Eliminatories en Mieres
2009 / 12 / 25 - Les Noticies
“Adiós puente de Cayés”, na voz d’Enrique Riera, abrió l’apartáu de competición de la presente edición del Concursu Cuenca del Caudal. Berto Varillas, como gaiteru oficial y miembru del Xuráu xunto a Narciso Fernández. Fue na primera de les cinco eliminatories.
La serenidá de Fernando Entrialgo, ensin acompañamientu de gaita, aportó con “Recordando vieyos tiempos”. La voz de María Teresa Soto, trayada nos escenarios de bien de concursos, ganó n’aplausos. Depués, demostrando que’l que tuvo retuvo, Horacio Huerta. Y tres d’él, Jorge Roza, tornó a calecer les manes del públicu.
Con “Los corales que me diste”, na voz de Liliana Castañón, la xente recordó a la so maestra, Diamantina Rodríguez. La so voz sintióse ente’l públicu diciendo: “¡Depués dicen que s’acaba la canción asturiana!”. Los aplausos yá nun pararon, porque tres d’ella subieron al escenariu José García, Rogelio Suárez y el campeón de la pasada edición, Celestino Rozada.
“Baxaron cuatro ayeranos”, con José María García, abrió’l segundu día, nel que tamién participó en tercer llugar la so fía María José García, depués de l’actuación de Francisco Martín. Cuatro voces d’home vinieron detrás d’ella, les de José Manuel Pérez, Corsino Llaneza, Armando Quintes y Tino Braña. Pa cerrar la d’otra campeona d’esti certamen, María Sánchez Blanco, que fizo les delicies de tol mundu cola so versión de “Anda y señálame un sitiu”.
Na tercera eliminatoria, les primeres versiones de “Canteros de Covadonga” y de “Carretera de Colloto” que se diben sentir llegaron na voz de Rosi Fernández Torre y Carmen Camporro, siguíos de Cñesar de Dios y de Pilar Barreñada, cola tercera entrega de la citada “Carretera de Colloto”.
Detrás vinieron “Los ayeranos” de Fernando Valle y “Arboleda bien plantada” de la so hermana Marisa Valle, ganadora de la pasada edición, que tamién contó con Diamantina Rodríguez como espectadora nesta pieza emblemática d’ella. Pa cerrar la tarde les actuaciones de Julio Mallada, Manuel López y José Manuel Robledo, que tien acabante de publicar un nuevu trabayu en CD.
Abrieron la cuarta eliminatoria l’ayerán Enrique Castañón con “Cantar bien neña” y Artuto Cortina con “Caminito del puertu”, pa dar pasu a Héctor Braga que tuvo brillante na interpretación de clásiques como “Vite baxar per el monte” y “Carromateros”. Al que siguieron les voces de Fernando García Nuño y Juan Robledo.
Como brillante tamién tuvo la actuación de José Antonio González “Cantu la Vara”, tanto a la gaita como ensin ella. Una brillantez que yá nun descendió del escenariu al ue se subieron de siguío Andrés Cueli, con una magnífica “Baxaba Barrial de Casu” y Juan José Martínez cola so impecable “Madrugues tanto”.
Esti sábadu pasáu cerróse la última de les eliminatories, qu’inauguró la voz de Juan Luis Lobo, presidente de l’Asociación de la Canción Ayerana, interpretando “Les barandielles del puente”. Otra voz ayerana-y dio’l relevu nel escenariu, la de Chucha de Nembra, faciendo la so personal versión de “El Valle del Ríu Negru”. La mocedá de Noemí Torrado sorprende pola correcta afinación de les sos interpretaciones a la gaita. Pa, de contino, subise al escenariuy Francisco Queipo, Belén Antón –una voz que ye la primer vez que tá a concursu- y Carlos Alonso Peñayos.
La tarde vio pasar d’arréu a tres grandes: Rosario González, que consiguió salir del más de metru de ñeve que tenía delantre casa en Villaxer de L.laciana; Lorena Corripio, que bordó una cabraliega impresionante; y el so maestru, Ismael Tomás, que llució a la gaita como bien sabe facelo. Detrás d’ello yá nun quedaba más que cerrar el concursu y fízolo Dimas González.
La suerte tá echada. Queda la decisión del Xuráu y queda’l públicu espectante pa les dos finales, la femenina y la masculina, que van tener llugar nel Auditoriu Teodoro Cuesta de Mieres, los díes 9 y 17 de xineru, d’esti Concursu vetaranu organizáu pola Asociación Güeria de San Xuan.