El folk morrió, ¡viva'l folk!

2009 / 10 / 16 - Les Noticies

Comentábasmoslo a la salida del conciertu homenaxe a Tomás de la Güeria. Auditoriu Teodoro Cuesta de Mieres. Domingu 4 d’ohobre de 2009. Ente les siete y les ocho y media de la tarde. Trescientes persones sentaes. Ciento cincuenta de pie. Y más de cien que nun pudieron entrar. Dexó constancia de lo que digo la TPA. El programa emítese, si nun hai cambios de programación, el domingu 17 a les 21:30 h. En prime time. El testimoniu de dalgo irrepetible. El documentu en directo de los sones que sentimos el día nel que morrió la música folk.

Pol escenariu pasaron músicos de los Gatos del Fornu, Verdasca, La Curuxa, Herbamora, Tejedor, Patriban Folk Orl.lestra, La Bandina, Felpeyu y Tuenda. Non les formaciones al completu. Non la so manera de facer música. Sinon dellos de los principales músicos, alredor d’un instrumentu como l’acurdión. Alredor de los sones de Tomás de la Güeria. Alredor de la música asturiana.

Tomás Zapico nun llegó a tiempu pa ser partícipe de la revolución qu’entamaba. Él namás tocaba l’acurdión vieya. Cantares como “Soi de Llangréu” o “Pastor que tas enel monte”. Bailles como “Lo suelto” o “La l.lixera”. Pieces asturianizaes como una “Jota vasca” a la que yá nun-y queda nada de tolo vasco que pudo tener dalguna vez o “En la provincia de Soria”, que nun recuerda nin los páramos de Soria nin los sones de Castilla.

Nun llegó a tiempu pero, onde quiera que tea, tien de tar esgargayándose. N’homenaxe a él taben los principales d’aquellos músicos que tocaban unos ritmos foriatos con unes melodías aburríes y repetitives que tantu lu cansaben y que nun yera a entender. Como tola xente de la so quinta que tola vida ficiera música asturiana. Y aquello que veníen sintiendo tanto tiempu nun lo yera. Como la xente de les quintes anteriores y de les que fueron naciendo. Aquello-yos siguió sonando a música de cualaquier parte menos d’onde tenía de ser. Seguramente world music. ¿Música del mundu? ¿De qué mundu? D’esti, del que nos tocó vivir, del que tá xunto a casa, non.

Agora, aquellos mesmos músicos, tocaben música asturiana. Cola disculpa de que yera la música d’él. Que yera mentira. La música d’él siempre fuera la música asturiana. Lo qu’aquellos grandes músicos de los grupos folk taben faciendo, cenciellamente, yera tocar música asturiana. La muñeira, muñeira. El saltón, saltón. Ensin necesidá de parecer una giga. Ensin tener por qué ser un reel. Lo suelto, suelto, ensin recordar pa nada un rock and roll.

Y, ante la sorpresa xeneral, el públicu aplaudía. Y facíalo con ganes. Xente vieyo y xente bien mozo. De toles edaes. Nun conciertu que comenzó entrañable y terminó máxicu. Dalgo qu’enxamás se consiguiera nuna nueche folk. Aquel nun yera sitiu pa pegar blincos y baillar a lo hippie. De baillar fadríase cuando a lo suelto y cuando a lo agarrao. Pero, porque lo pidía’l son. Nun había marcha. Nin corriera’l fumu reparador nin l’alcohol amigable. Había feeling.

L’acurdión sirvió de filu conductor hacia esa catarsis. Hubo más instrumentos. Acompañantes. Y voces. Acompañantes. L’acurdión abastábase pa reflexar el sentimientu collectivu. Rendise ante la música de Tomás. Ante la música asturiana. Ponese al serviciu d’esa música tan estraña que ye la propia.

En resumen, resultó a ser un programa d’hora y media de Camín de cantares. Xosé Ambás conducíalu. Presentaba, como siempre fai, a vieyes glories pa les que nunca naide atendiera y qu’atesoraben un secretu: sabíen tocar música asturiana. Ellí taben, riba l’escenariu, los Tomases de la les Güeries del futuru. Absolutos desconocíos pal gran públicu qu’amosaben el so arte. Ensin complexos. Ensin concesiones.

Y, como ocurriera en Camín de cantares y tanto nos sorprendiera siempre, gustaba. Tenía’l reconocimientu del so públicu natural. La meyor manera de consiguir el reconocimientu del públicu ayenu. Profetes, a la postre, na so propia tierra.

Pero, per enriba de too ello, había dalgo más. Dalgo que facía qu’aquello nun fuera Camín de cantares. Intervenían instrumentistes con mediu sieglu menos de vida de media que l’homenaxeáu. Xente que lleva bien d’años tocando y xente bien nuevo. Xente que conoz los recursos del so instrumentu y que ponía estos conocimientos al serviciu de la música asturiana.

NOTA ADICIONAL: Cuando d’apagaron les lluces, quedamos a la entrada del Auditoriu Teodoro Cuesta Anabel Santiago, Xosé Ambás y yo. Facíennos una entrevista pa la revista BiblioAsturias. Falamos, como nun podía ser menos, d’esta especie d’éxtasis collectivu del que veníamos de participar. Los nuestros comentarios al respectu van quedar reflexaos nella. Teníamos coses que dicir. Llevábamos munchu tiempu con ganes de diciles. Surdíennos tamién munchos interrogantes. Dalgunos bien elementales: ¿Cuánta xente de la presente supo que taba asistiendo a un día únicu? ¿Cuántos supieron que yeren partícipes d’una revolución? ¿A cuántos-yos ocurriría como a Saulo camín de Tarso?

Fízonos la entrevista nel momentu propiciu. Conscientes d’asistir a la cayida d’una monarquía. Gritábamos a la francesa: Le Roi est mort, vive le Roi!