Cuatro discos malos

2008 / 07 / 11 - Les Noticies

Detrás de tou discu que sal al mercáu hai un trabayu importante que paga la pena reseñar. El fechu de qu’unos seyan meyores y otros peores respuende más a un criteriu de gustos qu’a otra cosa. Pero, dacuando, aparez nes tiendes un productu tan mal editáu y d’una categoría tan ínfima en cuanto a información sobre la propia música qu’encierra, que siéntome na obligación de falar d’ello.

Fuera’l casu va unos meses del doble CD tituláu “Asturias, su folklore y sus canciones”, un subproductu firmáu por OK Records, S.L., nel que s’atropaben cantares de xente tan anónima como “el neno de Mieres” o “la voz de Pajares”, xunto a otres poco más definíes como la Agrupación de Coros y Danzas de la Sección Femenina.

Con too y qu’esi doble CD yera impresentable, más que nada como productu mal editáu, contenía dalguna xoya como la pieza “Puxa Asturies” que, con lletra de Xosé Lluis García Arias, grabara nel tiempu la citada Sección Femenina. Del resto poco o nada había que dicir.

Nesta ocasión trátase de dos dobles CD’s, el primeru baxu’l títulu de “Huella asturiana” y el segundu presentáu como “Tradición asturiana”. Nun ye d’estrañar que vuelvan a ser editaos pola mesma casa: OK Records. Como tampoco ye d’estrañar que sigan la mesma pauta de los anteriores en cuanto a nula información -cuando non absoluta desinformación.

Anque nesta ocasión la productora va un pasu más alantre que n’anterior amuesa del folclor asturianu y atropa cantares de José Noriega, El Tordín de Frieres, El Manquín y Diamantina Rodríguez. En negún momentu de los créditos s’indica nada sobre los drechos editoriales d’estos cantares nin sobre l’autorización correspondientes pa poder editalos. Eso sí, en llugar bien destacáu de la galleta del CD aparez que se trata d’un productu “Made in EU” y lleva’l sellu de la SGAE.

Nos dos casos trátase de productos que lleguen a un preciu bien baratu al mercáu, diez euros por cada pack de dos CD’s, y que’l diseñu de la carátula tiende a la comercialidá más patriotera con una cruz de la victoria rampante y, nún de los casos, una gaita y, nel otru, unos pitos decoraos.

Como ocurriera n’anterior ocasión comentada, nestos dobles CD’s tamién s’alcuentra dalguna cosa interesante, como ye dos grabaciones de malapenes dos minutos d’unos ramos tradicionales, seguramente surdíos de dalguna grabación del tiempu de los Coros y Danzas de la Sección Femenina.

Al delláu d’ello, y de les citaes grandes voces de la tonada, vuelven a tar les formaciones corales d’época, como l’Agrupación de Coros y Danzas del Movimiento, l’Agrupación de Coros y Danzas de la Sección Femenina y l’Agrupación de Coros y Danzas de las FET y la JONS (que pa la xente más mozo trauzo: Falange Española Tradicionalista y Juntas de Ofensiva Nacional Sindicalista).

Y, como tampoco podíen faltar, otra vez vuelven a apaecer los enigmáticos “el neno de Mieres” y “la voz de Pajares”, que me llamen tanto l’atención que voi poner especial empeñu en saber de quien se traten.

Como siempre faigo nestos casos, llamo a Diamantina Rodríguez y nada sabe del casu. Y eso que d’ella aparecen asturianaes como “Caballo al verde”, “La cabraliega”, “Donde la nublina posa” o “Xunce les vaques, Ramona”. Bueno, nesti últimu casu y como exemplu de lo que ye una mala edición y un completu desconocimientu de lo que se ta editando, esti cantar de Diamantina titílase nos créditos: “Xunce les vaques romanas”.

Y munches más coses, que yá nun sé si paga la pena comentar. Por poner otru exemplu: aparez un “Asturias patria querida” interpretáu por José Noriega. Cuando lu sientes daste cuenta que Noriega nun aparez por nenguna parte. En verdá canta un coro. Nun se diz cual, pero ye un coro ensin la menor dulda. Y lo que canten, eso sí, ye’l citái himnu.

Y, como non, un “Son d’arriba” firmáu pola citada Agrupación de Coros y Danzas de las FET y la JONS, ensin dulda bien cantáu y meyor tocáu al pandeiru, pero nel que la lletra dexa bien a les clares el signu de los tiempos: “Aviva las castañuelas / niña del baile primero / aviva las castañuelas / que yo avivaré el pandero”.

Y si salen al mercáu productos asina ye porque venden. Asina me lo cuenta ún de los responsables d’ún de los tenderetes de feria que más vende n’Asturies (Lito, de “La casina musical”, esti domingu pasáu nel mercáu dominical de Mieres). El productu llama l’atención pol nome y pola carátula, engaña a un tipu mui determináu de comprador y véndese bien. A ello contribúi en bona midida’l fechu de ser un productu más que baratu, cásique a l’altura del preciu del top manta.