Manifiestu na defensa de los derechos fundamentales n'Internet
2009 / 12 / 02 - Internet
1.- Los derechos d’autor nun puen asitiase per enriba de los derechos fundamentales de los ciudadanos, como’l derechu a la privacidá, a la seguridá, a la presunción d’inocencia, a la tutela xudicial efectiva y a la llibertá d’expresión.
2.- La suspensión de derechos fundamentales ye y tien de siguir siendo competencia exclusiva del poder xudicial. Nin un cierre ensin sentencia. Esti anteproyectu, en contra de lo que s’establez nel artículu 20.5 de la Constitución, pon nes manes d’un órganu non xudicial -un organismu dependiente del Ministeriu de Cultura-, la potestá d’impedir a los ciudadanos españoles l’accesu a cualaquier páxina web.
3.- La nueva llexislación va crear inseguridá xurídica en tol sector tecnolóxicu español, perxudicando ún de los pocos campos de desarrollu y futuru de la nuestra economía, torgando la creación d’empreses, introduciendo enzancos a la llibre competencia y ralentizando la so proyección internacional.
4.- La nueva llexislación propuesta amenaza a los nuevos creadores y torga la creación cultural. Con Internet y los sucesivos avances tecnolóxicos democratizóse extraordinariamente la creación y emisión de conteníos de tou tipu, que yá nun provienen prevalentemente de les industries culturales tradicionales, sinon de multitú de fuentes diferentes.
5.- Los autores, como toos los trabayadores, tienen derechu a vivir del so trabayu con nueves idees creatives, modelos de negociu y actividaes asociaes a les sos creaciones. Intentar sostener con cambios llexislativos a una industria obsoleta que nun sabe adaptase a esti nuevu entornu nun ye nin xusto nin realista. Si’l so modelu de negociu se basaba nel control de les copies de les obres y n’Internet nun ye posible ensin vulnerar derechos fundamentales, tendríen de buscar otru modelu.
6.- Consideramos que les industries culturales necesiten pa sobrevivir alternatives modernes, eficaces, creyibles y asequibles y que s’adecuen a los nuevos usos sociales, en llugar de llimitaciones tan descomanaes como ineficaces pal fin que dicen persiguir.
7.- Internet tien de funcionar de forma llibre y ensin interferencies polítiques auspiciaes por sectores que pretenden perpetuar aneyos modelos de negociu ya imposibilitar que’l saber humanu siga siendo llibre.
8.- Desiximos que’l Gobiernu garantice por llei la neutralidá de la Rede n’España, ante cualaquier presión que puea producise, como marcu pal desarrollu d’una economía sostenible y realista de cara al futuru.
9.- Proponemos una verdadera reforma del derechu de propiedá intelectual orientada al so fin: devolver a la sociedá el conocimientu, promover el dominiu públicu y llimitar los abusos de les entidaes xestores.
10.- En democracia les lleis y les sos modificaciones tienen d’aprobase tres del oportunu debate públicu y consultando de mano a toles partes implicaes. Nun ye de recibu que se realicen cambios llexislativos qu’afecten a derechos fundamentales nuna llei non orgánica y que trata sobre otra materia".