Una salida profesional (3)
2008 / 05 / 23 - Les Noticies
Nel percorríu pola profesionalización y semiprofesionalización de la canción asturiana, aporto al tiempu presente de la mano d’una xeneración nueva. Podría dicise que, más que nueva, diferente. Una xeneración que bebe directo de los clásicos y que siéntese quién a ser clásico nel so tiempu porque diose cuenta de que la manera de selo ye aprendiendo a tener una voz propia.
Los tiempos cambiaron enforma y los medios de comunicación y reproducción tan a favor d’ellos. Los medios de comunicación nel sentíu de que descubrieron que lo que más éxito tien ye lo cercano. La meyor evidencia tenémosla nel éxitu del programa de Xose Ambás na TPA. Los medios de reproducción porque la piratería acaba d’amosar el so llau positivu: en directo, nel tu a tu, ye onde se venden discos.
Esta xeneración que en nada va ser clásica tien de tar sentando les bases pa otra a la que ta allanando’l camín. Nun ocurriera lo mesmo a primeros del sieglu XX. La revolución d’ochobre del 34, el tiempu de la guerra civil y los primeros años de la postguerra marcaron un enantes y un depués. El tiempu de los clásicos morriera con ellos, por más que dalgún sobreviviera a esos años. Pero yá nada diba volver a ser lo mesmo. El tiempu clásico quedó nel imaxinariu collectivo asturiano nes voces d’El Maragatu, Quin el Pescador, Santos Bandera, La Busdonga, El Polechu de Gráu, Xuacu’l de Sama, Cuchichi, Claverol, Botón y Miranda.
Y bien pocos nomes más pudieron dir amestándose a estos diez. De la xeneración mayor qu’ellos, malapenes los d’El Gaiteru Lliberdón y María la Pita, y de los del tiempu poco más que los de Pepe’l Pantuxu de Sama, Lauro Menéndez, El Panaderu y Juanín de Mieres.
La xeneración a la que-y tocó la primer postguerra túvolo enforma difícil. Namás se radiaba a los clásicos porque fueran los que tuvieran la posibilidá de grabar. Namás se siguién teniendo a les sos voces por referencia. Hasta que llegó’l tiempu del directo. El tiempu nel que siempre xugaron con ventaxa les voces del momentu.
Asina, tres de la güelga de Los Cuatro Ases de la Canción Asturiana aparez el Cuarteto Vocal Asturiano integráu por José Morán, Morán, Godofredo Kiercheben, Godo, José Palacios, Currín, y Luis Farina. Con mayor reconocimientu esterior que n’Asturies, tenemos a Orestes Menéndez. D’una llarga tradición de cantadores, ente los que destacara’l padre, el felguerín Anibal Menéndez Corujo. Fíu d’escelentes cantadores, Fermín González y Herminia Álvarez, Modesto González, El Maízu. Ún de los cantadores con más grande númberu de toanes rexistraes en discu fue José Fernández, El Tordín de Frieres. Nuna xeneración d’homes, la voz de Marcelina Cuesta, La Nachón, fízose aína con un públicu fidel. Otra de les voces más reputaes de la cuenca del Caudal fue la de Laudelino Alonso Lorenzo, Laudelino’l de Los Pontones. Como tamién destacaron les voces de Celestino Rubiera, José Manuel González, Xilguerín, Fidel Díaz, José Suárez, El Quexanu, Gerardo Orviz, Juan Antonio Remis, El Teyeru, Marcelino Fernández Zapico, Tarín, Fernández Vallina, Fonso Campeta... ente munchos otros.
Dos xeneraciones intermedies enllenes de grandes voces aporten cantando hasta los nuestros díes. Nellos, el tiempu de la Transición marco’l del reconocimientu económicu del so trabayu. Pocos fueron los casos d’independencia económica como resultes d’esti trabayu, pero la so secha dio en siguila la xente mozo d’agora mesmo.
A finales de la década de los noventa un importante númberu de voces moces irrumpe con fuerza nel panorama de los concursos de la época. Una voz, la de Mariluz Cristobal, dientro de la canción “Busindre Ree” del CD del gaiteru José Manuel Hevia conviértese nel gran éxitu del momentu. De discu véndense dos millones d’exemplares en tol mundu. Poco depués, el CD de la propia Mariluz Cristobal, Onde la ñublina posa, acompañada por músicos provenientes del folk, fai cambiar la visión de la tonada clásica.
Una nueva xeneración apienza a combinar la tonada y los ritmos modernos: Anabel Santiago y el so “Coyí d’un artu una flor”, cola música ellectrónica; “A la mar vase los ríos”, de Liliana Castañón, a la guitarra; Rosario González y la so versión del clásicu “Al pasar por el puertu”, con acompañamientu de piano de jazz; los diferentes teclaos acolchando les voces del cuartetu integráu por Jorge Tuya, José Manuel Collado, Ismael Tomás y el Che de Cabaños... Los cambios continúen sucediéndose al cargu de voces nueves como les de Sergio Agüeros, Urbano Prieto, Bibiana Sánchez, María Sánchez, Lorena Corripio, los hermanos Valle Roso, María José García, Tamara López, Celestino Rozada, Noemí Torrado...
Los grandes concursos d’esti tiempu van marcar los sos éxitos: el Campoamor d’Uviéu, la Plaza Mayor de Xixón, el Cuenca del Caudal de Mieres, el Teatru de L’Entregu, La Nueva, Amieva... Les ventes de casetes y CD’s nos directos, l’ampliación de la dotación económica de los concursos, el pagu por cada actuación y l’axilización de los pagos al traviés d’AICA, continúen marcando’l tiempu presente.