Ser xoven a los ochenta años

2008 / 07 / 18 - Les Noticies

Los que tienen vezu de lleer esti artículu saben que-y tengo especial apreciu a un cantador de tonada de los hestóricos, que tovía sigue al pie de la brecha sacando alantre grabación tres de grabación y convirtiéndose nuna referencia pa tola xente de la nueva xeneración que ta viendo nél un exemplu a siguir, más que nada polo que tien de tresgresor y d’innovador. Toi falando de Gerardo Orviz.

Gerardo Orviz Iglesias ñació en Santa Bárbara, Samartín del Rei Aurelio, el 29 de ochobre de 1929. Depués d’una serie de pequeños trunfos en concursos locales de la cuenca del Nalón na década de los años cuarenta, consigue’l primer premiu de los Rumbo a la Gloria de los años 58 y 59. Treslladáu a Barcelona a primeros de los sesenta, graba’l so primer discu cola casa Odeón y, dende entós, más d’un centenar de cantares son los que tien registraos.

Ún de los sos más grandes éxitos obtienlu con “Poema mineru”, una de les escases referencies a la situación política d’aquellos años na minería asturiana; una temática reivindicativa que va vese reflexada n’otru bon númberu de les sos tonaes. Ente’l so ampliu repertoriu destaquen “Reflexones de Xuacón”, “Puxa Asturies”, “De qué te sirve tener”, “Silicosis”, “L’aire m’apagó la vela”, “La carbonera”, “El Caudal y el Nalón”.... Continúa con grabaciones nel cambiu de sieglu, del XX al XXI, sorprendiendo coles sos lletres y les sos innovaciones.

De Gerardo Orviz llevamos sintiendo músiques y cantares dende va tiempu, porque nun va tanto publicaba’l CD “La caleya” y tamién “Nueves canciones de la mina”, del que di bona cuenta notros artículos.

Agora, el nuevu CD que tien nes tiendes de discos ye doble. 14 cantares por discu, pa un total de 28 editaes por grabaciones Pola, incluyendo un folletu nel que pue lleese la lletra de tolos cantares. Esti doble CD titúlase “Tonaes y nueves canciones”, y nél volvemos topar cola llinia trazada a la que nos tien avezaos Gerardo Orviz: cantares tradicionales -como vaqueiraes, nes que siempre fue un especialista de la variante averada a la tonada-, asturianaes de siempre –como “¿Cómo te va?”, “Blanca o morena”, “Soi asturianín”, “La cabraliega”, “Carromateros” o “La llinia trazada”- y cantares nuevos, compuestos pa la ocasión.

En xunto siempre vengo a dicir cuando falo de Gerardo Orviz ye que lo más me presta d’esti cantador ye’l fechu de pertenecer a una xeneración tan mayor y tener un espíritu tan mozu que, en bien d’aspectos, entronca col espíritu de la nueva xeneración de cantadores de tonada.

Y tamos falando d’una xeneración que ñaciera enantes de la guerra civil y na que s’alcuentren nomes tan reputaos de la tonada como los de los cuatro miembros del Cuartetu Vocal Asturianu o de xente como Orestes Menéndez, Anibal Menéndez Corujo, El Tordín de Frieres, Marcelina Cuesta -La Nachón-, Laudelino’l de Los Pontones, Fidel Díaz o Tarín de Sotrondio.

Gerardo Orviz, rompiendo colo que podría cuidase como davezu pa la xente del so tiempu, esplora nuevos caminos en cada nuevu discu, ensin dexar nunca de volver a les tonaes de siempre y ensin que les nueves lleguen a perder l’aire de la melodía más tradicional. Y nesti sentíu, “Tonaes y nueves canciones” representa l’afianzamientu del so pensamientu y un pasu más allá de lo qu’entamara en “La caleya” y “Nueves canciones de mina”.

Gerardo Orviz pertenez asina, por derechu propiu, a la nueva xeneración de cantadores de tonada. Falando con él sientes, sicasí, que ta faciendo agora lo que por drechu d’edá-y prestara facer a mediaos de los sesenta del sieglu pasáu.

Yá d’aquella fue un gran innovador. Agora, amás d’un resistente, continúa siéndolo.