Les meyores voces del añu 2009
2009 / 09 / 04 - Les Noticies
Un añu más acaben de fallase los premios del Memorial Silvino Argüelles que distinguen a los diez meyores cantadores de tonada del momentu y al meyor gaiteru acompañante de tonada. Un bon baremu pa saber la situación actual del xéneru, pa tar al corriente de quién siguen siendo les grandes voces del tiempu y pa comprobar, atendiendo al tantu por ciento de voces moces, la vitalidá de l’asturianada.
Tres de les votaciones de los diez miembros del Xuráu qu’intervinieron nesta edición, los resultaos nun depararon munches sorpreses. Como meyores voces del añu salieron les siguientes: Sergio Agüeros, Lorena Corripio, Rosario González, José Manuel Robledo, Celestino Rozada, María Sánchez, Anabel Santiago, Rogelio Suárez, Jorge Tuya y Marisa Valle Roso. Como meyor gaiteru acompañante de tonada resultó votáu, por segundu añu consecutivu, Berto Varillas.
Xeneracionalmente, el resultáu ye claru. Rosario González, nel apartáu femenín, ye la única representante de la xeneración que rolda los cincuenta años, xunto a Jorge Tuya, Rogelio Suárez y José Manuel Robledo. Una xeneración que s’alcuentra nun momentu espléndidu de voz y que tovía va dar muncho que falar.
La xeneración qu’anda pela trentena, averándose a ella o yá dalgo más distanciada, sigue siendo la que cuenta con más voces importantes. Ye’l casu de Sergio Agüeros y Celestino Rozada, pa los homes, y Lorena Corripio, María Sánchez y Anabel Santiago, pa les muyeres.
Como representante de la xeneración más moza, la que malapenes cuenta con venti años, tenemos a Marisa Valle Roso. Nesti añu nun momentu tan magníficu como pa resultar campeona de los concursos de canción asturiana de L’Entregu, Amieva, Xixón y el Cuenca del Caudal de Mieres, amás d’algamar el segundu premiu de los concursos d’Uviéu y d’Avilés, nel primeru de los casos per detrás de Rosario González y, nel segundu, de María Sánchez.
Jorge Tuya fizo tripele de concursos esti añu. Nesti casu ganado tolos celebraos nes cuenques mineres: el de L’Entregu, el de La Nueva y el Cuenca del Caudal de Mieres. Asina como quedando segundu nel d’Uviéu, per detrás de Celestino Rozada, y terceru n’Amieva, nel que tamién quedara primeru Celestino Rozada y, segundu, José Manuel Robledo.
Como pue comprobase la otra gran estrella del momentu ye’l citáu Celestino Rozada, ganador de los concursos d’Uviéu y Amieva, y segundu nel d’Avilés, per detrás de José Manuel Robledo, y terceru nel de Xixón, que ganara tamién José Manuel Robledo y quedara segundu Juanjo Martínez.
Como tamién, pasa por un bon momentu y consigue facer doblete de concursos, José Manuel Robledo, más conocíu como Lolo’l de Cabranes, cola victoria nos concursos de Xixón y Avilés, y una segunda plaza nel d’Amieva, per detrás, como indicara anteriormente, de Celestino Rozada.
Alviértese, asina, que los premios del Memorial Silvino Argüelles concuerden enforma cola situación del ranking nos últimos concursos. Por más que, atendiendo a ellos, una serie de voces quedó fuera de los premios, como-y ocurre a Bibiana Sánchez, otra representante de la xeneración moza y que consiguió un primer premiu nel de La Nueva y un terceru nel Cuenca del Caudal de Mieres.
Ensin ningún primer premiu nesta ocasión, la voz de Lorena Corripio sigue tando ente les primeres en bien de concursos, como se comprueba col segundu premiu de Xixón y los terceros d’Avilés, Amieva, L’Entregu y La Nueva. Dalgo que tamién-y ocurre a Sergio Agüeros que namás algamara un tercer premiu esti añu nel concursu d’Uviéu.
El casu d’Anabel Santiago ye bien particular al llevar dos años que malapenes se presenta a concursos y que nesta edición algamó un segundu premiu n’Amieva, l’únicu al qu’accedió, y que ganara Marisa Valle.
Tamién ye interesante la regularidá que caltién María Sánchez, tamién conocida como La Pastorina del Cares, qu’arriendes d’upase col primer premiu n’Avilés, quedara segunda nos concursos de L’Entregu, La Nueva y el Cuenca del Caudal de Mieres, y fuera tercera nel d’Uviéu.
En resumen, nes siete ediciones del Memorial Silvino Argüelles, recibieron premiu, revalidándolu añu tres d’añu, namás que tres cantadores: Rosario Gonzáles, Anabel Santiago y Jorge Tuya. Un verdaderu tríu d’ases. Al que se tien d’amestar Sergio Agüeros que lu ganara en seis de les sietre ocasiones.
El Memorial Silvino Argüelles vuelve a convertise, asina, na referencia del fin de cursu del añu nel ámbitu de la tonada. La gala d’entrega d’estos premios tendrá llugar el 26 de septiembre nel Auditoriu Teodoro Cuesta de Mieres y será retresmitida al día siguiente pola TPA, como yá ocurriera nes dos ediciones pasaes, nes que s’algamó una audiencia superior a los sesenta mil espectadores de media.
El gaiteru oficial de la gala volverá a ser Berto Varillas que, con tres galardones Silvino Argüelles, encabeza la clasificación de nominaos, acompañándolu nella El Pravianu, con dos, Óscar Fernández, con otres dos, y Jorge Areces, con una.