A los Mártires de L.lena

2011 / 10 / 14 - Les Noticies

A mediaos del sieglu XIC la romería yera’l principal puntu d’alcuentru de la cultura tradicional. La canción asturiana, la música, la danza… y toa una serie d’actividaes populares dábense cita alredor de la fiesta grande del pueblu. El trabayu en campu yera duru y la cellebración del santu patrón llamaba a los vecinos a disfrutar del merecíu descansu y de les ganes de divertise. Alredor de la danza, el pueblu reafirmaba’l so carácter de comunidá. Cola música desfogaba les sos penes. Nos sos cantares falaba de la so tierra, del so trabayu, de los sos sentimientos y de les sos hestories. Cola disculpa de la so festividá xuntábense al pie de la ermita la familia, los amigos, los conocíos y tolos que veníen de fuera a disfrutar del momentu y del llugar.

El calendariu de tolos conceyos taba atacáu de pequeñes fiestes a lo llargo del añu enteru. Namás delles trespasaben les llendes de la parroquia y abarcaben tol conceyu. Y delles poques más llegaben cola so sonadía a tola comarca. Esti yera’l casu de la fiesta por escelencia del sur d’Asturies, la qu’atropaba alredor a tolos vecinos del conceyón de L.lena y conceyos vecinos: la romería de los Mártires Cosme y Damián.

Na documentación de la época la fiesta yera conocida en toa Asturies como los Märtires de L.lena. Y L.lena non solo yera’l conceyu qu’incluyía lo qu’anguaño ye’l conceyu de Mieres sinon que tamién venía ser la tierra qu’ocupaba la más grande fastera de tierra del centru sur d’Asturies. Al delláu d’otros grandes conceyos como Ayer y Quirós, que teníen igualmente les sos grandes romeríes con gran poder d’atracción, pero que tamién acababen teniendo de referencia la festividá de los Mártires como’l gran día de septiembre: la que representaba’l cierre de tol calendariu agrícola del branu y la que daba entrada a un nuevu añu de trabayu vinculáu a la tierra, la que despidía’l bon tiempu y la que llamaba a afrontar de nuevu’l llargu iviernu asturianu.

Depués, según va avanzando’l sieglu XIX, la pequeña villa de Mieres del Camín fue adquiriendo una importancia industrial enorme. El so poder económinu llevóla a independizase de L.lena y a acabar por atropar alredor una serie de parroquies que se xuntaron a esti deséu de nun pertenecer al gran conceyón. Ente eses parroquies tuvieron les de Gal.legos y Cuna, les dos nel Val.le de Cuna, onde s’alluga la ermita del San Cosme y San Damián.

Esta independencia del conceyu de Mieres nun significó un cambiu inmediatu nel poder d’atracción de la romería de los Mártires nel entornu. Pero, el pasar del tiempu fue llevando a facer desaparecer el nome de Mártires de L.lena. Nin siquiera se produxo’l cambiu a Mártires de Mieres, por más que l’ayuntamientu de siguío tuvo esta fiesta como la más significativa del conceyu. Lo que sigue ocurriendo más d’un cientu d’años más tarde: San Xuan ye esclusivamente la fiesta de los alredores de Mieres del Camín y el Cristu de la Paz la del Val.le de Turón. Los Mártires ye la única que sigue xuniendo en día festivu a tol conceyu.

Al nun tomar de manera popular el nome del conceyu y ser los Mártires de Mieres, la romería pasó col tiempu a ser conocida pol nome del valle nel que se facía: los Mártires de Cuna (y si acasu, de manera más restrictiva, pol nome de la parroquia onde tenía llugar, tamién llamada Cuna). Un procesu de reducción del so nome que lleva a que, a primeros del sieglu XXI como tamos, la romería seyayá pa bien de xente los Mártires d’Insierto, el llugar de la parroquia onde s’atopa la llomba sobre la qu’asiente la ermita.

Nun momentu como’l presente de comarcalización de la nuestra tierra nun taría de más volver a dar con aquello que culturalmente nos xunía como comarca. El sur d’Asturies, agora englobáu baxo la denominación de La Montaña Central (nome absurdu que nun significa nada nin naide reivindica y del que fueron los sos padres dalgún departamentu xeográficu de la Universidá d’Uviéu con poques coses que facer), tá necesitáu d’un calendariu festivu común qu’atrope a los vecinos de los diferentes conceyos alredor de la so cultura tradicional y que-yos devuelva’l sentimientu de pertenencia a una comunidá más grande que’l so pueblu, la so parroquia o’l so conceyu.

Esta fiesta, nel casu del sur d’Asturies, podría ser dafecho los Mártires. Quiciás regresando a los sos oríxenes, al fechu de ser los Märtires de L.lena, llevando al cabu nesti nuevu sieglu’l camín inversu al realizáu a lo llargo del sieglu XX. Una fiesta que devuelva a tolos conceyos de la llamada Montaña Central el sentimientu de pertenecer a una mesma tierra.

Un camín idénticu al que van tener de dir faciendo otres comarques d’Asturies. Por más que’l sentimientu de pertenencia a un conceyu, a una parroquia y a un pueblu seya dalgo que pareza dir incrustao nos nuestros xenes.