Dientro de la relativa uniformidá de la música europea, en xeneral, y de la española, en particular, la tonada ye’l xéneru más identificativu y singular de la música asturiana. La particular manera d’interpretar de los cantadores de tonada fizo que, a primeros de sieglu, dellos músicos cultos estudiosos del folclore, influenciaos poles idees rexonalistes na política y nacionalistes na música, afayaran nélla los rasgos más calificativos y diferenciadores de la personalidá asturiana.

La especialización que naz de la dificultá técnica y el carácter lúdico de la propia tonada, ye lo que permite qu’anguañu sea ésta la única espresión non anacrónica del nuestru folclore. Ye dicir, la tonada ye una manifestación actual de la cultura musical asturiana, con abondos raigaños nel pasáu, pero indiscutiblemente viva nel presente. La danza alredor de la foguera na nueche de San Xuan, cualquiera de los pericotes que se dancen

en Llanes o los blincos d’un fandangu como’l "Xiringüelu", son manifestaciones recreaes polos sos intérpretes, al gustu d’una época y naguando por caltener la pureza d’una manifestación, tanto nel cantu, como nel son, como na propia ropa de los danzantes y bailladores. La tonada, pola contra, ye una manifestación d’ayeri, de güei y de xuru que de mañana. Cuerre, como la mayor parte de les manifestaciones populares, dellos peligros. Pero, n’actualidá nun pue dicise que se trate d’un xéneru muertu, nin siquiera en víes de desaparición.

L’asturianada -la manera más xeneralizada de nomar a les canciones de tonada- ye quiciás l’elementu musical más identificativu d’Asturies. Y, en xeneral, xunto cola llingua asturiana, na que tan escrites la mayor parte de les sos lletres, ye l’elementu más propiu d’Asturies. El términu asturianada esiste porque esiste Asturies. Ye, pues, a partir d’una visión romántica, rexonalista, nacionalista... una parte claramente identificativa d’esti pueblu. Tien un llinguaxe musical propiu, dase nun ámbitu cultural mui concretu y conviértese, a lo llargo d’esti sieglu, nuna seña d’identidá única y clara, propia y diferente.

Cuando se pretende facer un estudiu hestóricu de la evolución d’esta particular manera de cantar, afáyense dos importantes obstáculos: el desconocimientu de la situación de la canción enantes de los años caberos del sieglu pasáu y la incertidume de los sos oríxenes. Los documentos o referencies anteriores al añu 1885 son escases en xeneral pa tolo tocante a la música asturiana. Nesti añu publícase en Madrid el cancioneru de Rufino G. Nuevo y Miranda Todo por Asturias. Primer capricho pot-pourrístico sobre cantos populares de Asturias, una suite al gustu de la época sobre dieciséis temes populares, quince d’ellos colos sos correspondientes testos y una nomada "Zarabanda asturiana al son de gaita y tambor". El segundu de los temes qu’aparez na suite ye la popular "Soi de Pravia", tonada mui renomada na época, como lo demuestra la so incorporación n’otros cancioneros o dando nome a una de les más conocíes y esitoses obres del dramaturgu Vital Aza.

El tema de los oríxenes, como suel suceder nestos casos, ye complexu. Los pocos estudios fechos hasta’l momentu nun lleguen más allá qu’a suposiciones, en buena midida inverosímiles. La búsqueda de les fuentes de les que bebe la tradición cambia coles modes y gustos del momentu, polo que ye d’entender les fáciles abscripciones a oríxenes celtes, mozárabes, cantos gregorianos, parentescu flamencu...

Lo cierto ye que, la tonada y les variaciones actuales que sobre les sos estructures se faen, tienen una hestoria constatada de dalgo más d’un sieglu y una hestoria oculta anterior difícil d’afayar. Fuera como fuera, esta manera de cantar pasa enforma desapercibida pa los escritores y estudiosos de les dómines anteriores a 1885, y queda por primer vez reflexada na obra recopilatoria del avilesín Nuevo y Miranda. Hasta esti momentu, bien parez que los cantos populares, incorporaos por mediu de la so trescripción pianística al gustu de los salones de la época, nun merecieran l’atención de naide.

La serie de característiques que definen la tonada son lo suficientemente significatives como p’ampliase, na voz de los cantadores, hacia otros xéneros de la canción asturiana. Asina, xéneros como la vaqueira, l’añada, la xiraldilla, etc., propios d’otros ámbitos y relacionaos con otres actividades, pasen a integrar el repertoriu normal de los cantadores de tonada.

D’esti modu, a lo llargo del sieglu estendióse’l términu asturianada pa definir esta manera de cantar a l’asturiana, o sea, coles característiques propies de la tonada tradicional. Anque s’utilicen los términos tonada y asturianada indistintamente nun podemos escaecer esti matiz diferenciador. Los términos de tonada y tonada de la tierra (como recueyen Belmunt y Canella), pudieran ser los más estendíos nel sieglu pasáu pa estremar esta manera de cantar. A lo llargo del presente sieglu, ye’l términu asturianada’l que vien a tomar el so relevu. Asinamesmo, el términu qu’identifica dafechu a la persona qu’interpreta tonada o asturianada ye’l de cantador o cantadora.

Como se comentaba anteriormente, los estudios sobre la canción asturiana son escasos. Esti fechu ye inda más patente si lo comparamos cola abundante bibliografía qu’otros apartaos de la cultura asturiana tien xenerao. Eduardo Martínez Torner fizo una serie d’interesantes averamientos que, anguañu, vense necesitaos d’una ampliación. Sicasí, la tonada en concreto nun aparez, nin siquiera nos estudios de Torner, como xéneru diferenciáu.

La tonada continúa siendo n’actualidá’l xéneru más identificativu de la música asturiana. La so ductilidá permite-y afrontar el futuru con grandes espectatives. Pero, los sos intérpretes actuales afáyense na encrucixada del desconocimientu y de la reiteración.

El desconocimientu que los cantadores de tonada tienen del xéneru orixina una repetición reiterativa de les canciones de los llamaos clásicos. Escaeciendo qu’estos clásicos, nel so tiempu, fueron tresmisores d’unos estilos y creadores n’ellos. La limitación de la creatividá ye, nel momentu presente, el más grande obstáculu col que s’afaya’l desarrollu futuru de la tonada. Esta limitación a la creatividá vien fomentándose dende hai años a través de los concursos de canción asturiana, onde se premia, per encima d’otros valores, la fidelidá de la interpretación d’una canción al modelu conocíu na voz de dalgún de los sos cantadores clásicos. Nel presente, nengún de los concursos esistentes -y son varios- cuenta nes sos bases con una base espresa que fomente la creación de nueves tonaes.

Ensin creatividá la tonada tien de pasar, en nada de tiempu, a ser un xéneru a conservar, netamente anacrónicu, pero non vivu. Imitar a los clásicos pue ser un buen exerciciu d’estilu. Los clásicos fuéronlo porque llograron imprimir el so sellu a una serie de tonaes que güei los representen. Esti sigue siendo’l camín a siguir polos cantadores actuales.