Por Bernarda d'Utrera
2009 / 11 / 20 - Les Noticies
L’Ayuntamientu d’Utrera declaró esti mes pasáu tres díes de llutu oficial pola muerte de la cantaora Bernarda de Utrera. Falara de dalgo asemeyao tiempu atrás con relación a les muertes -recordando’l movimientu ciudadanu y el sentimientu colectivu- de Camarón y, enantes, de Jesús de la Rosa, voz y teclaos del grupu Triana. Dalgo que va más allá de la propia música y que fala del fonda xermandía que se da nesa tierra ente la xente y los sos músicos.
Bernarda Jiménez Peña comparte agora sitiu al delláu de la so hermana Fernanda, más conocida qu’ella a nivel popular. Tres años atrás, l’Ayuntamientu de la localidá inaugurara un monumentu a dambes na plaza Ximénez de Sandoval, al pie de la cai que lleva’l nome de dambes. El monumentu, como tantos otros asemeyaos dedicaos a otros cantadores y figueres del espectáculu,nun va tener siquiera un mínimu llugar na hestoria de la escultura, pero va siguir sirviendo pa recordar a les xeneraciones futures la esistencia d’esi vínuculu inmaterial cásique sagráu ente un pueblu y los artistes que meyor defendieron el sentimientu d’esti pueblu a través de la música.
Xitanes como yeren, de familia de cantaores, recibieran ente otros honores de los sos vecinos y autoridaes del llugar los títulos de Fía Predilecta d’Utrera, Fía Predilecta de Sevilla, Medalla d’Andalucía, Medalla del Méritu al Trabayu y Medalla d’Oro al Méritu nes Belles Artes. Y, per enriba de tolos reconocimientos políticos, el Premiu Nacional de Cante, otorgáu pola Cátedra de Flamencología y Estudios Folklóricos de Xerez de la Frontera.
Ñaciera n’Utrera en 1927 y yera ñeta d’El Pinini, Fernando Peña Soto, xefe d’una de les families flamenques más reputaes de los últimos ciento cincuenta años. La vida d’esti cataor, peles tierres de Lebrija y Utrera, roza’l mitu. Dizse d’él qu’inventara una particular manera de cantar y qu’ésta se sigue tresmitiendo a través de los miembros de la so familia. Un documentu únicu al respectu ye’l DVD Rito y geografía del cante, vol 5, de la serie grabada por TVE a mediaos de los años setenta.
El Pinini sigue siendo una bona contraseña p’adentrase nos submundos del flamencu vivu n’Andalucía. Dalgo como “lo más grande que conozco son las cantiñas d’El Pinini” permiten, de ser cierto, participar nesti ámbitu cerráu que malapenes llega a sentise tres de los focos y riba d’un escenariu.
Lo mesmo ocurre col arte que supieron facer llegar hasta los nuestros díes los sos ñetos: el Tío Benito, Bastián Bacán, Pepa d’Utrera y, como non, Fernanda y Bernarda d’Utrera. La fama d’elles empezó a trespasar les fronteres del so pueblu al recibir en 1957 el primer Premiu del Concursu Nacional d’Arte Flamenco de Córdoba. Depués d’ello, la so voz dexóse sentir en Madrid y Nueva York, arriendes de percorrer bien d’escenarios d’Europa, América y África col espectáculu de Manuela Vargas.
D’igual manera que la lleenda sigue viva con El Pinini, ensin nenguna necesidá de que quedara d’él nenguna grabación, Bernarda de Utrera, como enantes la so hermana Fernanda, acaba de trespasar la puerta de la inmortalidá. D’ella queden grabaciones en discu y esisten imáxenes en DVD y colgaes en Youtube, pero pa la inmortalidá nun se necesita más preba que la memoria, que l’alcordanza, qu’esa mínima consistencia de la que tá fecha la nuestra imaxinación cuando echa a volar.
Dalguién que llea estes llinees podría tar preguntándose que relación tien Bernarda d’Utrera –o cenciellamente la muerte de Bernarda d’Utrera- cola música asturiana de la que vengo falando nesta serie d’artículos. Espero que nun sea cierto.