Que diez años nun son nada
2008 / 09 / 12 - Les Noticies
Cúmplense estos díes diez años que’l mio hermanu Xaime y yo planteábamos tímidamente una serie de tesis sobre l’asturianada y tocóme, tamién estos díes atrás, reflexonar sobre elles pa un programa de radio nel que, curiosamente, se falaba del flamenco puro y de los resultaos de cien años de mestizaxes diversos.
El compendiu d’aquelles elucubraciones, delantre del piano y delantre tamién d’una taza de café, publicóse baxo’l títulu de “L’Asturianada: ensayu sobre la vitalidá d’un xéneru”. Como tolos llibros que d’aquella editaba’l Serviciu de Publicaciones del Principáu d’Asturies –y nun sabría dicir si lo sigue faciendo-, distribuyóse malapenes y, anque lo poco que se distribuyó vendióse, nun se preocuparon nel departamentu correspondiente de surtir de más les estanteríes de les poques llibreríes que lu solicitaron. Asina, nun ye d’estrañar que, a la manera de la escena final de la primera entrega d’Indiana Jones o de la que principia la última, tenga d’esistir una inmensa nave na que s’atropen una enriba de la otra les miles de caxes de llibros y llibros publicaos y bien publicaos y mal o peor o enxamás distribuyíos.
En fin que, recuperando’l filu del tema que planteaba, al reflexonar sobre los estremaos caminos y derroteros del flamenco, recordé que cumplíen diez años les nuestres tesis sobre l’asturianada. Que, en verdá, nel orixen, tanto teníen que ver colos caminos que yá d’aquella tenía más que triaos el flamenco y llevaba dellos años triando’l fado –por nun salir de la península.
La primera de les tesis cásique la dexa entever el subtítulu del llibru: l’asturianada taba bien viva, por más que los agoreros del so propiu gremiu llevaran bien d’años augurando-y un final irremediable. Evidenciaba la so vitalidá’l fechu de que contara con un circuitu propiu de conciertos, actuaciones y concursos, lo que propiciaba la esistencia d’un públicu propiu y especializáu, y lo que xeneraba un movimientu económicu suficiente pa que se dieran casos de semiprofesionalización ente los sos intérpretes. Nenguna d’estes tres característiques teníen correlación nin se taben dando en nengún otru apartáu de la música asturiana.
La segunda, y enforma más arriesgada, tesis presuponía que l’asturianada yera un xéneru con más futuru que pasáu. Dalgo que falaba a favor el fechu de la continua renovación que de siempre se venía dando nel xéneru y que, va diez años, namás qu’apuntaba mui llixero na obra de dalguna rapacina que yá despuntaba, como Anabel Santiago o Beatriz Díaz –agora dedicada a la lírica-, o nel trabayu de dalguna veterana con ganes de remover los cimientos del xéneru, como Mariluz Cristobal Caunedo.
La tercera llamaba l’atención sobre’l fechu de que l’asturianada yera un xéneru modernu que ñaciera diba poco más d’ochenta o noventa años y que lo ficiera de la mano de los compositores clásicos del Nacionalismu Musical Asturianu que garraron como referencia pa la interpretación de les sos pieces a los meyores cantadores del tiempu: Xuacu’l de Sama, La Busdonga, El Maragatu… Asina, l’asturianada, como xéneru modernu, yera del tiempu de los grandes xéneros que revolucionaron el mundu musical de primeros de sieglu XX, como’l tango, el son o el blues. Y, como ellos, debió en bona midida’l so éxitu y el so espardimientu al surdimientu de los medios de reproducción –el cilindru d’Edison y el gramófonu- y a la posterior difusión de la radio.
Sobre la cuarta tuviéronse bien de discusiones, pero con too siguimos creyendo nella: l’asturianada ye’l xéneru más identificativu de la música asturiana y l’únicu non anacrónicu de carácter tradicional. Esti últimu puntu non solo llevantó munches crítiques, sinon qu’inda agora continua siendo más que discutíu. Pero, en fin, esto ye lo bono de plantear tesis y d’escribir un ensayu: que de la polémica puea surdir daqué. Por más que, entá, esi daqué lo sigamos esperando.
De la quinta tovía tendremos de siguir falando tiempu alantre, porque yera una tesis abierta: la voz de l’asturianada, como la voz del flamenco, ye tan identificativa que podría vertese notros xéneros y acabar convirtiéndose nuna verdadera seña d’identidá d’Asturies. Yera evidente: dalgo asemeyao veníamos sintiendo dende diba años nel flamenco y los vamos siguir sintiendo bien d’años más, hasta’l puntu de qu’un cantador andaluz faciendo blues acaba pareciendo más andaluz que bluseru –y val l’exemplu pa cualuquier otru xéneru-. Equí a la voz d’asturianada, enforma menos conocida y reconocida, sigue costándo-y salir del gheto. Como evidencia’l fechu de que la mayor parte de los grupos de folk sigan cantando a la castellana –como si fueran Nuestro Pequeño Mundo o Nuevo Mester de Juglaría- o a la irlandesa, que nun sé que ye peor o más forano, anque lo faigan n’asturianu. Y s’agradezan de xemes en cuando intentos como’l de Verdasca, Tuenda o dalgún más.
En fin que diez años nun son nada y son enforma. Nel programa de radio hubo llugar pa too, pa insultar a la Niña Pastori y pa defender a muerte lo que fai Bebe, pa comertar que José Mercé ye un vendíu a la comercialidá y pa reivindicar a Triana nel aniversariu nun sé cuántos de la so desaparición. Pero, ¿qué nun se pue esperar d’un xéneru que venera a la diestra de Dios Padre a Camarón de la Isla? ¿A quién de nosotros nun-y prestaría tener santos asina nel nuestru panteón? Dientro de diez años volvemos a recapitular y a ver qué queda de too esto.