Déxame pasar, que voi

2008 / 06 / 20 - Les Noticies

La nueva xeneración de cantadores de tonada lleva yá tantu tiempu ganando tolos concursos de canción asturiana que yá naide fala de relevu xeneracional. Los últimos resultaos del correspondiente al Teatru Campoamor son evidentes: primera, María José García; primeru, Celestino Rozada; y primera nel apartáu de renovación, Marisa Valle.

Esta nueva xeneración dexa de tar compuesta polos nomes evidentes: Anabel Santiago, Liliana Castañón, Bibiana Sánchez, María Sánchez, Sergio Agüero, Urbano Prieto... y viénen sumándose a ella nomes y más nomes. Hasta’l puntu que, nesti momentu, pue falase d’un total de venti o venticinco cantadores, menores de trenta años, que compiten alredor de los primeros puestos dientro de los concursos.

Cola distancia que te permite l’escasu tiempu trescurríu, yá se pue falar de llugares comunes de referencia d’esta nueva xeneración. Los evidentes: la importancia del CD de Mariluz Cristobal “Onde la ñublina posa”, arriendes de la collaboración con Hevia en “Busindre Reel”. Como tamién la nueva imaxen estética que surdía nel CD “Al son de la lluna” y la propuesta musical del CD “Canta a Diamantina Rodríguez”, nos dos casos d’Anabel Santiago. Pero tamién son referencia obligada’l CD “De L.laciana vengo” –pol so apueste pol clasicismu dende la estética de la modernidá-, de Rosario González, el CD “Nel café de la esquina” –pola so comercialidá midida dientro de los llímites de la canción tradicional-, de Liliana Castañón, y el CD “Adiós puebliquín de Cires” –por ser el primero home d’una xeneración definida poles voces de muyer-, de Sergio Agüero.

De tolos citaos, dientro del propiu ámbitu de la tonada, el que meyores crítiques tien recibío ye “De L.laciana vengo”. Pero, tamién, son modelu de referencia los volúmenes recopilatorios “La tonada de la mina” y “Cantares de mina”. Nesti casu, porque nellos s’axunta’l más grande númberu de xente de lo que yá s’apuntaba como nueva xeneración dela tonada.

Toles grandes voces de la tonada asturiana dedicaron dalgún momentu a cantar a la mina, a dar a conocer los sentimientos d’unos trabayadores que dende lo más fondo de la nuestra tierra tovía tuvieron fuerza pa crear una serie de cantares nos qu’espresaron la dureza del so trabayu, el dolor de la pérdida d’un compañeru, la solidaridá, les llargues lluches reivindicatives, l’amor.

La minería asturiana, pasu ente pasu, va desapareciendo delantre de los nuestros propios güeyos. Con ella podría desaparecer ún de los folclores más ricos relacionaos col trabayu: el folclor de la mina. Una manera d’espresase, un vocabulariu propiu, un modelu de relaciones, un sentimientu particular nos sos cantares.

Dende va años vien funcionando en bastantes llugares vinculaos hasta hai bien poco a la minería, o que tovía lo siguen tando, asociaciones culturales que trabayen porque nun desapareza de la nuestra memoria tolo que representó política, social y culturalmente la mina. Esiste una asociación d’escritores vinculaos a la minería y, tamién, grupos de coleccionistes mineros (que vienen a enllenar un espaciu que notres partes enllena l’alministración, pero que na nuestra tierra, frutu de la desidia que siempre se da contra tolo nuestro, tienen d’enllenar ellos demanera particular).

Asina, un grupu de cantadores tradicionales asturianos vien dende hai años recoyendo tonaes relacionaes cola mina y dándoles a conocer en grabaciones, de manera que nun se llegue a perder la memoria d’esi trabayu.

El primeru d’estos trabayos, del añu 2003, fue “La tonada de la mina”, grabación na qu’intervinieron Anabel Santiago, Liliana Castañón, Rosario González, Óscar Fernández, Urbano Prieto y Alberto Varillas, y na que quedaron grabaes verdaeres obres maestres de la tonada asturiana, como “La mina y el mar”, “Viva la xente minera”, “Que bien parez un mineru”, “La carbonera”, “Playina la de Xixón”, “Chalaneru”, “A la Pipiona”, “Déxame pasar que voi” o, l’himnu por escelencia de la minería, el “Santa Bárbara bendita”.

Un añu más tarde, nes Navidaes de 2004, salió a la cai “Cantares de mina”. Nesta grabación intervinieron Ángeles González, Bibiana Sánchez, Marisa Valle, Sergio Agüeros, Fernando Valle y Gustavo Álvarez y Francisco Barrientos, con tonaes y cantares de la categoría de “A la madre del mineru”, “Cuando la máquina va”, “Pica y postia”, “Los mineros del Fondón”, “Baxo a la mina cantando”, “Compañeros llega marzu”, “Si yo fuera picaor” o “Todos gastaben boína”.

Tamos, en xunto, falando d’un tiempu que nun va más allá de diez años. Un escasu marxe de tiempu nel que tamos asistiendo a una verdadera revolución dientro del mundu de la tonada. Esta revolución pue resumise nestos momentos nuna docena de CD’s. Cualquiera tien la posibilidá de convertise nun espertu nel tema: son mui poques voces y menos grabaciones.

Anque, si vamos poniendo la oreya nos concursos y festivales, alvertiremos a una novísima xeneración que trai d’himnu’l vieyu cantar mineru: “Déxame pasar, que voi”. Una xeneración a la que tovía-y falta bien de tiempu pa cumplir venti años. Otra xeneración a les puertes.