Ente rabiles y dulcimeres
2008 / 10 / 03 - Les Noticies
Pel tiempu del “Almanach” de Malicorne aportó per San Xuan a Mieres un músicu escocés que tocaba un estrañu instrumentu allargáu y cantaba nun horrendu francés. L’instrumentu llamábase dulcimer y el francés que garllaba recordaba de lloñe “je suis venu vous inviter / pour venir demain mes noces”. Sentó, col perru y col dulcimer, na bancada circular de la farola de los xardines del ayuntamientu, al delláu d’ónde parábamos toles pandilles de guajes de los alredores de los diciocho años.
Como yera’l tiempu de los cantautores y del cantar protesta, aquel músicu vagamundu pareciónos el nun va más. Asina, amás de sentar con él a sentilu cantar, pasamos directo a la sección de discos dedicaos y pidímos-y que nos cantara “Eu daría a minha vida” –la única que sabíamos nuna llingua forana y que tuviera tal éxitu nos últimos años que tovía siguíamos cantando.
Pero, ente que nun debió d’entender el nuestru pésimu portugués y que vio que namás conocíamos “Les tristes noces” de Malicorne, volvió cantánosla otra vuelta; nesti casu con acompañamientu coral.
Nun volví sentir un dulcimer hasta unos pocos años más tarde nes fiestes de Bruxes, nel norte de Bélxica, y volví recordar a aquel escocés que paró un día per Mieres. Como agora qu’abro’l nuevu trabayu de Celia González, “Cantoras ya bordones”, y doi cola foto d’ún de los sos músicos, Hervés Perochon, nel folletu del CD.
Fiel como fui siempre a aquel LP, “Almanach”, de Malicorne, que truxera’l mio amigu Toni’l Paraca de nun sé qué viaxe raru pela Europa de primeros del 77, siento esti segundu trabayu de Celia González como parte d’un viaxe nel tiempu. Un viaxe qu’entama nos vieyos discos de Folways Records y del sellu Guimbarda, amás de los que cubríen la ufierta de la música asturiana del tiempu y que termina a la vera de grabaciones como ésta.
Un viaxe que bebe de les fontes de la tierra y de les fontes del tiempu. Polo que sabe compaxinar ser música d’un llugar como ésti, a la vez que d’un tiempu como ésti tamién.
Contárame va unos meses la propia Celia que taba en puertes de sacar al mercáu esti trabayu, frutu de la collaboración con xente bien mozo y con ganes renovaes. Un branu de distancia ente medies y tenemos estos quince cantares qu’amuesen un percorríu intencionáu pola bayura de la nuestra música tradicional, de que ye bien conocedora. Un percorríu que amuesa dende una tonada soberana, como “Que m’escurez” –que recoyera Torner nel Cancioneru y siguen interpretando idéntico los cantadores del oriente-, a un fandangu como’l del cancioneru de Maya y Lavandera.
Y too ello col gustu esquisitu y el bon facer del que fai les coses con cariñu, ensin que t’aprieten les regles del mercáu y ensin que se tenga que demostrar nada a nadie. Nun hai necesidá nenguna siquiera d’un hit de los cuarenta principales pa facer sentir nes radio fórmules de casa. Nun hai necesidá tampoco de vender miles de discos.
Cenciellamente, queda’l prestixu de dalguién al que-y prestar tener nes manes un productu col que se siente a gustu y que, amás, ye quién a defendelo delantre d’un públicu. Porque, más allá de la propia grabación, esta ye música pa sentir en directo, mesmo que dende va tiempu CD’s d’estes característiques son en verdá más cartes de presentación que productos de mercáu.
Cuatro años depués d’aquella “Coloradina la guinda”, Celia González vuelve a dar otra vuelta rabil. Pasaron cuatro años ente ún y otru. Esperemos que d’equí al viniente’l tiempu seya más curtiu. Cada vez tamos más necesitaos de productos asina, que refieren d’una manera más directa a la nuestra identidá.
Más que nada nun momentu como’l presente cuando otros autores asturianos apuesten directo hacia una tamién necesaria comercialidá. Como preba de que, arriendes de qu’hai más mundos pero tan nésti, hai munches músiques y esti ye’l tiempu perfectu pa sentiles toes xuntes.
De nun sentir namás la música de Los 40 Principales acabaríamos en nada. Menos mal que’l mercáu, que ye mui intelixente, ta baxándose pol Emule eses músiques d’usar y tirar y tá acabando de pasu con elles. Y menos mal que’l mercáu musical asturianu, que sigue unes regles qu’enxamás estudiamos en contabilidá y en márquetin, sigue faciendo posible momentos como los que dexen grabaciones como ésta de Celia González y la xente d’ella.