Los bagadoù de gaites asturianes

2008 / 09 / 26 - Les Noticies

Fuera en París, alredor de la enorme cantidá de xente bretón emigrao, que ñació en 1932 la primer tentativa de salvaguarda de la música instrumental de Bretaña. Ñaz asina la KAV (Kenvreuriez ar Viniouerien), dalgo asina comno la Xermandía de Binioutistes, dirixida por Hervé Le Menn. Cinco años depués, los “sonneurs” de París y de Bretaña axúntense y formulen la necesidá de crear una asociación asemeyada en Bretaña.

La Guerra Mundial retrasa esti proyectu y nun ye hasta ochobre de 1942 que surde la BAS (Bodadag Ar Sonerion), el Conceyu de Sonneurs. Al añu siguiente, Hervé Les Menn, Dorig Le Voyer y Polig Monjarret creen, a partir de la formación de les “pipe bands” escoceses, el bagad (plural: bagadoù), orquesta bretona formada por alredor d’ocho “bombardes”, ocho “bagpipes”, cuatro “caisses claires”, dos “toms” y una “grosse caisse”.

Pero, dende l’aniciu, el bagad quier ser más qu’una cenciella agrupación musical y nagua por convertise nel llugar privilexáu de la tresmisión, la propagación y la evolución de la música bretona (según comenten Roland Becker y Lauren Le Gurun, en “La musique bretonne”).

Malapenes diez años más tarde, en 1958, el númberu de les bagadoù sobrepasa’l cientu. El 1965, la BAS organiza pela primer vez un conciertu de bagadoù. Ye’l fin d’un tiempu: el bagad dexa de ser una simple formación de desfile pa convertise nuna “réel orchestre”, la gran amuesa de la música bretona en constante evolución.

Dende aquel tiempu, les conciertos de bagadoù repítense añu tres d’añu, participando bien de formaciones repartíes en diferentes categoríes, p’acabar disputándose el “Championnat National”. Y, en xunto, lo más impresionante de tou esti movimientu musical ye esta capacidá pa, añu tres d’añu, remover les propies estructures de la música bretona y crear obra nueva. Esti ye’l puntu nel qu’esti tipu de formaciones tien especial interés pa les agrupaciones musicales de gaites asturianes. Y aporfio no de “agrupaciones musicales de gaites asturianes”, porque falar de les bagadoù d’anguañu ye facelo de dalgo más qu’una simple banda de gaites.

Yye que, nel fondo, ñacieran con esi espíritu de trescender más allá de los que podría ser una banda de gaites tradicional.

Por más que de tola música moderna bretona la más grande influencia nos llegara col fenómenu Allan Stivell, el tiempu acaba dexándonos el posu de la influencia de les bagadoù na nuestra manera d’entender la música de raigañu tradicional y d’aire modernu. Por más que bien de siguidores de la música celta continúen teniendo como referencia les palabres d’Allan Stivell nel so trabayu “Reflets”, de 1970: “C’est avec la vague du folk song que cette influence celtique a atteint son apogée. C’est ce courant, synnthèse d’une continuité ethno-culturelle volontaire et d’une adaptation au monde moderne, qui m’a poussé lancer un folk song breton”. Col mesmu sentíu que, en 1959, Pete Seeger ficiera emplear a la Grammy Awards el términu folk pa designar esa otra música que, basada n’estructures tradicionales, nun dexaba de ser moderna.

To toda esta hestoria surdíame a partir de que la Banda de Gaites Llacín venía d’editar el so trabayu “Xideces”. Un trabayu musical que va enforma más allá del propiu d’una banda de gaites al usu y qu’apunta a la necesidá de dar un pasu hacia’l futuru que dende va años vienen apuntando formaciones del tipu de les citaes al empiezu del artículu. Va escases feches, tamién dende Les Noticies, falaba nel mesmu sentíu sobre’l trabayu d’una formación como La Raitana. Lo que vien a significar que, dende yá va un tiempu, les bandes de gaites asturianes cuenten cola suficiente formación y los suficientes conocimientos musicales como pa, sobre les vieyes estructures, crear obra nueva.

L’exemplu mesmu de los espectáculos de la Plaza Mayor de Xixón nes fiestes del Begoña organizaos musicalmente añu tres d’añu pola Banda de Gaites Noega de Xixón y baxo la dirección musical d’Alberto Varillas, ye otru exemplu más nesti sentíu. Como los últimos trabayos d’otres bandes de gaites, siempre apuntando a esi pocu más necesario pa marcar la diferencia.

Nesta ocasión, la Banda de Gaites Llacín presenta un álbum con 11 temes musicales que nun integren, en xunto, una obra total a la manera de los trabayos más recientes de les grandes bagadoù. Pero yá apunta maneres de que ye una banda de gaites que se lo pue tar planteando y que lo pue llevar al acabu perfectamente.

El títulu del álbum, “Xideces”, refier a les coses guapes y prestoses na xiringosa de los teyeros de Llanes. Y eso, el CD, consíguelo asgaya. D’ehi que señale que, arriendes, apunte a bastante más que dalgo prestoso.

Si la influencia más grande de les bandes de gaites asturianes sigue tando nos modelos bretones, que seya en toles sos consecuencies. El modelu bretón basóse nel escocés pa depués ser quién a ser diferente. Esi quién a la diferencia sigue necesitándose equí. Por más que yá s’apunten les formes.