Una salida profesional (y 4)

2008 / 05 / 30 - Les Noticies

Por más que’l discu clave pa entender los cambios de la época seya Onde la ñublina posa de Mariluz Cristobal Caunedo, col que s’abre la nueva década y el mileniu, otra serie de grabaciones empiecen a dexar constancia de la esistencia d’una xeneración moza con ganes de comese’l mundu.

Munches de les voces nueves graben cola Fonográfica Asturiana, dalgo que tamién vienen faciendo dende pocos años atrás les voces últimes de la xeneración de la Transición. Suelen ser grabaciones cencielles, colos temes más tradicionales del repertoriu y que nun amuesen más signu de cambiu que’l d’abellugar baxo’l so rexistru les nueves voces.

Mariluz Cristobal tamién grabara en 1999 una casete cola Fonográfica Asturiana, dientro de la collección de Canción Asturiana, cásique al mesmu tiempu que ficiera Onde la ñublina posa pa Fonoastur. Nes dos grabaciones nun dexa de facese lo mesmo: cantares tradicionales interpretaos a la manera tradicional. Pero, el simple fechu d’añadir posteriormente pasaxes musicales de Xel Pereda, Ramón Prada, Arévalo, Hevia, Marcos Llope, Elías García, El Pravianu... y otros músicos, a esa serie de cantares de tola vida, cambió la perspectiva cola que se veíen a bien de les voces más moces. Hasta’l puntu de que pa munches d’eses voces esti discu en concretu fue’l que-yos abrió los güeyos al universu de posibilidaes que la tonada asturiana-yos amosaba.

L’exemplu d’Anabel Santiago tamién ye válidu nesti sentíu. Graba cola Fonográfica Asturiana na mesma llinea de lo indicao anteriormente. Y con bien poca diferencia de tiempu entra nel estudiu de grabación con una bona riestra de músicos a facer el so Son de la lluna. Con bien poco que ver col segundu trabayu de Mariluz, esti Son de la lluna ye un acercamientu al pop de la voz de tonada.

En dambos casos, cola distancia del tiempu trescurríu, alviértese nellos la importancia que nellos tuvo’l trabayu de producción. Non hasta l’estremu de llegar a dicir que se trata esclusivamente de productos –nel sentíu estrictu de “trabayos de producción”-, pero sí quedando n’evidencia la so impronta, en dambos casos mui interesante.

Anabel Santiago apuntó tres del anterior hacia un trabayu más personal, dedicándose a revisitar la obra de Diamantina Rodríguez una de les sos voces de referencia. Esta grabación, de la que ta agora a puntu de salir la so segunda edición, ye hasta’l momentu la so obra más personal y la que mayor importancia algamó dietro del ámbitu de la tonada. El resumen del trabayu ye evidente: volver la vista atrás pa saber onde mirar hacia delantre. Asina, depués de la so siguiente incursión nel pop, regresa nestos últimos tiempos al repertoriu clásicu de primeros de sieglu XX como otra manera de dar un pasu atrás cola fin de poder dar dos hacia alantre.

Na llinea de trabayos de producción tamién podría incluyise la grabación de Liliana Castañón, Nel café de la esquina, por más que nesti casu la presencia de la tonada ye muncho más evidente que la qu’apunten los dos acercamientos al pop d’Anabel Santiago. Y, a diferencia de lo qu’ocurriera col trabayu musical sobre los cantares de Mariluz Cristobal, Liliana Castañón defendió en bien de conciertos esti repertoriu delantre d’un públicu y acompañada polos músicosdel so Quartetu.

Esta diferencia del directo vuelve a ser clave a la hora de falar del enorme blincu qu’esta xeneración moza bien dando con respectu a la xeneración anterior. Ser quién a defender en directo les sos propuestes, al piano o col respaldu d’un conxuntu musical. Ser quién a llevar la voz de tonada dende’l propiu ámbitu al que pertenez hasta los campos de pop, del rock, de la canción d’autor o del mesmu folk asturianu que siempre la refugara.

Tamién, ser quién a creese profesionales y llegar a selo. Pa ello la tonada cuenta con un circuitu propiu, distribuyíu per tola xeografía asturiana. Ayenu en bona midida de les subvenciones del Principáu –por más que son capaces a nivel asociativo a negociar con él de tu a tu.

Esti circuitu permite a un bon númberu de cantadores tener una media d’una actuación a la selmana –o un mínimu de tres al mes-, lo que representa al mes un total entre 540 y 720 €, cantidaes que ronda –la primera- y supera’l salariu mínimu interprofesional.

Amás del circuitu esiste la rede de concursos a tolo llargo del añu. Quedar clasificáu en cualquiera d’ellos representa acceder a una cuantía económica mayor. En bien d’ellos tienen dotación económica los ocho, diez o doce primeros clasificaos. Notros págase a los cantadores por toles intervenciones nes fases eliminatories. Lo que lleva a que, tamién un bon númberu de cantadores, doble les cantidaes añales del circuitu, col productu acumuláu de la rede de concursos.

Añádase a ello otru tipu d’intervenciones, ayenes a circuitu y a concursos, y afayamos la respuesta al fechu positivu que representa la profesionalización pa esti xéneru. Como tamién tien d’añadise’l resultáu de la venta de CD’s (la casete acaba de desaparecer del mercáu). Ensin malapenes necesidá de publicidá, les producciones son rentables económicamente. L’últimu exemplu tenémoslu col númberu de ventes de “Aires de Peñamellera”, de La Pastorina del Cares, María Sánchez.

Claro que les cifres amuesen una mirada positiva. Pero, de cierto, ye l’únicu xéneru n’Asturies de raigañu tradicional sobre’l qu’esta mirada pue aventase. Diráseme: la gran mayoría nun algama eses cifres nin de llueñe. Lo que ye cierto, siempre, pa tou tipu de mayoríes musicales. La diferencia siempre la marca’l que seya quién a consiguilo una amplia minoría.