Lucas 15, 16 o 17
2008 / 07 / 25 - Les Noticies
Cada música tien el so ambiente. Descarao. Hasta l’otru día tolo más que repara nel CD del grupu Lucas 15 fuera pola versión de “No hay tal andar” que por ser la de mio madre me prestara. Asina cantada, a medies d’una añada cola desgana del que sabe qu’al neñu-y cuesta dormise o como’l que sabe que la nueche ye llarga y estos cantares salmodiaos son los más afayaízos pa ella y pa convocar el sueñu.
Y mira que bien de xente me mandara reparar nel CD. De mano Ramon Lluís Bande porque ye devotu d’ellos. Pero también el mio hermanu Gonzalo, que los venera nel mesmu altar qu’a los de Mus, polos que sigue penando l’ausencia.
D’ehí qu’esta selmana pasada, al igual que Pablo de Tarso camín de Damasco, sufrí una tresformación. Yera mediodía y el calor llevaba tiempu dexándonos la cabeza frita. Ye cierto tamién que nun sabría dicir por qué caña de cerveza andaríamos a aquelles hores. Pero, también ye cierto, el llugar invitaba a ello: el Zensa, del puertu deportivu de Denia.
Escaezamos la cerveza y pongámonos en situación. El llugar afáyase nun áticu de cara al mar y dando’l llombu a les embarcaciones deportives amarraes. Como ye mediodía la xente va animándose a abrir el güeyu, a tomar los primeros y siguientes llíquidos, y a dase un bañín na piscina. El Zensa, amás d’asientos de cueru blanco, posavasos de madera de teca y cortinines de tul tresparentes, tien esa piscina d’agua tresparente que t’invita a desaposiar la resaca.
Volvamos a la cerveza. Como teníamos coses que facer aquella mañana llevábamos tiempu d’un llau pa otru viendo a xente y tratando con ellos, como ye d’avezu nesta tierra y na nuestra, delantre d’una copa de daqué. Col sol enriba l’alma y la cabeza y a más de trenta grados a aquelles hores, la cervecina ye alimentu y reparador de la deshidratación.
Quiéraslo o non, de lo qu’enxamás t’enteres nestos sitios ye de la música que ta sonando. Por propia deformación profesional bien de veces faigo por ello, pero nin asina, poniendo la parte meyor de la oreya, ún ye quién a atopar dalgo reconocible metanes de tantu eclecticismu.
Tienes de saber de que toi falando. La música d’estos llugares, otrora influenciada por El Café del Mar, camina agora a la deriva, cuando cayendo hacia’l lláu de la spa music, cuando hacia autores tan anodinos como famosos, del tipu de los monxos de Tanggula, la música elléctrónica de Yaskin, los “Dragon songs” de Lang Lang o los últimos best chill out de “The sounds of natures” con tolines dando iñíos, glayíos y berrees.
Metanes d’esa música sentí los versos de “Salí moces a baillar / que yá retumba’l panderu / nun digan que nun hai sal / enes moces d’esti pueblu”. Nadie reparara nello, nun se trataba de nengún cambiu tan espectacular de llinea musical que llamara l’atención. Los amigos colos que taben aporfiaron notra ronda de cerveza –qué sé yo yá si la 15, la 16 o la 17, pa tar sintiendo aquello y nun saber si yera namás un sueñu sonoru de la mio imaxinación. Les camareres siguieron arriba y abaxo del local sirviendo copes, zumos y cañes. Moces de piernes increíbles de llargues que baxaran d’un yate descomanáu atracáu a trenta metros tirábense de cabeza a la piscina enantes de pidir siquiera un probe café. Y la música siguía sonando.
Al final de la cai peatonal y principal de Denia hai una tienda de discos y otres hestories musicales. Ye mediodía avanzáu, pero equí los horarios cambien enforma. Avérome y pído-y directo al dependiente’l CD de Lucas 15. Ensin más vueltes, allarga la mano y apúrremelu.
A partir d’esi momentu fue la música d’estos primeros díes del branu. Yá nun podía entender tar tumbáu na colchoneta-sofá de la piscina con una cervecina na mano ensín tar sintiendo de fondo “pente calles de cristal / trona’l cantu del nordés / con palabres de poeta / evocándome una idea / tresportándome al llugar / onde ñaguo por volver / ente los montes del sur / onde vuela’l sitiu míu / onde too tien sentíu / onde soi quien quiero ser”.