Nel tiempu de les industries culturales

2009 / 11 / 13 - Les Noticies

I

Anguañu que los bienes y servicios culturales prodúcense en serie y con criteriu mercantil, ¿qué polítiques tendríen d’adoptase pa preservar la identidá, la diversidá y la creatividá nun escenariu caracterizáu pol predominiu de les empreses foranes? ¿Son necesaries siquiera?

N’Asturies el tema preocupa, como s’alvierte nel fechu d’encargar la redacción d’un Llibru Blancu de la cultura y les empreses culturales. Nun entro na manera na qu’esto se fizo nin nel resultáu que dio. Nel ámbitu de la música ya comenté nel so momentu que nun aportaba nada. Tamién yera evidente que nun se profundizara nél.

Les induatries de la cultura y la comunicación vienen representando nes cuatro últimes décades a escala mundial ún de los sectores económicos estratéxicos en materia d’inversiones de capital y el más grande crecimientu relativu en términos d’empléu. Nun ye casual, entós, que’l gran centru económicu d’estes actividaes empresariales seyan los Estaos Uníos. L’actividá específicamente cultural representa pa esti país más del 6% del PBI y emplea alredor del millón y mediu de persones. Arriendes de que les industries del copyrigth algamaran nos últimos años el primer puestu como sector esportador.

L’entretenimientu ye nesti momentu la fuerza impulsora de les nueves tecnoloxíes, como nel pasáu lo fuera la industria de defensa. Más que nada dende que en tolos países occidentales (y en bona parte de los orientales productores) el software de xuegos d’entretenimientu allúgase baxo’l paragües de les industries culturales, baxo’l xenéricu nome yá más estendíu d’industries d’espardimientu o entretenimientu.

A nivel mundial les cifres de gastu o consumu cultural y el tiempu que se-y dedica a elles medraron en proporciones axeométriques. La tresnacionalización, la concentración de la propiedá y la fusión o integración vertical ente empreses de distintu epígrafe son los rasgos distintivos de les industries culturales na era de la globalización. N’América Llatina y n’Europa, nes dos décades finales del sieglu XX, esti sector superó los trenta mil millones de dólares añales. Pola contra, si esaminamos hacia ónde fueron les ganancies compruébase que migren hacia les empreses tresnacionales que controlen los derechos de propiedá y la distribución, y poro, los beneficios.

Esto evidencióse dende bien ceo nel ámbitu de la música. Un campu que tuviera a tolo llargo del sieglu XX domináu por un reducíu númberu d’empreses tresnacionales. Seis que pues ser cinco, pues dos d’elles tan dafecho fusionaes: BMG, Emi, PolyGram, Sony Music, Universal y Warner Music. Éstes y les sos filiales y subsidiaries produxeron el 90% de tolos CDs y DVDs con música que circularon llícitamente. Too ello, hasta aportar a esta primera década del XXI na que tamos onde les descargues d’internet vinieron a acabar con esti dominiu.

Estes tresnacionales –con escepción de delles empreses discográfiques mui pequeñes y, de toles formes, bien fuertes- controlaron el mercáu y fueron ampliándo d’añu n’añu más el so dominiu mediante l’absorción d’empreses locales. Per otra parte, como los mervcaos continuaron siendo en bona midida naciuonales en cuanto a gustos y preferencies, les empreses tuvieron de descentralizar la xestión y trabayar pal públicu de cada país y, en paralelo, pa un mercáu supranacional.

Trátase d’una industria qu’operó –y inda opera, masque n’hores baxes- con tolos mecanismos del marketing y de la cultura de mases: los videoclips, el billboard, los premios Grammy, el star system y un llargu etcétera. Por eso, en cuanto a la diversidá y espresividá musical, les empreses dexaron fuera tolo que nun tenía un llugar claru (económicamente falando) nel mercáu o un públicu aseguráu. Asina quedaron enforma apartaos sectores como la música folclórica y folk o d’apelación identitaria, o la música culta y alternativa de compositores locales.

Esti fue’l so gran erru. Los beneficios nun dexen de siguir cayendo y les apuestes del mercáu global de la música cada vez se restrinxen a un númberu más pequeñu d’artistes. Shakira ye’l modelu soñáu. Pero, con too, la so cayida de ventes ye espectacular. Y el mercáu sigue demandando productos globales del modelu Shakira: pero tien otres formes más fáciles y, más que nada, más barates de facese con esos productos.

Dalgo que, en xeneral, nun afecta a los mercaos pequeños. En proporción, el descensu de ventes de los productos musicales locales ye mínimu. Dalgo que s’evidencia nel casu d’Asturies. Galicia ye otru casu enforma asemeyáu. Posiblemente nun va dase una nueva oportunidá de qu’apareza un productu tipu Hevia. Pero sí d’averase más a los modelos que representen nes últimes producciones Carlos Núñez o Kepa Junquera. Tampoco se necesita un productu que venda dos millones de copies. Sí pa les grandes empreses. Non pal mercáu del que procede. El tirón de ventes nun afectó sustancialmente a otros productos asturianos. El nivel d’imitadores de productu tampoco fue tan grande.

Visto dende los Estaos Uníos, España ye un mercáu pequeñu. La tamién cayida espectacular de les ventes de productos pal mercáu “español” evidencia que nun lo yera. Los mercaos pequeños son cada vez más pequeños. Y, por pequeños, fuertes. Una fuerza que, polo xeneral, desconocen. La fuerza que da permanecer cuando’l mercáu se tá derrumbando.

II

Nel área del cine y de la industria audiovisual los desequilibrios ente la producción endóxena y forana son contundentes. Con too, el problema más grave que treviesa’l sector ye’l de los de monopolios de distribución. Pa dicilo con otres palabres: nun ye que’l bon cine escasee; sinon más bien lo que nun hai n’importancia son polítiques de distribución que permitan que’l cliente potencial afaye nel puntu venta esa producción nacional o local.

Ensin llugar a duldes, la esistencia social y la identidá pasen güei pol llinguaxe audiovisual y, más que nada, pola pantalla del televisor (y, cada vez más, del ordenador). La constitución d’un “nós” en cualuquier país requier d’esi llinguaxe. Dende esta perspectiva, la industria cinematográfica y la televisiva son prioritaries en términos d’identidá.

De la mesma manera, les cultures populares y les cultures de los pueblos periféricos –inda más cuando na periferia d’Europa tá España y, Asturies, na periferia de la periferia- tienden a la inesistencia, porque pa la lóxica del mercáu que rixe estes producciones la diversidá cultural nun cuenta. Lo qu’incide, en bona midida, na nuestra autoimaxen y tamién na maner como nos perciben los otros, yá que los países con más grande capacidá de producción y comercialización de productos y servicios culturales nun solo llogren reafirmar la identidá cultural y los imaxinarios collectivos de los sos pueblos, sinon que, a la vez, tan en meyores condiciones pa influyir en nosotros.

Comentaba a esti respectu’l cineasta Ocativio Getino: “Les imáxenes d’USA son tan abondoses na aldea global que ye como si, en cuenta d’emigrar la xente a Norteamérica, fuera Norteamérica la qu’emigrara al mundu, permitiendo que la xente aspire a ser de los Estaos Uníos incluso nos llugares más remotos”.

Nel añu de la cayida del muru de Berlín asistí en Croacia a un conciertu de rock contra’l capitalismu y tolo que significaben, yá d’aquella, los Estaos Uníos. La paradoxa yera tremenda. Pero taba dándose en tol mundu. En nada surdiría’l fenómenu del rock radikal vascu y toles sos variantes correspondientes notros llugares de la periferia. Dalgo que nun pasaba de ser más qu’una subproductu del punk, que yá lo yera del rock, que yá lo yera de la esencia musical de los Estaos Uníos.

Un fenómenu que continúa. Nun sabría dicir si n’espansión. Pero, inda con fuerza. Va dos o tres selmanes grupos de rock metaleru xuntaben les sos guitarres y voces n’alcordanza de la revolución d’ochobre del 34, nel mercáu de ganáu de Mieres. Cualuquier comentariu que yo ficiera llama al chiste fácil. Déxolo, pues, a cada ún.

Lo qu’ocurre coles industries citaes –musical y audiovisual-, déxase ver tamién notros paisaxes industriales. El paisaxe editorial, por exemplu, caracterízase pola presencia de grandes tresnacionales y de dellos grupos de la insustria del entretenimientu. Refiérome al grupu alemán Bertelsmann, a los consorcios Time Arner, Paramount-Dimon and Schuster y Randon House, nos Estaos Uníos. O a los grupos españoles Anaya y Santialla, con una enorme presencia nel mercáu llatinoamericanu nel que fuieron tomando posiciones a base d’adquirir empreses menores locales.

La concentración del negociu editorial traducióse en filiales d’estos grupos, que si bien en cada país tienen una cierta autonomía en términos d’edición, al mesmu tiempu tan ferreamente controlaes pola casa matriz, que-yos desixe una alta rentabilidá. Poro, vense obligaes a publicar llibros que tienen un públicu aseguráu, a guiase por criterios estrictamente mercantiles y pol parámetru de los best sellers, evitando riesgos y dexando a un llau la tradicional misión cultural de los editores.

Y ello, nun momentu nel que’l mundu de la edición se ximielga: la llegada del llibru dixital pue suponer, según los espertos, un impactu idénticu al que produciera na música. Tamos nel añu nel que les principales marques tan posicionando los sos productos nel mercáu. La espectativa yá nos la tienen creada.

Les empreses de fuerte implantación local que nun se ten posicionando al rewspectu nesti mesmu momentu van a tener escases posibilidaes de futuru. Van siguir esistiendo, ensin dulda. Pero’l so productu va tener la caducidá de la casete que fuimos viéndola pasu ente pasu desaparecer, quedando de mano reducida a un ambitu d’edá y, por último, a puntos de distribución marxinal.

Esti fenómenu va revestir especial significación pa les xeneraciones moces, pa los creadores locales y en llingües minorizaes o pa los que s’espresen en xéneros lliterarios non comerciales, como la poesía o l’ensayu filosóficu.

Equí la necesidá de la esistencia d’eses polítiques locales de fomentu sosteníu nel tiempu. Polítiques que fortalezan les industries culturales locales dende una perspectiva de crecimientu y desarrollu.

III

Les industries culturales non solo tienen de contemplase como un importante sector de la economía globalizada; son tamién industries de la conciencia –asina nomaes por Hans Magnus Enzensberger. El crecimientu constante d’estes industries implica una importancia cada vez más grande de la cultura de mases, del best seller o de los great successes, d’aquello que tien un llugar aseguráu nel mercáu y qu’obedez con frecuencia a fórmules predixeríes, en menoscabu de la creatividá y del riesgu.

Cualuquier diagnósticu serenu vien a almitir que nel escenariu globalizáu la cultura artística o de calter alternativu tá en dificultaes. Nesti contextu, mesmo la palabra escrita vese amenzada pola preponderancia de la imaxen audiovisual, que siempre atrai a un mercáu más ampliu. Trátase d’una situación qu’en cierta midida emprobeznos culturalmente (dalgo que se constata cotidianamente nos informes emitíos poles instancies relacionaes col aprendizaxe que señalen que nos institutos y na Universidá cómo nes nueves xeneraciones fue deteriorándose cada vez más la destreza nel usu del llinguaxe y la capacidá espresiva).

De cierto, el mercáu ye un factor ineludible y les industries culturales tienen de consideralu. D’otra manera podríen dir a la quiebra. Agora bien, anque en delles circunstancies el mercáu puea contribuyir al desarrollu cultural, los productos artísticos nun tienen de midise únicamente en términos económicos nin quedar suxetos al llibre xuegu –qu’enxamás ye tan llibre- de la ufierta y la demanda. Pola cenciella razón de qu’hai necesidaes culturales que nun siempre s’espresen nel mercáu. En términos realistes, la clave tendría de ser buscar un equilibriu.

Pa que n’Asturies, n’España y, en xeneral, n’Europa, les industries culturales s’orienten según criterios de bien públicu y preservación de la diversidá cultural y estética, requierse la collaboración del Estáu, de les asociaciones profesionales, de la sociedá civil y del sector priváu, incluyendo por supuesto a les propies industries culturales.

Al Estáu correspuénde-y collechar información y da-y tratamientu estadísticu y diferencial a los estremaos epígrafes d’estes industries, pa qu’asina puean implementase polítiques realistes y bien fundaes. Compéte-y tamién un rol –xunto col sector priváu- nel desarrollu de la industria cultural local, incentivándola pa que combine l’interés priváu y el públicu, les demandes coles necesidaes, los beneficios económicos colos culturales.

En síntesis, l’Estáu tien de xenerar marcos llegales adecuaos pal desarrollu de determinaos sectores de les industries culturales y tienen d’establecese polítiques d’estímulu coherentes y sosteníes nel tiempu. L’actividá cinematográfica y la editorial revelen equí les necesidaes más urxentes, al delláu de tolos ámbitos relacionaos cola actividá musical.

Esti trabayu que compete a cada una de les alministraciones con poder d’exercer polítiques culturales tendría de vertese nun llibru blancu de les industries culturales. Podría almitise que, pal casu d’Asturies, un bocetu d’esti proyectu yá tá avanzáu. Por más que nun covenciera a nadie de los sectores implicaos. Por más que, d’un manual d’usu d’estes característiques necesitaríase una revisión añal.

A nadie-y sorprende que n’Asturies el desarrollu de les industries culturales seya mínimu, nun teniendo malapenes incidencia nos índices económicos nin habiendo una respuesta constatada del públicu –más que llimitada a sectores mui concretos y, polo xeneral, tamién mui reducíos.

Too ello en xunto, como parte d’una xeneralidá compartida con otres comunidaes autónomes. Lo que vien establecío pola esistencia de pequeñes sucursales del Ministeriu de Cultura, les Conseyeríes de Cultura, que busquen tener una presencia pública a través d’una serie d’actuaciones de polítiques culturales. Pa delles comunidaes más centráu’l trabayu en polítiques de dsarrollu de la identidá. Pa otres nuna suerte indefinida de cosmopolitismu o vanguardismu militante. Demientres la combinación de dambes polítiques sigue dando resultaos escelentes en delles otres, como la vasca, con especial incidencia nes artes plástiques.

Con una industria teatral en precario, una musical que nun ye más qu’a vivir dignamente nel ámbitu más tradicional –la canción asturiana, que cuenta con circuitu propiu, públicu especializáu y diferentes grados de profesionalización de los sos intérpretes-, una incipiente industria audiovisual mui centrada nel desarrollu de la televisión pública, una escena artística mui reducida y con mui escasa proyección fuera de les nuestres fronteres, y una industria editorial más dependiente de les subvenciones que pendiente de los índices de ventes y les campañes de marketing de productu… la situación d’Asturies raya la inesistencia.

IV

Les asociaciones profesionales vinculaes a les industries culturales y, en particular, a les relacionaes cola música, malapenes tienen en xeneral mayor influencia que la correspondiente a la SGAE y a la defensa de los derechos d’autor. Un presencia mui contestada a nivel de medios de comunicación y, poro, a nivel de público, pero cada día más importante económica y presencialmente. Esta mesma selmana vuelve a surdir nos medios un tema vinculáu: la SGAE pretende facer pagar un canon ente 6 y 12 € a un peluqueru por tener encesa la radio dientro de la peluquería n’hores de trabayu. Un gotéu que s’amesta a los pasaos del cobru al PSOE pola interpretación de la Internacional o al pueblu de Zalamea pola representación popular-turística de la obra de Calderón.

Otru tipu d’asociaciones profesionales curien más d’intereses sindicales y económicos de los sos trabayadores que del devenir de la industria cultural. El meyor de los exemplos n’Asturies dalu l’Asociación d’Intérpretes de la Canción Asturiana (AICA), con un trabayu más centráu na difución de la tonada a partir de la contratación de los sos intérpretes. Lo que nun dexa de ser un modelu de funcionamientu pa otros gremios profesionales de la música a los qu’acompaña una secular conciencia disgregadora.

Demientres que l’asociacionismu incide de manera positiva na actividá económica y cultural de comunidaes como la catalana, n’Asturies la so práctica ausencia fai que los escasos gremios asociaos nun tengan nengún pesu n’alministración nin na vida cotidiana. Un exemplu cercanu: los medios de comunicación malapenes recueyen que quexes de la programación de Laboral per parte del gremiu de directores teatrales, qu’acaba acallándose pol escasu pesu de los profesionales que se quexen, pola falta d’argumentos económicos y profesionales sobre los que sostener esta quexa y pola propia política d’oyíos sordos de l’alministración sobeyosa na so torre de marfil.

La propia asociación profesional de xestores técnicos de cultura, tan fuerte n’Extremadura como combativa en Navarra o resolutiva en Cataluña, lleva años n’Asturies con escasa presencia. Fechu qu’intenta salvar nestos últimos meses la fusión de les dos asociaciones esistentes.

Tamién a la sociedá civil correspuénde-y un rol fundamental no que cinca a les industries culturales, a los profesionales que trabayen nelles y a les polítiques culturales de les alministraciones. Más que nada, nesti últimu sentíu, exerciendo los sos derechos comunicativos y culturales y, tamién, presionando o trabayando en xunto colos otros axentes pa que les alministraciones cumplan el so papel regulador.

Si los cineastes, los trabayadores audiovisuales, los músicos, los artistes plásticos o los editores independientes nun se movilicen, ye mui posible que nun s’obtenga enxamás una política audiovisual, artística o editorial coles característiques señalaes.

En xeneral la España de les autonomíes nun tuvo polítiques públiques nestes arees en parte porque les polítiques culturales concentráronse en conservar el patrimoniu y promover les artes d’élite, desconociendo dafecho’l papel decisivu de les industries culturales na vida cotidiana y na creación d’identidá.

Agora bien, en cuanto a España, pa qu’estes aspiraciones se realicen ye mester atender de manera urxente les cuestiones vinculaes a la lliberalización del intercambiu comercial y al apoyu a polítiques que lu fomenten. En delles reuniones y foros internacionales, tanto europeos como llatinoamericanos, surdieron dos postures diferentes al respectu.

Per un llau, los Estaos Uníos dan siempre a entender que nun son partidarios d’escluyir la cultura de les negociaciones que busquen lliberalizar l’intercambiu. Ye dicir, optaron por nun reconocer nenguna excepcionalidá. Con esta posición defienden los sos intereses económicos, yá que se trata d’un sector que tien gran significación pa esti país. Dende esta perspectiva diba ser imposible, por exemplu, reservar cuotes de pantalla pa la producción audiovisual europea, dao qu’eso diba significar imponen un tratamientu discriminatoriu a les empreses foranes.

Pela so parte, Francia, Canadá y dellos países llatinoamericanos sostiuenen que la cultura exerce un rol en términos d’identidá y ciudadanía y que ye importante acceder a una amplia ufierta de productos y creaciones culturales. Pero que tien de tratase d’una ufierta na que les obres locales s’equilibren coles foranes.

Esta postura defende, asina, la idea de la excepcionalidá de la cultura, al señalar que’l llibre xuegu del mercáu nun ye quién a garantizar por él mesmu la diversidá.

Ente los dos estremos mencionaos, la posición de comunidaes como l’asturiana discurre ente ser una mera colonia a la que lleguen a exhibise los productos culturales más efímeros y cultistes, y un búscate la vida por ti mesmu como pueas que yá tendré tiempu asgaya a reivindicar la to asturianía nel momentu nel que seyas dalguién y tengas el reconocimientu de fuera.

Cuando, más que nada, el futuru llama a establecer aliances y buscar alcuerdos coles comunidaes del entornu nacional y foranu que permitan eliminar los enzancos y xenerar un ampliu intercambiu de bienes y servicios culturales. Dada la importancia creciente de les industries culturales de les que –pa bien o pa mal- depende’l paisaxe contemporaneu de les polítiques públiques, pa qu’estes contribuyan a establecer la equidá y la diversidá.