Lo que va del añu

2009 / 07 / 31 - Les Noticies

El branu significa un paréntesis. Yá lo yera nel tiempu nel que s’acumulaba la más grande cantidá de trabayu, yá fuera ne yerba como na braña como na costera del bonitu. Agora con más razón cuando bien a ser el momentu d’aselar pa garrar fuerces coles qu’entamar nuevos proyectos. Les Noticies garra vacaciones y ye tiempu d’echar la vista atrás –al atrás más cercanu- pa ser quién a mirar hacia alantre con ganes renovaes. Y ye que, dende l’últimu branu hasta agora mesmo, hai bien de razones pa facelo.

Les principales novedaes siguimos teniéndoles nel ámbitu de la canción asturiana. Falara poques selmanes atrás de dellos discos importantes de reciente aparición. Teitos, de José Manuel Collado, una voz clásica contemporanea con bien de ganes de siguir amosando lo que ye quién a facer. Como tamién Al entamar, de Silvia Suárez, una voz enforma menos conocida pero que representa a toa esa montonera de xente que, ensin necesidá d’un hestorial de grandes premios, sabe constuyir una personalidá dientro d’esti tarrén. O como l’exemplu de Al pie del Cuera, de Celestino Rozada, el prototipu de lo que da de sí’l relevu xeneracional dientro del ámbitu de la tonada masculina, un pasu que quedaba por dar depués de lo que se venía viendo dende va años nel campu de la tonada fememina. O la Ronda Asturiana, de Salvador Vázquez, que buscaba un llugar pa la tonada ayerana, un xéneru que sigue detrás d’un reconocimientu que los años-y vien denegando.

Al delláu d’otros trabayos, como’l de Un pasu más, de los Hermanos Valle Roso. El meyor exemplu de lo que pue ser un futuru pa esti xéneru, de la mano de xente que malapenes vien de cumplir los venti años y que tien ganes de siguir faciendo coses diferentes nos años vinientes. Un camín que van a siguir bien de voces de la so xeneración y qu’augura les meyores perspectives de futuru pa esti xéneru, l’únicu dientro de la música asturiana d’anguañu que supo conservar el so públicu, mantener vivu un mercáu y estructurar un circuitu de conciertos y concursos sobre’l que ordenar una continuidá a lo llargo de tol añu.

Un añu que nos tien deparaes tan guapes sorpreses como’l discu dedicáu a Bob Dylan por Toli Morilla o’l versionador de poetes asturianos por Alfredo González, qu’algamó’l premiu al meyor cantar asturianu nesta última edición. Como l’añu nel que Michael Lee Wolfe cumple venticinco trabayando con diferentes grupos y músicos asturianos y lo celebra con un discu antolóxicu dedicáu esclusivamente a les xotes que tien grabaes a lo llargo de tou esti tiempu.

Un añu nel que Vicente Díaz vien d’editar siete mil copies del so últimu trabayu, Montes Cantábricos. D’editalos y de vendelos. En tiempos de crisis. Un mal exemplu pa toos aquellos que nun venden una nada y que siguen pensando que nun ye bon momentu pa la música que tan faciendo –ensin parase a pensar que la xente sabe perfectamente qué ye lo que compra y por qué lo compra.

Tamién hubo guapes novedaes nel ámbitu del folk, como lo demuestren los segundos trabayos de DRD, Celia González, de Tuenda y d’Héctor Braga. Esti últimu impresionante polo que tien d’averamientu ente dos mundos tan averaos y allonxaos a la vez, como son la tonada y el folk. Un esfuerzu tremendu depués del mal rollu que significó la denuncia que tuviera’l trabayu anterior y que bien a revelar bien a les clares que detrás d’esti esfuerzu hai una gran cantidá d’idees y la capacidá d’una voz y de les manes d’un gran músicu pa defendeles.

Los trabayos de DRD, Celia y Tuenda ponen al día un repertoriu magníficu y defiéndelu nel directo, d’igual manera qu’Héctor Braga, con un resultáu escelente. Por una razón simple: los oyentes siéntense reconocíos nesi repertoriu. La importancia de la voz nesti resultáu final ye importante. Detrás de toos ellos alviértense un importante esfuerzu de campu y una llarga trayectoria.

Con too, nun dexa d’alvertise que se tá nun añu de crisis y que los conciertos en directo disminuyeron de manera alarmante. Sigue ensin esistir un circuitu organizáu, más allá del que tienen como propiu los cantadores de tonada. La desaparición de programes como l’Asturies Musical, de la Conseyería de Cultura, sigue afectando directamente a les programacionaes de los ayuntamientos.

A pesar de too ello, el resume del añu nun dexa de ser positivu. A la espera de los nuevos trabayos que van ver la lluz col apoyu del programa de subvenciones de la citada Conseyería a la edición n’asturianu y tamién d’aquellos otros que salen alantre ensin nengún tipu de subvención. Y que, en xunto, sigue amosando la importancia que sigue teniendo la producción musical asturiana, más allá de lo que, al respectu, acabó asoleyando’l Llibru Blancu de les Industries Culturales y que yá evidenciaba suficientemente, como yá comenté notru momentu, que se trataba d’un trabayu que nun se sostenía na realidá de la que pretendía dar cuenta.