Monólogos, chistes, graciosaes
2008 / 08 / 01 - Les Noticies
“Esti ye unu que va faciendo eses pela carretera col coche y páralu la guardia civil y diz-y:
-¡Báxese usté del coche, inmediatamente!
El tíu baxa del coche trumbiando pa tolos llaos, llega onde ta’l guardia, el guardia garra l’aparatu pa face-y la prueba d’alcoholemia y diz-y:
-A ver, sople equí.
Y ponse’l tíu a soplar y cuando yá nun pue más dá-ylu al guardia civil:
-¡Toma!
El guardia míralu y enséña-ylu al conductor y señála-y la pantalla del alcoholímetru y diz-y:
-3,45. ¿Qué-y parez?
Diz él:
-¡Cagonmnimantu, les cuatro menos cuartu, mátame la muyer!”
El chiste, como’l monólogu, suel ser un xéneru que tien meyor presencia nel directu, nel cara a cara, que como palabra escrita. Por más qu’un bon contador o narrador puea descubrir nun simple escritu qu’hai una graciosada suficiente como pa facer d’ella un chiste o un monólogu.
L’éxitu del monólogu en directo sigue siendo impresionante, por más que siga dando la sensación de ser un xéneru minoritariu y en víes d’estinción. Tolo más, lo que sí ye cierto ye que bona parte de lo que fuera’l monólogu tradicional va dexando bien poco a poco pasu a un xéneru igual d’ellaboráu, pero más averáu a los problemas del presente. Dalgo que tengo comprobao nos últimos reprersentaos por Carlos Alba, “Cellero”. Y que también se dexa tresllucir na manera de contar cuentos tradicionales –otru xéneru bien oral-, de xente como Milio’l del Nido.
Pero, la meyor preba de que se trata de xéneros que viven de sentilos en directo túvola va cuarenta años la edición d’una serie de singles por parte de l’Asociación d’Amigos del Bable. Tratábase d’un empeñu especial de xente como Llorienzu Novo Mier y José Leon Delestal. Pero nél participaron delles de les meyores voces de la radio y de la escena asturiana y española del tiempu.
Agora mesmo, vuelve a comprobase cuando s’edita un CD como’l qu’inclúi’l chiste col qu’empecé esti artículu. Consiste nuna esfueya de 69 entesacaos del programa de radio “La receta” de Radio Parpayuela de Mieres, posiblemente’l de más grande audiencia de la cuenca –o polo menos el que tol mundo te comenta dalgo d’él porque, de verdá, les coses que se cuenten ellí poco más qu’ellí podrían contase.
Asina ye que que’l CD bien podría titulase “Chistes qu’enxamás na vida va poder programar la COPE”. Anque, la verdá, poques radios podríen facelo.
Tamos falando de chistes n’estáu puru, como son cuando se cuenten ente amigos, políticamente incorrectos, cuando non directamente gochos o, peor, de los que-yos presta refocilase no gocho. Pero chistes vivos, bien contaos, con tensión narrativa y que te lleven a una esgargayada natural –que con mui bon criteriu dexen nel CD, acompañándose asina los finales col coru de rises de los compañeros del programa, un bon exemplu pa comprobar lo bien que suena la risa natural frente a la enllatada de los skecht de televisión.
Tolos chistes tan contaos por Vila, que lo sigue faciendo dientro del programa xenéricu “El último de la mañana”, de Radio Parpayuela, nel 94.0 de la FM, de llunes a vienres, nel que s’afaya l’apartáu de “La receta”, a eso de media mañana. Un programa perfectu pa comprobar la guapura de la llingua coloquial asturiana. Como también lo ye, nesti casu, la edición del CD, que dende la Feria Industrial de Mieres lleva vendíos alredor de mil exemplares y ensin necesidá de distribuyise más qu’en dos puntos de venta y ensin necesidá tampoco de vendese fuera de Mieres.
Chistes narrativos, chistes de gallegos –nos que ye un verdaderu especialista, anque en bien de casos nun-yos vayan a facer nenguna gracia a los gallegos-, chistes de muyeres y de paisanos, chistes curtios que nun duren más de 10 segundos, contaos a una velocidá de vértigu que t’obliguen a tar más qu’atentu.
“-¿Sabes cómo baxar l’autoestima d’un paisanu en dos palabres?
Taba diciendo una muyer a otra.
-Non.
-Pues pregúntes-y: ¿tá dientro?”
O chistes de tola vida que, bien contaos, por más que te los repitan un cientu de veces, vuelven facete gracia.
“-Nosotros cruzamos un gochu con un elefante y sacamos unos xamones de media tonelá.
Y diz-y l’otru:
-Pues yo crucé lladiyes con lluciérnagues.
-Y, eso, ¿pa qué val?
Diz él:
-Nun sé. Pero tengo los güevos que paecen Las Vegas”.