La SGAE nuestra de cada día
2007 / 11 / 09 - Les Noticies
Enantes de siguir lleendo l’artículu ponte a cantar “Dime xilguerín parleru”. Sé que la sabes o sea que nun te faigas el roncha. Nun tien por qué sentite naide. Con que la susurres ye asgaya.
Bueno, agora que lo pienso, meyor que nun te la sienta naide. Y cásique meyor tamién que nun digas que yo te mandé que la cantaras. La razón ye simple: va cobranos la SGAE por ello. Lo que te digo. Non que pue cobranos la SGAE por ello, sinon que va cobranos. La razón ta de la so parte: nun-y dés más vueltes a l’asuntu (que tienen abogaos y el gobiernu ta con ellos). “Dime xilguerín parleru” tien autor. ¿Qué significa tener autor? Qu’hubo un puntu que fue a les oficines de la SGAE, rellenó unes fueyes cola partitura y la lletra y dixo que yera d’él. Y asina, ensin más, el cantar tuvo autor.
Da igual que, depués, cuentes que se trata d’un cantar de tola vida, que la to güela yá te lu cantaba a la oreya pa dormite cuando yeras críu y qu’aparez en partitura en un par de cancioneros asturianos de finales del sieglu XIX. Contra la lóxica del tiempu, un puntu rexistróla va cuatro díes diciendo que yera d’él y ye dél.
Diráme dalguién: tará rexistráu l’arreglu del cantar. ¡Qué va, ho!: ta rexistráu’l propiu cantar. Si yes gaiteru -por poner otru exemplu que nun seya de cantar-, ponte a tocar “El xarreru”. Claro que lu sabes, ¿qué gaiteru nun lu sabe? Pregunta a dalgún de los cuatro gaiteros que nos queden nesta tierra que tienen más de noventa años:¿dalgún de vosotros nun sabe tocar “El xarreru”? Pues, más de lo mesmo: esi son -de tola vida, de tola vida mía, de tola vida de los gaiteros nonaxenarios y de tola vida de los padres y de los güelos d’ellos, como poco-, tien dueñu. Lo mesmo de siempre: un puntu fue va poco a les oficines de la SGAE y rexistróla como propia. Y, claro, agora ye d’él.
Diráme dalguién: tará rexistráu l’arreglu del cantar. ¡Qué va, ho!: ta rexistráu’l propiu cantar. ¿Quieslo más gordo? ¿Alcuérdeste de Lola Flores y de que cantaba aquello de “con el garrotín, con el garrotín”? ¿Y alcuérdeste que lleves de siempre sintiendo tocar esa pieza a los gaiteros de pa occidente y que te lleven diciendo de siempre tamién que ye una pieza de les de tola vida y que nun tien nada que ver col Pescaílla y cola muyer? Pues, como si nada, va poco tamién otru puntu fue a la SGAE y rexistróla como que yera d’él y a ver agora quién ye’l que diz que nun lo seya. Diráme dalguién: tará rexistráu l’arreglu del cantar. ¡Qué va, ho!”: ta rexistráu’l propiu cantar. ¿Qué ye, ho, que nun organismu de la categoría y solvencia de la SGAE nun hai naide que sepa de música? Tien de selo. Otra cosa nun s’esplica.
Toos conocemos cantares d’autor que se convirtieron rápidamente en populares y, tamién, qu’acabó dándose’l casu de que la xente, de tanto cantalos, acabó pensando que yeren tradicionales y olvidándose del so autor. Tenemos exemplos más que recientes. Ye’l casu de la habanera “La capitana”, que tien poco más de venti años y ya ye un tema tan estendíu y tan cantáu qu’hai bien de xente que cuida que se trata d’un tema popular.
Y nesti casu, tol mundu pue entender que como la ignorancia nun exime del delitu, si dalguién emplea esti cantar y lu pon como tradicional, venga la SGAE y certifique lo contrario y ponga les coses nel so sitiu.
Pero, lo grave, ye cuando a la SGAE se-y plantea que cómo ye posible qu’un puntu diga que ye d’él dalgo que ye patrimoniu musical de toos. Lo que ta ocurriendo.
Ya inda más: la SGAE recauda polos concursos de tonada. ¿Tu crees que, viendo los exemplos anteriores, hai dalguién na SGAE que sepa distinguir qué tonaes son d’autor y qué tonaes non? Y si en vez d’un concursu de tonada ye un alcuentru de gaiteros o un festival de bandes de gaites o una amuesa de pandereteres o un certamen de baille, ¿a ónde van parar les perres que se recauden y que nun tienen autor nengún?
¿Qué ye lo que nun cuadra en toa esta hestoria? Fácil: que les perres que recauda la SGAE por esti patrimoniu de toos que ye la música tradicional nun reviertan directamente nos músicos tradicionales, sinon que vayan a los bolsinos de cuatro espabilaos que, cola disculpa de que ficieron un arreglucu o de que la toquen mui bien, rexistráronla como propia.
Que les perres de la música asturiana reviertan na propia música asturiana nun ye nenguna ficción: yá lo consiguieron los catalanes. Pero, bueno, yá se sabe qu’aquello sí ye otru país y ellí si ye verdá que los que manden, manden. Y, como siempre insisto y nun me cansaré d’insistir, nin esto ye un país y nin equí manda naide.
Avisu pa espabilaos: tovía tan ensin rexistrar los siguientes temes populares: “Asturies patria querida”, “A la mar fui por naranxes”, “Fuisti al Carmín de La Pola”, “Para castañes Tremañes” y “El que nun tien puntina fízolu Dios asina”.
Avisu pa llectores: ye evidente qu’un artículu asina nun pue acabar asina, lo que quier dicir que tendré de siguir con ello otru día. Como tamién ye evidente qu’un artículu asina ta faciendo referencia a dalgo más grave y profundo que ta ocurriendo alredor de la nuestra música tradicional: razón de más pa volver sobre ello. Va continuar.