Ser clásicu
2009 / 12 / 11 - Les Noticies
Tá acabante de salir al mercáu’l doble CD 25 clásiques de l’Asturianada. Una amuesa de tonaes hestóriques que, con malapenes dos variaciones, podría tar fechu va cien años. Idéntiques tonaes, pero nes voces de xente de primeros del sieglu XX, como La Busdonga, Xuacu’l de Sama, El Maragatu, Quin el Pescador, María la Pita, Cuchichi, Miranda, Claverol, Botón…
Idénticu recopilatoriu al que podría facese a mediu sieglu con xente como Juanín de Mieres, Diamantina Rodríguez, Silvino Argüelles, El Tordín, El Presi, Josefina Fernández, Leonides… O va venticinco años con tola xente que fueron les grandes voces del tiempu de la Transición.
Y faise agora, con voces de bien diferentes xeneraciones, pero nes que destaca la mocedá de toa una quinta que dende va diez años vien dando’l relevu a l’anterior y dexando constancia de que la canción asturiana ye un xéneru con futuru. Al delláu de voces como les de Mariluz Cristobal, Ismael Tomás y Jorge Tuya, les de xente como Lorena Corripio, Marisa Valle y Héctor Braga.
Lo impresionante sigue siendo l’empléu d’esti repertoriu clásicu. Tonaes que convirtieron n’obres maestres compositores clásicos influenciaos pol movimientu del Nacionalismu Musical y que trabayaron directamente con les grandes voces del tiempu. Compositores, per otra parte, enforma desconocíos del públicu en xeneral, como Baldomero Fernández, Víctor Sáenz, Martínez Abades o Martínez Torner.
Y, lo más impresionante entá, ye que podría facese esti recopilatoriu, tamién doble, con otres 25 tonaes igual de clásiques que les qu’integren esti doble CD y con otra docena llarga de cantadores del nivel de los amosaos. Y ensin necesidá d’echar gran cosa d’imaxinación pa facelo. 25 clásiques más esisten y tan na mente de cualuquier entendíu col que se fale y una docena llarga de cantadores de primer nivel atópense presentándose a culisquier de los concursos de canción asturiana y llegando a les finales.
¿A qué reflexón nos lleva esti fechu? Pela mio parte, a nenguna que nun lleve tiempu insistiendo nella: l’asturianada ye’l xéneru más identificativu de la música asturiana. Y, tovía un pasu más: pa que la música asturiana del futuru puea tener una carta d’identidá nesi futuru dientro de les músiques del mundu tendrá de facelo a partir de los rasgos identificativos d’esti xéneru. El propiu.
Otros xéneros llegaron y dexaron n’asturianada la so impronta. El Nacionalismu Musical fue ún d’ellos. Pero tamién tuvo sobre él la so influencia’l cuplé (“Soi asturianina”), la jota aragonesa (“Anda y señálame un sitiu”) o la copla (“La mina y el mar”). Como, aportando hasta los nuestros díes, dexó notar la so influencia’l pop, el rock, el folk o el jazz. Mesmo, nesti recopilatoriu, dalguna d’eses influencies déxase sentir con más pesu qu’otres –por mor del tiempu presente nel que se graba.
Pero, más allá de toles influencies posibles y necesaries, la canción asturiana sigue calteniendo les sos característiques fundamentales. Unes característiques que se siguen alvirtiendo más allá del dobro que suena acompañando “Que m’escurez”, na voz de Berto Varillas, o del piano, la batería y el baxu que suenen xunto a Marisa y Fernando Valle Roso. Unes característiques tan propies y tan identificatives que sirven pa dar carácter a la música ecléctica d’Hevia o al rock radikal de Dixebra. Ensin esa voz propia, la música, cualaquier música, la ecléctica, la radikal, el folk, el jazz… nun sedríen más que la música de cualaquier parte.
25 clásiques de l’Asturianada ye un discu espléndidu pa reconciliase cola propia cultura musical. Más que nada pa toa esa xente que, cada vuelta que-y doi a artículos relacionaos cola tonada asturiana, vuelve dicime lo mesmo: nun m’entra, nun me presta o nun pueo pa con ella.
Ye como aquel que dicía: lo que menos me gusta d’Asturies ye la humedá, el verde y la montaña. Ye como pa pregunta-y: ¿Tas seguru de que lo que te gusta ye Asturies? Falando de música falamos de lo mesmo. Ye como dicite: lo que menos me gusta de la música asturiana ye la tonada, la voz de los cantadores y el soníu de la gaita que los acompaña. Ye como pa pregunta-y: Pero, ¿tas seguru de que te gusta la música asturiana?
Y, nin te cuento si-y una respuesta asina te la da dalguién que te diz que lo que fai ye música asturiana. Nun dexa de sorprendeme qu’enxamás se ficiera a él mesmu la pregunta: ¿Taré seguru de que lo que toi faciendo ye música asturiana?
Y, por más que la pregunta pareza retórica y te lleve a un non, yo sé que la respuesta ye sí. Más que nada porque nun me gusten nada nin la humedá, nin el verde, nin la montaña. Pero, al menos, nun digo enxamás que me gusta Asturies.