Un homenaxe en vida

2008 / 07 / 05 - Les Noticies

Esti vienres pasáu tenía llugar un homenaxe nel audotoriu del Campus de Mieres a Baldomero Pérez, director coral y memoria viva de los últimos cuarenta y cinco años d’hestoria de la música coral nesti conceyu. La participación de los tres coros mierenses que perviven y qu’él dirixera, y el fechu de qu’al Auditoriu s’averaran mediu millar de persones, fala muncho a favor de la persona más que del personaxe. Los comentarios de los coristes y representantes de los coros nel turnu de palabres aporfiaron más nes sos característiques humanes que nel impresionante trabayu lleváu a cabu colos coros, sobradamente valoráu en premios y festivales.

Baldomero Pérez Méndez ñació en Salave, Tapia de Casariego, nel añu 1939 y, como prácticamente tolos grandes directores asturianos del tiempu, formóse nel Seminariu Metropolitanu d’Uviéu, onde realiza los estudios de solféu, piano y armonía, completando la so formación musical con cursos de dirección coral.

Aporta a la villa de Mieres con 23 años, nel añu 1963 y en 1965 faise cargu del Coro Femenino d’esta localidá, yá d’aquella una de les formaciones corales de más grande prestixu d’Asturies, con un importante númberu d’actuaciones, grabaciones y éxitos. Y en 1967, malapenes cuatro años más tarde, asume la dirección del Orfeón de Mieres, realizando con ellos una bona cantidá de xires per toa España y grabando con ellos ún de los discos clave de lamúsica coral asturiana d’aquel tiempu.

Por cuestiones llaborales, nel añu 1973 tien d’ausentase de Mieres y, a la vuelta en 1975, forma l’Ochote La Unión con voces que pertenecieran al Orfeón de Mieres y qu’él, como bon director, conocía dafecho. Con esti grupu coral graba tres discos –que van ser nel tiempu grandes éxitos de ventes- y nel añu 1980 realiza una xira per Europa actuando n’Alemaña, Suiza y Bélxica. Ye en 1986 cuando Juan Rionda Mier se fai cargu del Ochote La Unión y Baldomero Pérez, atendiendo a la pitición de la Xunta Directiva de “Mejoras del Valle” pasa a dirixir el Coru Mineru de Turón.

En 1995 vuelve formase l’Orfeón de Mieres depués d’unos años d’inactividá, y Baldomero Pérez ye llamáu a dirixilu, llabor que desempeña en xunto cola dirección del Coru Mineru, hasta l’añu 1998 nel que dexa l’Orfeón y se dedica namás a l’agrupación minera, cola que graba un CD.

El so bon saber y la so capacidá artística asítienlu nun cumal d’escepción con numberosos éxitos nel ámbitu nacional ya internacional, como fueran un segundu premiu y dos terceros nel apartáu depolifonía del prestixosu Certamen Internacional de Habaneras de Torrevieja, asina como otros dos segundos premios nes primeres ediciones del Concursu y Muestra de Folclor “Ciudá d’Uviéu”.

Per otra parte, Baldomero Pérez Méndez ye un gran espertu en canción asturiana, siendo productor musical d’una llarga serie de grabaciones y exerciendo como xuráu nos certámenes de tonada de Radiocadena Española y Radio Nacional, asina como nuna bona cantidá de concursos. Nun tenemos d’escaecer la enorme vinculación esistente dende primeros de sieglu XX ente la tonada asturiana y la música coral, yá que bien deles voces que güei siguimos considerando clásiques d’esti xéneru forxáronse nos grandes coros del tiempu, como fueran los casos de Los Cuatros Ases de la Canción Asturiana nel Orfeón Ovetense o’l de Juanín de Mieres nel Orfeón de Mieres.

Una llarga enfermedá esta última temporada mantúvolu allonxáu de la dirección del Coru Mineru Turón, manteniendo l’actividá al frente’l so discípulu Fidel González, el xoven y aventaxáu alumnu que nel so homenaxe y como pieslle de les actuaciones dirixó’l Coru dedicando toes y cada una de les pieces al so maestru, presente nel escenariu.

El conciertu entamó con seis voces del Ochote La Unión, disculpando l’ausencia de les dos que faltaben y del propiu director, por tar fuera de Mieres nestes feches. Detrás d’ellos entró al escenariu l’Orfeón de Mieres, dirixíu por Vicente José Sánchez. Pa cerrar l’actu, como comentara enantes, coles lluces apagaes y el Coru Mineru de Turón entrando nel escenariu coles llámpares mineres enceses nos sos cascos.

Al final del emotivu actu, con tol públicu puestu en pie y tres de varios minutos d’aplausos, el propiu Baldomero Pérez allegóse al centru del escenariu pa dirixir coles sos propies manes un impresionante “Asturies, patria querida” entonáu polos miembros de los tres coros, presentes nel escenariu, y el mediu millar d’asistentes.

Nuna tierra na que tamos tan avezaos a memoriales y a cabudaños, honrar en vida a la persona que representa cuarenta y cinco años de vida coral d’un conceyu, honra a un pueblu enteru.