La tarde na que Chucha de Nembra cantó por Janis Joplin

2009 / 11 / 27 - Les Noticies

Chucha de Nembra ye de les grandes a la vieya usanza. Diba cantar dos. La primera a la gaita, “Debaxo’l cielu d’Asturies”, acompañada por Vicente Prado, El Pravianu. La segunda, “Ónde vas madrugador”, tamién a la gaita. Pero necesitóse, por tema d’horariu, que ficiera una tercera. Sobre la marcha. Cásique ensin tiempu pa reaccionar. El Pravianu retira del escenariu y, n’acabando los plausos, avera’l micrófonu y diz que va cantar una ayerana, qu’enxamás cantara una ayerana, pero que lo va facer, que se titula “El valle del Ríu Negru”, que nun sabe cómo ye, que nun sabe cómo saldrá, pero que sea lo que Dios quiera.

Resulta una temeridá dicir que cantó por Janis Joplin. Cuando lo cierto ye que cantó por ella mesma. Pero a la manera que nos tenía avezaos Janis Joplin. Sola, en metá del escenariu. Creando una melodía en cada vuelta. Creando vueltes nueves pa dalgo que podría ser una vieya melodía.

Esti vienres pasáu, 20 de payares, yera’l Día Grande de la Canción Ayerana. Interveníen lo meyor del momentu nesti xéneru que fuera perdiendo nos últimos años a los sos cantadores más emblemáticos. Con too, Juan Luis Lobo, presidente d’esta asociación de cantadores, arrancó los primeros aplausos con “Hermosa claverinera”. Detrás llegó un momentu únicu de la tarde. Salvador Vázquez salió a cantar el “Kyrie” acompañáu a la gaita pol so sobrín Fernando Rodríguez Vázquez. Delantre d’un silenciu d’ilesia en misa solemne. Como debiera.

Celestino González recordó a toos que díbamos a echar a faltar a Alaulfo Lada Camblor, que morriera a primeros d’añu, y pa ello cantónos como bien poca xente yá sabe facer “Pendu L’Argueyu”. Depués, Ricardo’l de Boo, que llevaba quince años ensin cantar riba d’un escenariu, punxo la so voz al serviciu de “Vite baxar per el monte” y recordónos a toos na so espresividá que la so fía, la soprano Beatriz Díaz, siguía teniendo un bon maestru en casa.

Depués enllenó la tarde de maxa l’actuación de Chucha de Nembra. Ganándose cada ún de los aplausos. Convirtiendo’l momentu n’impagable. Recordando a tolos presentes que la so particular manera de cantar vien d’una escuela que sapoza los sos raigaños nel fondo del Ríu Negru, esi valle d’antiguo carboneru, del conceyu d’Ayer.

A primeros d’añu presentárase con una tonada propia al Concursu Cuenca del Caudal, na sección de tonaes d’autor o tonaes renovaes. Algamara’l segundu puestu. Tamién en metá de los aplausos del públicu, qu’agradecíen que compartiera con ellos la so grandeza.

Detrás interviniera Enrique Castañón, al que la garganta y la gripe xugó una mala pasada na so interpretación de “Altos picos dan a Cuaña”, pero que supo defendese perfectamente en “Cada vez que baxo a Uviéu”. Pa dar pasu a otru momentu únicu de la tarde. Intervenía Concha Fernández. Nun lu pudiera facer, tamién por problemes de catarru, la so hermana Veneranda. La mesma qu’arrebatara a Diamantina Rodríguez el primer puestu del Concursu del Babel, al poco de finar la guerra civil. Diba tantos años que, ente tolos presentes, nun yeren a acertar escato l’añu.

Concha Fernández tamién interpretó tres. A la manera que namás ella sabe facer. “Vaquerinos del Gumial”, “Soi d’Asturies, soi d’Asturies” y “Anda y señálame un sitiu” (qu’ella sigue llamando “Ónde yo me puea dir”). Y cerró les actuaciones de la nueche ayerana nel cine-teatru Carmen de Morea, Maximino Solís, con dos clásiques de les aprendíes en casa, “Trenta riales de tachueles” y, como nun podía ser menos, “Pinchéme con una espina”.

Tolos presentes comentaben que la canción ayerana taba desapareciendo delantre de los nuestros güeyos. Falta, como na tonada asturiana, una nueva xeneración que-y dé’l relevu a l’anterior. Dalgo que vemos como normal nel casu de l’asturiana, lleva años ensin dase nel casu de l’ayerana. Echóse a faltar una Marisa Valle, un Héctor Braga, una Anabel Santiago, un Celestino Llaneza, una Liliana Castañón, un Sergio Agüeros. Echóse a faltar a tantos otros.

Na ayerana parez que nun queda más llugar que pa la señaldá. Una tarde como ésta pasada tráinoslo a la memoria. D’ehí que se sintiera como dalgo irrepetible cantar “El valle del Ríu Negru” a Chucha de Nembra. Como el “Kyrie” de Salvador Vázquez. Como los “Vaquerinos del Gumial” a Concha Fernández. Como “Pinchéme con una espina” a Maximino Solís.

Como too nesa tarde qu’entamaron les pandereteres de Folclor Ayerán y tamién la cerraron: quiciás demasiao moces pa decatase de que, ente la so primer y la última actuación, amiyara un ánxel sobre l’escenariu col rostru y la voz de Janis Joplin.