Dious ya'l cuitu valen muitu...

2008 / 10 / 24 - Les Noticies

Ser cristianu nesta parte del mundu ye una tradición tan nuestra como la de baillar la danza prima. Un sentimientu de pertenencia a una comunidá mueve dambos exemplos. Por más que, la suerte que tien la danza prima con respectu al cristianismu ye la de nun tener una xerarquía de mandu que llegue al nivel d’estupidez manifiesta d’un Antonio María Rouco Varela, presidente de la Conferencia Episcopal Española. Dalgo que nin siquiera algama’l nuestru arzobispu metropolitanu d’Uviéu, por más que bien de veces faiga por ello. Toi en Villaviciosa disfrutando de la pumarada de Javier d’Arroes demientres siento al citáu Rouco Varela cumplir la función d’energúmenu llevantando la voz cola dureza irracional que lu caracteriza contra l’avance médicu que va permitir a un críu acabante de ñacer donar el so cadiyu y axudar a sanar al so hermanu d’una grave enfermedá. Nosotros, Javier y yo, más acordies cola llei de Dios, sentimos dos mises a gaita que tien grabaes y que tienen yá tantu tiempu que son una verdadera ayalga. Per una parte, siento “La peana”, una pieza que grabara Javier el 4 de xunetu de 1963, durante una procesión na propia collación d’él. Amás de la distancia nel tiempu que son yá 45 años, la propia pieza ye una xoya única: dalgo qu’enxamás sentí y dalgo que, el propiu Javier d’Arroes, más andáu que yo polos pueblos d’esta comarca, nun volviera sentir. “La peana” ye, asina, música d’otru tiempu, anque d’esti llugar. Una música que los cures de la Transición política, influenciaos per un llau polos nuevos aires del Conciliu Vaticanu II y, per otru, pola corriente que siempre destacó na Ilesia asturiana contra la música tradicional –de manera especial la de gaita-, acabaron arrequexando, cuando non faciendo desaparecer. Detrás d’esa pieza única, grabada nel primer radiocasete qu’adquiriera Javier d’Arroes, sentí la misa cantada a la gaita por Chucha de Nembra ya interpretada por Luis d’Arnizu, xunto a otres pieces interpretaes por Ramón López. Nesti casu, una misa cantada cellebrada na ilesia d’Arroes el 16 d’agostu de 1981. A 27 años de distancia de nosotros. Parez poco tiempu, pero anque sé que dacuando se sigue cantando na parte d’ellos del conceyu d’Ayer, tampoco sé de qu’esista más grabación qu’ésta que toi sintiendo. Falando del estamentu eclasiásticu, permítaseme dalguna pregunta retórica (aquel vieyu arte qu’articulaba un sistema de regles y recursos qu’interveníen na construcción d’un discursu): ¿Nel nome de qué tradición fala l’actual xerarquía episcopal española? ¿Qué tradiciones asturianes son les qu’atesora’l nuestru sentimientu cristianu de la vida y nun vemos respuesta dala dende’l nuestru arzobispáu? Siempre cuento la mesma hestoria, pero non por repitida dexa de ser menos cierta. Una xeneración de cures mozos, tan averada a nosotros que tovía siguen siendo mozos y siguen exerciendo, acabó en Teberga col cantu del ramu de la Virxen del Cébranu los díes 15 d’agostu de cada añu. Dalgo que diba más allá de ser un simple cantar de ramu, p’acabar siendo –como la danza prima de la que falaba al empiezu del artículu- parte inseparable del nuestru sentimientu de pertenencia a una comunidá. Dicho d’otra forma: dos himnos como la “Marcha Real” o como’l “Asturies Patria Querida” nun son nada nel corazón d’un teberganu al delláu de los sentimientos qu’esconsona sentir xunta los de casa’l “Virxen del Cébranu Hermousa”. Esti domingu pasáu tocóme sentir pelos altavoces d’una ilesia una misa entera. La pregunta qu’ún se fai vuelve a ser retórica –pero non por ello menos sentida-: ¿a qué sentimientu llama cantar amaruxadamente una canción de Bod Dylan con una lletra de mierda de sabe Dios qué poeta bebesantos, prendinciensos y llambesotanes? Les mises asturianes cantaes a la gaita son una verdadera xoya etnomusicolóxica. Y sonlo porque asina lo dispunxeron los responsables d’una Ilesia ayena dafecho a los verdaderos sentimientos d’esta tierra. Una ilesia que, depués, fai llamamientos y deplora’l laicismu de la nuestra sociedá, asina como diz nun entender la falta –l’ausencia- de nueves vocaciones. Dalgo que tendría de siguir siendo patrimoniu vivu de la nuestra tierra, de la nuestra Ilesia y del nuestru sentimientu como comunidá, acaba arrequexao nes cintes de radiocasete –gracies a Dios- d’un aficionáu –d’un creyente- como Javier d’Arroes. Pero ye ésta tamién otra forma d’entender la muerte de la nuestra tierra, de la nuestra Ilesia y del nuestru sentimientu como comunidá. Pal que quiera dir a vela, la Virxen aparezse un sábadu al mes nel cumal del Monsagru, nel conceyu de Morcín. La Ilesia oficial ta preocupada y nun sabe como afrontar problemes d’esti tipu, de corte evanxélicu. La respuesta ye cenciella. Yo -como tantes veces tengo tan poques coses que facer-, averéme va una temporadina a ver a la Virxen, siguiendo la sienda d’una montonera grande de fieles, bien d’ellos antroxaos d’aliviu –que vien a ser una color ente’l malva y el bermellón-. Arriba’l too, nuna campera, la paisana qu’encabeza la procesión emprima a acapiar a Dios, a tola corte los santos, al mesmu fíu, al Espíritu Santu y a la Virxen Soberana, dando un glayíos qu’apavoriaben l’ambiente. Demientres, los sos siguidores axinoyaben y garllaben ente toos una xiringosa salmodiada. D’esmenu, metanes d’un silenciu sollerte, faló la Virxen per boca d’ella.D’ello doi fe que, como digo, taba ellí. Al baxar de la peña, como siempre faigo, acabé tomando dalgo nel chigre que fuera de los padres del director de cine José Antonio Quirós, delantre de la ilesia del pueblu. Al salir vióme’l cura y, como-y dixera d’ónde venía, entrugóme: -Y, a ti, too eso, ¿qué te parez? -Una tomadura de pelo –contesté-. De falar la Virxen de verdá y nesti sitiu, fadríalo n’asturianu con acentu de Morcín y non en castellanu con acentu de bien p’abaxo, que ye del sitiu d’onde ye orixinaria la videnta. En fin, vuelvo a casa cola cinta de casete ente les manes que me ragalara Javier d’Arroes cola procesión y la misa y alcuentro un corréu de Xose Ambás nel que me fala d’un cantar d’ánimas de Teberga que-y pasara en mp3. La pregunta que-y faigo tamién ye retórica: ¿Si esta xente ye quién a desaniciar de los nuestros vezos, y delantre de les nuestres ñarices, un ramu como’l del Cébranu, cuántos cantares como ésti d’ánimes nun se perderíen pa siempre gracies a la so abierta predisposición al olvidu? Menos mal que los de Teberga somos, amás d’oreya llarga, testerones y atesoramos la fe del descreyíu. La que diz que Dious ya’l cuitu valen muitu. Pero, sobre too, el cuitu.