Predicar en desiertu
2008 / 12 / 19 - Les Noticies
Naquel tiempu dixo San Xuan Bautista a los que lu sentíen (Xn 1, 23 y Mt 3, 3): “Yo soi la voz del que clama en desiertu”. D’ehí siempre se dixo que venía’l dichu de “predicar en desiertu”, por más que, pa lo so versión castellana, el llibru “El porqué de los dichos”, de José María Iribarren, comenta tamién la copla popular: “Quitarme de que te quiera / es predicar en desierto / machacar en hierro frío / y darle voces a un muerto”.
De la que los años van pasando, el canséu de repitir tantes veces les mesmes coses dende esta columna –como en tantos otros foros-, acaba dándote la sensación de sentite como’l profeta mentáu. Y, más que nada, prestándome como me presta cambiar d’opinión. Y non porque los sucesos s’avengan a les razones míes, sinon porque bien de veces les razones d’otros –o los sos exemplos prácticos- acaben convenciéndome y, poro, camudándome la opinión.
Esta mesma tarde na qu’escribo vien de participar Héctor Braga nel Concursu Cuenca del Caudal de canción asturiana. Dos sábados atrás ficiéranlo Marisa Valle Roso y el so hermanu Fernando. Preguntada Anabel Santiago pola so ausencia d’estos escenarios -ayeri mesmo, sobre l’escenariu de la Casa de Cultura d’A Veiga-, contestóme que tomaba l’añu sabáticu de concursos.
Toi falando de la fase normal de concursu. Ayeno al tarrén de la tonada d’autor de la que falaba l’otru día. El Concursu Cuenca del Caudal vuelve, como comentaba, a incluyila: les tonaes tienen de ser orixinales en lletra y música. La Muestra del Folclor Ciudá d’Uviéu vuelve tamién, pero empeorando un poco más les bases del añu anterior: si nesi añu, por simple ignorancia del Xuráu, se premiaba un cantar que nun yera orixinal nin en lletra nin en música, esti añu permítese esta anormalidá qu’a lo llargo del sieglu XX se vieno dando, con especial incidencia nes décades últimes -diferentes lletres pa la música del mesmu vieyu cantar.
El resultáu d’esta absoluta falta de sentíu tenémoslu comprobando’l númberu de xente que participa nel apartáu de tonada d’autor na Muestra del Campoamor: tres. Con una ventaxa: como hai tres premios, yá se sabe que van ser los ganadores. Con una ventaxa adicional: al nun participar esti añu Anabel Santiago nun van tener necesidá de cometer la irregularidá de tener de premiar un cantar non orixinal pa nun tener de vese nel compromisu de premiala a ella. Nel Concursu Cuenca del Caudal, cuando tovía queda un mes pa poder inscribise nesta modalidá de tonada d’autor, yá hai seis participantes. El doble. Un datu bien significativu.
Dende fuera, la xente de la nueva xeneración cuidaba que colos cambios producíos nel Ayuntamientu d’Uviéu diba dase per fin el necesariu cambiu d’una Muestra que, como’l so nome indica, ye heriede d’un tiempu que mentía acerca de la realidá de les coses: baxo’l paragües de “muestra” escondió siempre un “concursu” sobre’l que siempre planeó la solombra de la dulda. Cuando non la evidencia: recuerdo ver ganar nuna final a una de les grandes voces de la tonada nun día pésimu de voz y entrando un cuartu de tono per debaxo de la gaita; eso sí, terminando’l cantar a lo grande, mediu tono per enriba, como bien podía facer dalguién que se sabía ganador y venía atropando l’escenariu.
El descensu del númberu de públicu tamién ye un bon baremu de cómo esta Muestra diba perdiendo’l respetu de la xente. Más que nada si se lu compara col concursu de Xixón, que llogra mantenese n’espetadores, y el Cuenca del Caudal que los aumentó en más d’un trenta per ciento na edición del añu pasáu.
La televisión contribuyó enforma al éxitu y al fracasu d’estos concursos. La xente fue viendo, asina, nestos últimos años, el descensu nos niveles de calidá de la Muestra y, pola contra, l’importante aumentu del Cuenca del Caudal. Nesta edición volveremos velo. Nel casu de la Muestra pretende cambiase’l tema de les presentaciones. Un cambiu más qu’importante: el del llinguaxe propiu de la radio de los años sesenta, que representa Carlos Jeannot, pol de la llingua cotidiana qu’amuesa nel programa “Camín de cantares” Xose Ambás. El Cuenca del Caudal fue’l qu’abrió camín nesti sentíu y lleva yá varios años faciéndolo. El propiu Xosé Ambás fuera ún de los presentadores de la pasada edición.
A estes altures de la hestoria nun sé si esti cambiu de presentador na Muestra se produxo, va camín de producise o va dase nun futuru más o menos cercanu. Pero, con too y ser un cambiu dafecho importante, les voces de la nueva xeneración entienden que la Muestra necesita de cambios estructurales más importantes que’l de la voz del presentador.
El Xuráu del Cuenca del Caudal va volver esti añu a tar integráu por persones vincuales a la canción asturiana, pero tamién a espertos en música y cantu. El resultáu de les sos deliberaciones ye públicu. Y, como me dicía un concursante del añu pasáu: polo menos, tea o nun tea d’alcuerdu cola decisión del Xuráu, equí págennos a toos. Que sigue siendo un marca d’identidá del Concursu Cuenca del Caudal: la cuantía de los premios ye menor que notros concursos, pero equí págase a tolo mundu 120 € por venir a cantar; por cada día que se vien a cantar (fases eliminatories y semifinales).
Asina, el Concursu Cuenca del Caudal -como notru orden de coses el Concursu de Gaita de Xixón-, quíten-y a ún la horrible sensación de tar predicando en desiertu. Pero non porque cuide en nengún momentu que dalguién me da la razón, sinon por tolo contrario, porque soi yo’l que-yos l’acabo dando. O, lo que ye lo mesmo, nun cuido en nengún momentu que dalguién atendiera a lo qu’escribo pa cambiar, sinon que les coses surden, como diz l’autor de “Parque Xurásicu”, por xeneración espontanea. Y, delles veces, pa bien.