El circuitu

2009 / 09 / 11 - Les Noticies

El branu sirve pa tastar esperiencies d’otres partes. Del intercambiu d’opiniones a la vuelta surden siempre ganes de facer dalgo diferente. O d’afianzar proyectos yá entamaos y necesitaos d’otra vuelta de tuerca.

A primeros d’esti añu percorriera dellos llugares d’Alemaña, Italia, Francia y delles comunidaes españoles, como Castilla, Madrid y Valencia. Idéntica vuelta na qu’agora n’agostu volví aporfiar (saltándome Italia, que yá nun tenía nin cuerpu nin espíritu p’aguantar más la desorganización premeditada d’esi país gobernáu por Berlusconi). De mano, por contrastar les notes de la primera vuelta. Tamién, como non, por ver coses nueves nos mesmos llugares.

Intercambio les mios notes con compañeros que tuvieran notres partes de Francia, n’Irlanda del sur y del norte, n’Escocia y Portugal. Como tamién en comunidaes cercanes, como Navarra y Andalucía. El tema planteáu vien d’antiguo: l’absoluta necesidá d’un circuitu dende’l que fidelizar un públicu, afianzar un mercáu que posibilite la diversificación de productos (conciertos, grabaciones, llibros…) y sentar les bases d’una viabilidá económica de la profesión de músicu que permita ciertos grados de profesionalización y semiprofesionalización.

Bien de veces un exemplu desastrosu de funcionamiento sirve tanto como ún dafecho positivu. Valencia ye esi exemplu negativu perfectu. Esti mes pasáu axuntábase’l collectivu Ovidi Montlor nun conciertu reivindicador de la música valenciana y de la completa necesidá de la esistencia d’un circuitu. Por más qu’interveníen nel alcuentru les voces y músicos más representivos del panorama valencianu, malapenes fueron quién a atropar dos millares de persones.

En Valencia, como en tantes otres comunidaes españoles –ente elles la nuestra en bona medida-, los ayuntamientos democráticos acabaron col mercáu (echando una mano les conseyeríes y el propiu ministerio de cultura). Cola mesma intensidá cola que les descargues d’internet acabaron col productu (como bien económicu). El mercáu dexa d’esistir ante’l gratis total. Lo que nun tien preciu nun tien valor –recuerda una vieya regla de marketing de productu-: los conciertos gratuitos nes fiestas patronales y nes cases de cultura y auditorios municipales acabaron por devalorizar el fechu musical. P’acabar contratando namás lo que funciona al nivel más popular: el pop más cuarentaprincipaleru y la zarzuela más castiza. Que, nel fondo, nun dexen de ser el mesmu xéneru musical: el preferíu del votante fácil de contentar pol que tanto pruyen los políticos.

La falta d’esti circuitu en Valéncia evidénciase más qu’en ninguna otra parte na música más tradicional. A diferencia d’Asturies, onde la canción asturiana cuenta con un circuitu bastante afitáu de concursos, muestres, festivales, memoriales… que percuerre tola xeografía, el cant d’estil valenciá –la tonada propia d’esa tierra- tá a puntu desaparecer. Ente bien d’otres razones, pola falta d’un circuitu que llevó a la pérdida del públicu, del mercáu y de los productos relacionaos.

El circuitu navarru –dalgo estancáu esta última temporada-, l’escocés y l’irlandés, muestren otres posibilidaes d’afrontar la so organización. El casu navarru tien una descomanada dependencia institucional (Fundación Príncipe de Viana) y una obligada tendencia al gratis total tan políticamente correcto y tan desastroso dende’l puntu vista del mercáu. El casu irlandés –por más que nun tá siendo capaz de salvar el sean-nós, el so particular xéneru de tonada- amuesa un modelu interesante pal desarrollu del folk en formatu reducíu.

Tornamos a casa. La propuesta de desarrollu d’un circuitu de cara al futuru pasa por escaecese en bona midida de los ayuntamientos y de la nuestra particular Fundación Príncipe de Viana, equí llamada Conseyería de Cultura. Como tamién pasa de la monótona, y tamién gratis total, programación d’entidaes del tipu de la Obra Cultural de CaxAstur.

El circuitu, nel casu asturianu, como nel d’otros exemplos nacionales, rexonales o comarcales, tien de surdir de la organización d’una rede estable ente les escases iniciatives privaes qu’esisten. A partir de la propia esistencia y de la so estabilidá ye cuando se puen empezar a plantear collaboraciones coles instituciones. Enxamás enantes. Pa que nun vuelva a dase la posibilidá d’acabar otra vuelta con él mediante subvenciones y l’apuesta política pol gratis total.

Esti añu tendré más vueltes de volver a falar de circuitu. Amestando otres esperiencies. Buenes y males, que toes sirven.