L'infiernu son los otros
2009 / 12 / 04 - Les Noticies
En 1944 Jean-Paul Sartre escribió una obra de teatru titulada Huis clos, que s’estrenó con gran éxitu esi mesmu añu, y que na so versión castellana tradúxose como La puerta cerrada (cuando más o menos la traducción correcta del términu bien a ser “cuartu” o “cámara”). Tengo entendío que piensa llevala a escena’l Grupu Teatru Margen pal añu entrante.
Nesta obra, dos muyeres y un home, acabantes de morrer, vuelven topase nun cuartu o cámara trancada. Conscientes de tolo que ficieran na vida pasada, saben que van dir al infiernu, y namás aguarden esi destín de tormentos. Pero, según va avanzando la obra, danse cuenta que l’infiernu nun llega, porque yá tán nél. Esperaben pol azufre, la foguera, la parrilla encesa, pero acaben viendo claro que: “Pas besoin de gril; l’enfer c’est les otres” (Nun hai necesidá de parrilles; l’infiernu son los otros).
Sartre publica’l llibru nel tiempu nel que Francia tá invadida por Alemaña. Un tiempu que, intelectualmente falando, venía influenciáu pol llibru Sein und Zeit (Ser y tiempo, na so versión castellana), del filósofu Martin Heidegger. Una obra qu’axitara la filosofía alemana de los años anteriores y que, d’aquella, teníase por una de les obres más influyentes del sieglu XX.
Heidegger planteábase nella la pregunta pola esistencia del home, d’una forma nueva que diba tener gran influencia nos esistencialistes de mediaos de sieglu y, de manera especial, en Jean-Paul Sartre. Inspiráu nella escribió nel añu 1943 El ser y la nada, tamién plena ocupación alemana, y que s’acabó convirtiendo na so obra teórica fundamental.
Pa Sartre, la pregunta sobre’l ser del home dixebrábase en dos partes. D’un llau, esistía la conciencia del home, el ser-pa-él, y d’otra, el mundu qu’arrodia al ser, el ser-en-él.
Cuando escribe na obra Huis clos que “l’infiernu son los otros”, tá resumiendo la inquietú que produz el ser-pa-él del individuu cuando s’atopa con otros homes. Yá que, na obra, los personaxes ven nos otros el ser-en-él, y polo tanto nun los conoz. Y, al nun conocer a los otros, nun s’avaba de conocer él mesmu. Asina, la opinión de los otros acaba influyendo na visión que se tien d’él mesmu. Esa total dependencia de los otros lleva al pensamientu de que “l’infiernu son los otros”.
Cola perspectiva del tiempu la obra nun dexa de pareceme un tanto pesada, lo que nun quita pa que constantemente me recuerde a tres asturianos trancaos na cámara cerrada que ye Asturies debatiendo sobre la propia identidá y aportando, depués de bien de tiempu trancaos, a la conclusión de que “nun hai necesidá de parrilles; l’infiernu son los otros”.
L’esistencialismu, que dexó de ser una corriente filofófica influyente na Europa post-68, sigue siendo una fonte d’inspiración pa entender el ser d’Asturies. Mesmo, en cualaquier apartáu de la vida cotidiana. Pero, como escribo una columna de música, l’exemplu musical ye fácil.
Tres ilustres gaiteros asturianos modernos –y valdríame cualuquier otru instrumentu-, acabantes de morrer, vuelven topase nel más allá y, a diferencia de lo que sucediera nel más acá, tienen tola eternidá pa tar xuntos y pa siguir debatiendo sobre la identidá d’ellos mesmos, de la música que toquen, de la tierra a la que pertenecen y del mundu nel que viven.
Si ye cierto que van llevar a escena los actores del Teatro Margen esta obra, por más que dea la sensación de desfasada, voi recomendá-yosla de tou corazón a bien de músicos asturianos. Como, tamién, a bien d’ideólogos que visten de músicos. Al menos pa que, anque namás sea por una brevísimu instante, puean entender que ye cierto que “nun hai necesidá de parrilles”. Por más que, depués, en saliendo de la obra y tornando cada ún a lo d’ellos, vuelvan a siguir viendo l’infiernu, que son ellos mesmos, nos otros.