Seis años de los premios Silvino Argüelles

2008 / 09 / 19 - Les Noticies

Al que-y presta pensar que’l posu de les coses lu da’l tiempu, recuerda que’l Memorial Silvino Argüelles cumple con ésta la so XXII edición. Lo que nun dexa de tener, per una parte, el méritu de facenos recordar que se cumplen ventitrés años de la muerte d’una de les voces más carismátiques de la tonada asturiana de les décades de los sesenta y sententa del sieglu pasáu. Y, per otra, el tamién méritu de facenos recordar qu’en Mieres siempre hai llugar p’alcordase de la xente que marcó un tiempu. Lo que nun dexa de tener el so llau negativu. D’una parte la proliferación d’homenaxes y memoriales. Y d’otra, la de tener d’asistir al supliciu de cómo poco a poco van abangando y convirtiéndose nuna solombra de lo que fueron. La solución namás pasa por, dacuando, renovase o morrer. Nel casu del Memorial Silvino Argüelles el dacuando llegó-y va seis años. La XV edición yá fuera una vaga alcordanza del so pasáu esplendor, cuando la plaza de Requexu taba atacada de cantadores y d’espectadores qu’enllenaben les meses de los diferentes chigres. La XVI húbola de verdaderu milagru: nin voces que pagaran la pena, nin públicu que tuviera gana veles. Asina les coses, nun actu de rescatar la bona memoria que dexaran los oríxenes y el bon recuerdu de la figura de Silvino Argüelles, planteóse la edición XVII como la del cambiu. Creáronse naquel momentu los Premios Silvino Argüelles, nos qu’un xuráu d’espertos nomáu al efectu decidiría quién fueran les diez meyores voces del añu y quién el meyor gaiteru acompañante de tonada. Nesta edición, ente los trece miembros del Xuráu contóse cola presencia de xente de Les Noticies, como Xune Elipe y Ramón Lluís Bande. Como una manera d’amosar que l’ámbitu de la tonada asturiana yá nun ye aquel estrechu circunscritu a los participantes nos concursos, a los organizadores de corcursos y a los presentadores. La esperiencia de Ramón Lluís nel programa Pieces ye bien arriquecedora pa esti mundu y l’averamientu del xéneru a otros campos musicales nestos últimos tiempos tá teniendo bien de ver con ello. Esta esperiencia estiéndese a discos L’Aguañaz-Ámbitu, que dirixe Xune, que yá cuenta nel so archivu con dellos de los títulos de referencia d’estos años. Ensin escaecer el círculu propiu de la tonada, qu’amentaba enantes. Sigue siendo dafechamente necesariu. Y bien siendo un mundu cambiante. Los tiempos lleven a ello. Asina contóse pala ocasión con Facundo Fernández y Antonio Moa, presidente y secretariu del concursu Cuanca del Caudal, y Julio César Baragaño y José Luís Rozada, presidentes respectivamente d’AICA (Asociación d’Intérpretes de Canción Asturiana) y de l’Asociación de Canción y Folclor de la Cuenca del Nalón. Asina, tamién, d’esos otros mundos paralelos al de la tonada, pero con enormes vinculaciones, llamóse de Xuráu a Rebeca Velasco, directora de la Escuela de Música de Gráu y de la Coral Dafne d’Uviéu, a Fernando Ornosa, director del Archivu de la Música Asturiana del Pueblu d’Asturies de Xixón, a Xosé Ambás, como personaxe mediáticu y presentador de la propia gala del Memorial Silvino Argüelles, y a los periodistes musicales Miguel Fernández y Saúl Fernández. Y, como non, pa cerrar el grupu de trece persones, nun podríen faltar tampoco nomes hestóricos como los de Diamantina Rodríguez y Javier d’Arroes. Con toos y cada ún d’ellos votando, llegóse al resultáu de que les meyores voces del añu fueron les siguientes –y cítoles por orden alfabéticu-: Sergio Agüeros, Lorena Corripio, María José García, Rosario González, José Manuel Robledo -“Lolo’l de Cabranes”-, Celestino Rozada, Anabel Santiago, Ismael Tomás, Jorge Tuya y Marisa Valle. Como tamién la d’Alberto Varillas como meyor gaiteru acompañante de tonada. De toos ellos, namás María José García y Celestino Rozada fueron nueves incorporsaciones a la llista de premiaos col Silvino Argüelles. Un llistáu que yá cuenta con ventidós nomes: el meyor resume de la bayura de la canción asturiana d’esti aniciu del sieglu XXI. Esti sábadu, 20 de septiembre, a partir de les doce y media de la mañana, la TPA va retresmitir en directo la gran gala d’entrega d’estos premios. Preséntenla Sonia Fidalgo y Xosé Ambás. Como otra bona manera de romper col anacronismu de sentir a unos presentadores falando colo tics propios de la llingua de la radio del Movimientu. Como otra manera de romper col pesimismu d’una xeneración qu’añu a añu venía subiéndose al escenariu a contar que l’asturianada taba en víes d’estinción. Al final, lo evidente ye que la única especie en víes d’estinción son ellos. Recuérdese tamién: tamos falando del xéneru más identificativu y propiu de la música asturiana. El únicu non reconocíu dientro de los llamaos Premios de la Música Asturiana. Pa que, de pasu, recordemos otra vuelta’l nivel d’esos premios. Y el nivel del conocimientu musical de los sos patrocinadores.