Tonaes brañegues

2009 / 07 / 10 - Les Noticies

Falara selmanes atrás del nuevu CD de José Manuel Collado. Baxo’l títulu de Teitos, reivindica la tierra de la so madre, a él que tanto-y presta recordar el so nomatu d’El Llaniscu. A él, como non tamién, que tantos de los que lu conocemos lu tenemos asociáu de siempre al Valle del Nalón. En fin, Teitos recuérdanos a los que nos presta la canción asturiana qu’esiste una xeneración con bien de coses entá por dicir y que da la sensación que bien de xente cuida que yá lo teníen too dicho. Yo’l primeru. De tanto aporfiar na esistencia d’una nueva xeneración que pide pasu y que bien rompiendo esquemes, escaezo d’avezu a la xente que, al delláu de la reconocida Mariluz Cristobal Caunedo, fizo’l tránsitu de los difíciles años ochenta y noventa del sieglu pasáu. Xente como José Manuel Collado que, como amuesa nesti trabayu, aporta al 2009 nun momentu espléndidu de facultaes.

Con bien d’años menos, y representando a una xeneración intermedia ente la mocedá y la quinta de los Jorge Tuya, Che de Cabaños, Chucha de Nembra o Ismael Tomás, tenemos reciente tamién la grabación de Silvia Suárez y de Celestino Rozada. Los dos CD’s, como l’anterior, cola Fonográfica Asturiana.

De Silvia Suárez ye Al entamar, un trabayu diferente nel qu’esta cantadora de tonada tien l’aquel d’enseñar otres facetes del so llabor: cantares de a la pandereta, cantares de boda o romances; arriendes d’una bona riestra de tonaes, poco corrientes del repertoriu de concursos: “Tres arbolitos planté”, “Los corales que me disti”, “Onde hai fabes hai maíz” o poinchñeme con una espina”. Xunto a otres de lletra propia, como “Mio güelu fue mineru” o “Nun me quies porque soi roxa”, o de la so maestra Josefina Argüelles, “Cada vez que vengo a Oviedo”.

Un CD como Al entamar descubre a bien de xente, cantadores ente ellos, les enormes posibilidaes de facer delles coses diferentes coles idees clares. Ensin dicir con ello que’l trabayu tea bien o mal. Cenciellmente, Silvia Suárez tenía gana de facer dalgo propio y esti CD ye la so carta de presentación.

El del reciente campeón del concursu de Xixón, d’Uviéu y d’Amieva, Celestino Rozada, titúlase Al pie del Cuera. Una voz como la d’él, con un rexistru vocal ampliu, que relluz nes notes agudes y nes graves y que namás necesita un poco más de seguridá nes sos interpretaciones en directo, consigue facenos ver nesta grabación la grandeza de la so voz. Quiciás poor nun sentir nella la tensión propia del concursu, la soledá del escenariu, la dureza d’enfrentase solu delantre d’un públicu espectante cola única arma de la so voz.

Celestino Rozada gusta de les clásiques. Yá dexara constancia d’ello na anterior grabación y agora vuelve amosalo en pieces como “Playina la de Xixón”, “L’aire m’apagó la vela” o “Toca la gaita, gaiteru”. La foto interior del discu xunta Javier d’Arroes corrobora que cuenta con bonos maestros pa sostener esti gustu pol repertoriu más clásicu. Amás de tener voz asgaya pa defendelu.

Y pa finar esta esfueya de grabaciones de canción asturiana acabantes d’aparecer y que resulten magnífiques pa sentir nesti tiempu de branu, quédame falar de Ronda Asturiana de Salvador Vázquez. Un CD del que nun conozo nin fecha de grabaciçón nin d’edición, porque cencillamente nun aparecen nos créitos del discu. Namás –si por fechalu fuera-, coincide que la cra del gaiteru El Pracvianau, na carátula del discu, tien pinta de ser del mesmu tiempu que la qu’acompaña la portada del CD de Celestino Rozada.

Paga la pena sentir esti trabayu de Salvador Vázquez porque dexa constancia de que’l xéneru de l’ayerana nun tá tan muertu como se pretende. De xuru que falta esa mocedá que valga pa da-y el relevu xeneracional. Pero, de la qu’aporta o queda pel camín, estos ventitrés cantares d’esta voz ayerana déxennos con ganes de sentir bien d’ellos más.

Presta abrir les puertes del branu con cantares asina. Que la xente que nos visite entienda qu’hai una voz fresca más allá del flamenquito y el pop sosaina.

Pa los de fuera y palos de casa. Tengo a Celestino Rozada a tou meter nos bafles del CD. Ye’l mio ataque frontal contra’l vecín ventiañeru que chundachundea coles ventanes abiertes. La suerte que tengo de tener de vecín a un lolailo posmodernu. Ye una guerra que va durar. Pero, a la llarga tienla perdida. Lo que’él defiende nun tien más allá de cincuenta años de vida. Les voces que yo-y pongo al altu la lleva -como tienen en verdá de sentise-, atesoren una sabiduría de sieglos.