Somos un grupu chavales...
2009 / 10 / 09 - Les Noticies
José Fernández García, Tordín de Frieres, va recibir un homenaxe el vienres 16 d’ochobre que vien nel Nuevu Teatru de La Felguera. Un alcuentru d’alredor d’una docena de cantadores de tonada, un monologuista y cuatro formaciones corales, nel que tamién va participar el propiu homenaxeáu xunto al so ñetu, Javier Mejuto.
El Tordín de Frieres naciera en Ciañu, Llangréu, el 25 de xunetu de 1922 y pertenez por ello a la primer xeneración de grandes voces que tomó’l relevu a la integrada polos que güei consideramos clásicos. Y non solo tomó’l relevu sinon que vien de veces compartió con ellos escenarios. Una época difícil, la de la inmediata posguerra, na que surdieron nomes agora imprescindibles dientro de la pequeña hestoria de la canción asturiana.
Esta xeneración de posguerra pue dixebrase en dos momentos: la qu’accedió a los escenarios na década de los cuarenta y la que lo fizo a partir de la de los cincuenta. De la primera tenemos voces de muyer tan insustituibles como les de Josefina Fernández, Leonidas Fernández, Obdulia González o Diamantina Rodríguez. Y tamién d’homes como Severino García (esposu d’Obdulia), Ceferino Rodríguez “El Ferrolanu”, Arsenio Fernández “El Polenchu”, Luis Rodríguez “El Ruiseñor de Carreño”, José Ramón Morán, José Requejo, Juan Antonio Remis “El Teyeru”, Silvino Argüelles o José Noriega. Nel segundu momentu d’esta xeneración ye nel que s’inscribe directo’l Tordín de Frieres. Xunto con nomes de la sonadía de los integrantes del Cuarteto Vocal Asturiano (Morán, Godo, Currín y Farina), Orestes Menéndez, Aníbal Menéndez, Modesto González “El Maízu”, Marcelina Cuesta “La Nachón”, Laudelino Alonso “El de Los Pontones”, Celestino Rubiera, José Manuel González “Xilguerín”, Fidel Díaz, José Suárez “El Quexanu”, Gerardo Orviz, Marcelino Fernández “Tarín” o Ildefonso Fernández “Fonso Campeta”.
Como bien d’otros cantadores de tonada del tiempu, vivió dientro de la so familia l’ambiente de la tonada. Tamién, dende bien neñu, sintió cantar polos chigres, otra de les verdaderes escueles de tonada del momentu, y acabó echando nellos los sos primeros cantares.
Como la gran mayoría de la xente de la so xeneración, entamó la participación nos concursos a mediaos de la década de los cincuenta. Tres d’un segundu premiu nel concursu del diariu Región, obtuvo dellos otros importantes como’l primeru de Mieres, dientro del programa Salto a la fama, del Teatru Capitol, y el primeru tamién de Radio Uviéu. Como parte d’esti premiu, viaxa a Inglaterra, onde actúa en dellos llugares.
El gran éxitu de les sos intervenciones en concursos llévalu a formar parte de la Compañía de Campeones de Canción Asturiana “Asturias Canta”, xunto a otres grandes voces del tiempu, como José Noriega, Margarita Blanco, Tarín de Sotrondio, Agustín Argüelles, Fidel de la Güeria o Ataulfo Lada Camblor. Un modelu de formación que tendrá una llarga vida y que llevará les sos actuaciones per tolos requexos d’Asturies y bien d’ellos d’España.
Esi éxitu nos escenarios llévalu igualmente a grabar cerca d’un centenar de tonaes, munches d’elles de propia autoría, como la conocida “Al Sporting de Xixón” (qu’empieza diciendo “Somos un grupu chavales…”) o la dedicada “Al doctor Rodríguez de la Fuente”. Teniendo tamién grabaes les sos personales versiones de pieces clásiques como “Adiós la mio vaca pinta”, “María si vas al horru”, “Oigo sonar una gaita” o “El primer besu que di”. La so sonadía nos años sesenta algamó la de les más grandes figures de los años anteriores. Mesmo, Televisión Española grabólu saliendo de la mina y cantando una tonada, nuna imaxen que sigue presente na memoria de los aficionaos del mundu de la tonada.
El Tordín de Frieres imprimió’l so sellu a la mayor parte de les interpretaciones que fizo. Fue un innovador, non solo pol fechu de crear tonaes nueves, sinon tamién pol acompañamientu de guitarra en munches d’elles (dalgo que nun yera nada frecuente, por más que se viera n’interpretaciones d’El Presi o de Josefina Fernández), por más que la mayor parte de les grabaes lo ficiera a la gaita acompañáu pol Gaiteru Veriña.
Lleva bien d’años prácticamente retiráu de les actuaciones, pero’l so nome sigue contando ente los grandes del xéneru. Asina, esti vienres 16 d’ochobre, nel escenariu del Nuevu Teatru de La Felguera va tenese la posibilidá de sentir otra vuelta a una gran voz y, de paso, pasar una bona tarde de canción asturiana.