Tanto Mozart mozu

2008 / 08 / 29 - Les Noticies

Nun ye d’estrañar que la socioloxía actual sostenga que resulta cuanto menos apresurao tresformar una categoría estadística –por exemplu, la población que tien ente 13 y 19 años- nun grupu relativamente homoxeneu. Les estremaes zones del mundu social nel que viven persones que comparten estes edaes, pero qu’esperimentaron trayectories educatives distintes, relaciones diferentes col mercáu de trabayu, formes d’organización familiar tamién separtaes, etcétera, van ser verdaderamente determinantes na conformación d’identidaes sociales y culturales, polo que dos grupos de la mesma edá allugaos en llugares del espaciu social allonxaos ente ellos puen presentar escasos puntos de contactu.

Ye por eso qu’esisten cultures xuveniles en plural, relacionaes con esos mundos sociales particulares, y tamién con estremaes formes de la industria cultural. Sicasí, en principio, ye posible observar dalgo vagamente común a toes eses cultures moces: la música.

Nun llugar como Asturies onde les señes d’dentidá son escases, la mocedá d’anguañu -más que nunca y al delláu de les mocedaes de bien d’otros llugares tan indefiníos identitariamente como ella- defínese pola pertenencia a un tipu de música más qu’a un tipu de cultura o a un país.

Xeneralmente asóciase la cultura del rock col ímpetu y la rebeldía de la mocedá, col despreciu poles convenciones sociales. Esta asociación ye tan fuerte que, por oposición, otros xéneros musicales –como la copla, l’asturianada o el bolero- pasaron a definise pola ausencia d’esos atributos xuveniles, xenerando una imaxe munches veces gastada y conformista.

Al ser el rock un fenómenu “teenager” promocionáu y vivíu como novedá, nun sorprende que la prédica rocanrolera s’articulara nuna frontal oposición ente adolescentes per un llau y figures ríxides y ridícules per otru –delles de les sos representaciones más esteriotipaes son la vieyina que s’atapa les oreyes ante’l ruíu, l’afectáu profesor de cantu italianu o’l más afectáu presentador d’un concursu de tonada pa’l que too esi baturiciu ye ensordador-. Lo interesante ye cómo esa visión de los xéneros anteriores como fenómenos avieyaos, ensin enerxía, cuadriculaos, terminó afectando l’autoimaxen d’esos mesmos xéneros, como si fuera preferible una identidá negativa a la perda d’identidá.

Nos años sesenta, setenta y ochenta, un neñu que fuera un xenial violinista nun podía ser emblema del poder xuvenil, y menos de la que yera exhibíu polos mayores como un exemplu –y polo mesmo, odiáu polos sos pares-. Pa esta xuventú la música clásica convirtióse en música de mayores y pa mayores, dalgo a lo que contribuyó una política cultural musical que consideraba compositores mozos a los menores de 35 años. Escaeciendo que Mozart yá fuera prodixu con seis años y se-y encargara una ópera con quince, que Rossini fuera a los ventiún años el compositor más famosu del tiempu n’Europa o que Pergolessi morriera célebre a los ventiséis años. Y enxamás se trató de casos aisllaos.

Lo que llevó al rock y al pop a ser dafecho identificaos cola mocedá –de manera especial na franxa ente 15 y 25 años- fue’l fechu de l’incrementu de los ingresos familiares, lo que garantizó qu’una proporción enorme d’esos mozos dispunxera de dineru y tiempu d’ociu. Amás, el desarrollu industrial y tecnolóxicu punxo a la so disposición tocadiscos y coches equipaos con radios trasistorizaes. L’aumentu radical de la expectativa de vida modificó la perspectiva vital: los mozos de clase media dedicaron un lapsu más prollongáu a estudiar, posponiendo la constitución d’una familia.

Posponiendo, arriendes, la parte “adulta” de la so vida. Simultaneamente, la progresiva complexidá del entramáu social –y la demanda de mano d’obra especializada per parte de les grandes corporaciones- apienzó a desixir un tiempu de formación más estensu, provocando’l desfase ente’l momentu de maduración fisiolóxica y el de maduración social (lo qu’anguañu concebimos como adolescencia).

Pela primer vez, la música fecha por xente mozo quedó asociada a la visión que los adultos teníen d’una caxigalina, d’un fechu inxenuu, inmaduru.

Pero, a partir de la década de los noventa, la llamada world music redefine’l papel de les músiques del mundu dientro del contestu de la música moderna, de la música cotidiana. El tango y el samba, como l’asturianada o’l fado, quedaron conxelaos nel cultu a los sos “grandes valores” nes décades de los setenta y setenta del sieglu XX. Les manifestaciones locales tendieron a ser vistes como espresiones lumpen o como amueses d’un tradicionalismu obsoletu. Con importantes escepciones: la bossa nova, la nova cançó o’l flamenco, son dellos casos nos que, de manera interna y esterna, primaron autoimáxenes asemeyaes en dellos aspectos a l’autoimaxen del rock.

La identidá de la mocedá vinculada a un universu musical vive nestos primeros años del sieglu XXI una redefinición d’espacios, por más que’l pop y el rock seyan los llinguaxes universales d’occidente. Quiciás estos ciclos seyan más fáciles de percibir na distancia. Va una docena d’años cuando’l musicólogu alemán Peter Minden terminaba la so tesis doctoral sobre la canción tradicional asturiana nun s’alvertía nin de llueñe qu’una nueva xeneración –que tovía anguañu cuenta con menos de trenta años- diba tomar el relevu xeneracional y convertir el xéneru nun modelu de modernidá pa la propia mocedá del so tiempu y del so país. Dalgo que, notros ámbitos musicales, venía dándose col folk y coles variantes locales del rock –preferentemente rellacionáu cola llingua propia.

Asina, en xeneral, los xéneros locales vuelven a ser miraos con naturalidá, lo que xenera resonancies positives na autoestima de los propios practicantes –asturianos, andaluces, bretones, arxentinos…- y una ganancia global en términos de la diversidá y la esplotación de potencialidaes específiques. En suma, que la identidá de la mocedá vuelve a ser vinculada a la identidá de la ciudá na que vive, del país al que pertenez.