La música que s'estudia y nun s'aprende

2009 / 07 / 17 - Les Noticies

Tener fíos n’edá escolar valme pa conocer de primera mano non solo’l nivel de los llibros que s’empleen la enseñanza sinon tamién el de los profesores qu’imparten l’asignatura. El primeru ye deplorable. El segundu dexa enforma que desear.

Examen de la última evaluación de segundu de la ESO: los compositores de bandes sonores a lo llargo del sieglu XX. Dende’l Acorazado Potenkin hasta Gladiator. Una llarga montonera de títulos de películes y, al delláu, la correspondiente de compositores. Encuadraos en décades y en movimientos. Ellí tá lo más de lo más de cien años d’hermanamientu ente’l cine y la música. Nun falta El puente sobre el río Kwai que toos siblamos dalguna vuelta, como tampoco West side story que tovía entonamos y baillamos.

Pero tamos falando d’alumnos de segundu de la ESO. Edaes que van ente los trece y los catorce años. Mui pocos años de vida y munchos menos de bagaxe cultural musical. Estudien películes que nun vieron xunto con músiques qu’enxamás sintieron de compositores de los que nada sintieron falar. En clase nun se vieron les películes. Tampoco se sintieron les músiques. Nada se-yos dixo de los autores, más allá de lo evidente de componer lo que compusieron.

El restu del añu la cosa fue asemeyada. Nún de los exámenes entró la música de jazz. Tampoco sintieron nengún tema. Manos marcaron nengún ritmu. Si acasu vieron les semeyes qu’aparecíen na llección nel llibru. Munchos negros de los que nada sabíen y de los que nada diben siguir sabiendo. Acaba morrer Michael Jackson y nun tienen siquiera edá pa saber qué yera lo qu’esti rapaz cantaba. El tiempu de vida d’ellos ye tan reducíu que cuando nacieron yá Michael Jackson pintaba poco na hestoria de la música pop.

Tamién estudiaron, mui al empiezu del añu, el nacionalismu musical. Dieron a Rimsky-Korsakov. Estudiaron que compuso dalgo titulao Capricho español. Pero nun lo sintieron. Como tampoco’l Kalevala de Sibelius. Nin muncho menos Rodeo de Copland. Nin siquiera dieron que delles de les principales aportaciones d’esti autor a la músicu llegaron de la mano de los sos escritos, como nel llibru tituláu Cómo escuchar música, editáu en 1939, pero que tendría de ser de llectura obligada pa tolos profesores de música d’esti país. Por ver si aprendíen dalgo. Al menos los más elemental: que la música s’aprende sintiéndola.

Asina les coses, cuéntame un profesor de música qu’alvierte nos críos de la ESO un absolutu desconocimientu de lo más elemental en música: el repertoriu más popular. Esa serie de cantares que formen parte de la memoria collectiva de tou pueblu. Esi conxuntu de temes que, nel nuestru casu, tá integráu por “Villaviciosa hermosa”, “Chalaneru”, “Soi de Verdiciu”, “A la mar fui por naranjas”, “Fui al Cristu y namoréme”, “En el campu nacen flores”, “Fuisti al Carmín de La Pola”, “La Virxen de Covadonga”, “En Uviéu nun me caso”, “Oigo sona una gaita”, “Si vas a la rtomería”, “Santa Bárbara bendita”, “Adiós con el corazón”… y hasta la mesma “Asturies patria querida”.

Lo que vien a siginficar que, amás de la pésima planificación musical na ESO y nel bachiller, la EXB nun da una base de nada. Rompióse la correa de tresmisión nes families, nes reuniones d’amigos y nos chigres de tola vida nos que siempre se cantó, y la nueva xeneración nun tien más acervu popular que’l de los cantares d’Amaral y de Shakira.

Eso sí, dan flauta. Partitures d’una elementalidá que se correspuende perfectamente col nivel xeneral de la enseñanza musical. Con especial procuru a que nun apareza nengún solu tema tradicional asturianu. Dalguna jota castellana o una siguidiya manchega, al delláu de lo políticamente correcto d’un cantar en vascu, otru en gallegu y otru en catalán.

En música too ye válido. Dende’l “Yo tengo un tío en América” hasta’l Fandagu de Pendueles (del que parte un movimientu del Capricho español). Pero siempre que la música entre polos oyíos. El resto, la paya, cuando nun ye más que paya, nun sirve más que p’alimentar a lo burros. Nesti casu, p’alimentar a toa una xeneración d’analfabetos musicales potenciales. Que tien de ser frutu, amás de la evidente falta de profesionalidá de bona parte del profesoráu qu’imparte la materia, de l’absoluta desidia de los planes d’educación pa con una asignatura que sigue siendo una “maría” dende los tiempos nos que yo facía como qu’estudiaba.

Y una xeneración entera de burros alimentaos a paya va dar como resultáu una cabaña ganadera impagable como p’afrontar el sieglu XXI. Desconocer la música propia ye un pasu más nel avance del desconocimientu de la llingua propia, na que va cantada esa música, y del desconocmientu de la cultura propia, na que la música ye la banda sonora de la vida.

Si, a esto, amestámos-y el desconocimientu de la hestoria de la música en xeneral y la nulidá pa lleer un simple pentagrama, la xeneración que nos vien d’amaralinos y shakirines pue ser dafecho terrible. Arriendes d’embrutecedora.