bemoles. Uviéu, 2007.

  18. Hermanos Valle Roso. Un pasu más. Ámbitu. Uviéu, 2008.

  19. Héctor Braga. Trad.ye. Vaso Music. Madrid, 2008.

  20. José Antonio González “Cantu la Vara”. Tierra asturiana. Fonográfica Asturiana. Uviéu, 2008.

  21. Mapi Quintana. El sonar de les semeyes. Musifactor. Piedras Blancas, 2009.

  22. Celestino Rozada. Al pie del Cuera. Fonográfica Asturiana. Uviéu, 2009.

  23. José Manuel Collado. Teitos. Fonográfica Asturiana. Uviéu, 2009.

  24. José Manuel Robledo “Lolo de Cabranes”. Sabor Asturianu. Uviéu, 2009.

  25. VVAA. 25 clásiques de l’asturianada. Ámbitu. Uviéu, 2009.

Con too y que, de tener qu’escoyer namás que diez, bien podríen ser estos otros d’ente ellos.

El primeru de Mariluz Cristobal, polo que significó naquel momentu como revulsivu y pola influencia depués nel espíritu d’otra xente pa emprender nuevos trabayos.

Los dos recopilatorios dedicaos a la Mina, pero más que nada’l primeru d’ellos, porque sirvieron pa dar a conocer a toa una xeneración que diba revolucionar la música de los años siguientes y, tamién, pol formatu del trabayu que contribuyó a dar esa otra nueva imaxen necesaria.

El de los Cuatro Ases de la Toná, porque amosaba que la xente de la so xeneración inda tenía bien de coses que contar y que cantar.

El de Rosario González, porque dexaba claro nél que se podía siguir la vieya escuela ensin necesidá de más aditamentos que los tradicionales.

El de Liliana Castañón, porque marcó un camín pa facer una música más popular partiendo de buenos arreglos y buenos músicos.

El d’Anabel Santiago, porque’l so espíritu quedara dafechamente reflexao nes palabres de Diamantina Rodríguez, presente na grabación: “¡Ai, quién tuviera los medios d’agora y tamién los conocimientos!” y porque significaba, más allá d’otres coses que venía faciendo, que sabía volver a los oríxenes pa mirar hacia delantre.

El de Carlos Rubiera, porque llevaba años dándo-y vueltes y bien de discos rondando la tonada y, por fin, decidióse a ello con una voz trabayada pa facelo con dignidá.

El de los Hermanos Valle Roso, porque son el meyor exemplu de lo más mozo de la so xeneración y del futuru que tienen nes sos manes y na so voz.

El d’Héctor Braga, porque representa un puntu d’alcuentru ente la música clásica, el folk y la canción asturiana, y too ello sabiendo lo que se trai ente les manes.

Y, el de Mapi Quintana, porque emplea la voz de tonada pa facer con ella bien de coses más que tonada.

Y siguiría allargando la llista. Pero ye mester dexar sitiu pa esi otru trabayu que se me tá pasando y que de xuru nun taría nada mal meter.




<< Volver al llistáu