Una salida profesional (2)
2008 / 05 / 16 - Les Noticies
Comentaba la selmana pasada como la profesionalización y la semiprofesionalización de los cantadores de tonada de primeros de sieglu XX marcara fondamente la tonada asturiana. Un fenómenu que, de manera más atenuada, volviera a apuntar a lo llargo de la Transición y qu’agora mesmo, na xeneración más moza, tan afianzándose.
Nos años cercanos a la Transición –y nesti mesmu periodu- incorpórense a los concursos de tonada les voces d’una xeneración que ñaciera nos años de postguerra. Unos años difíciles pa la canción asturiana. La televisión marca tendencies –namás se ve un canal y, bien d’años depués, namás que dos- y nella nun hai nin un solo llugar pa la música d’esta tierra. El pop marca’l soníu de la modernidá. La radio en xeneral y les radio fórmules nun cansen de repitir una y otra vez los mesmos éxitos. Con too, ye nesti mediu, la radio, onde tovía puen alcontrase programes y momentos pa la canción asturiana.
Los movimientos culturales qu’entamaron a movese alredor de la década de los sesenta afectaron, tamién de dalguna manera, a la música asturiana y, d’una manera particular, a l’asturianada. La influencia d’una asociación como la formada polos Amigos del Bable fue mui grande yá que revitalizó’l xéneru curiando les lletres. El so principal impulsor fue Llorienzu Novo Mier, pero tamién destacó de manera importante José León Delestal. Ente les sos múltiples actividaes, los Amigos del Bable patrocinaron una serie de singles que, dientro de los cánones estrictos de la época, establecieron unes pautes de dignificación del monólogu y dela canción asturiana. Los cantadores de tonada depuraben les lletres de lessos asturianaes o incorporaben otres nueves, n’especial creaciones de los citaos Novo Mier y León Delestal. “Coyí d’un artu una flor” y “¿Ú vas tan ceo?”, son exemplos del primeru d’ellos. “Si yo fuera picador” o “La mina y el mar”, nel casu del segundu. Dende la perspectiva que da’l tiempu trescurríu, sigue sorprendiendo l’esfuerzu de l’Asociación Amigos del Bable y la so influencia marcó tol periodu posterior.
Que van meyorando los tiempos notólo xente como El Presi que remocicó nesa época de finales de los sesenta y primeros de los setenta. Les reediciones de los sos grandes éxitos convirtiéranlu otra vuelta nel gran ídolu que fuera en décades anteriores. Los 4 de Asturias y el Duo Sanjuanín vendieron más discos que naide naquel tiempu y les sos reediciones en casete llegaron hasta los nuestros díes. La Pastorina representó’l cumal cimeru d’esti momentu.
Que diben meyorando los tiempos notáronlo tamién les voces más clásiques, como les de Ataulfo Lada Camblor, Diamantina Rodríguez, Gerardo Orviz o Margarita Blanco. La so presencia volvía enllenar los escenarios. El dinero cobráu nestes actuaciones superaba con mucho’l que cobraran nel tiempu de los sos más grandes éxitos y de les sos meyores facultaes vocales.
Fue un momentu máxicu nel que compartieron escenariu xente de munches xeneraciones. Ellí taben ainda los cantadores que ñacieran ente la revolución del 34 y el final de la guerra civil: Como Armando Montes, qu’apienzó nel flamenco; Marcelino F. Meré, El Manquín de Les Arriondes, especializáu en tonada a la gaita; José Ramón Montes, Ito’l Farucu, cantador dende bien mozu; Manuel Gandoy, ún de los cantadores que meyor-y dio al punteru arriba y que tuvo la mala suerte de morrer bien mozu; Laudelino García Palicio, campeón de campeones nel concursu Rumbo a la Gloria; Margarita Blanco, voz fuerte y valiente nes sos interpretaciones; Manuel González, Manolo Ponteo, que ganó’l primer concursu con trece años; Adelina G. Baragaño, qu’entamó a cantar en concursos a los quince años; fíu de cantadores de tonada, Manuel Fernández, El Fogoneru; Aquilino Ferrera, Quilo, tamién ganador del Rumbo a la Gloria; maestros de la tonada dialogada, Diagmina Noval y Alfredo Canga; solista del prestixosu Coro Santiaguín, Aurelio G. Fueyo; Enrique García Palicio, L’Abogáu, siguidor de Juanín de Mieres; Sixto Fuentes, multipremiáu na década de los ochenta; voz de llargu recorríu, Honorina Redondo, Nori Redondo; la llanisca Socorro Noriega... Y viéronse les cares con una xeneración enforma más moza que llegó hasta los nuestros díes: Luis Estrada; Maximino Solís Lada; Francisco Escobar; Agustín Argüelles; Alejandro Fernández Corte, El Guaje; José García González, El Che de Cabaños; Horacio Huerta Jove; María Luisa Díaz Ordóñez; José Luis Fernández Álvarez, El Ruiseñor de Llangréu; Graciano Fernández Velasco, Cholín; José Antonio Brañas; Avelino Fernández Corte; Josefina Argüelles Fernández, La Calandria de Vegaotos; Arsenio Miguel Fernández; Jeremías Cuello; José Manuel Robledo, Cholo; Felipe Suárez; Mariluz Cristobal; José Manuel Collado; Rosi Fernández; Mª Rosario Álvarez; Roberto Morado; Salvador Vázquez; José María García; Rogelio Suárez; María Rosa Quero, La Pastorina; Vicente Díaz; Ismael Tomás; Mari Celi Fernández; Juan José Martínez; José Antonio González, el del Cantu la Vara; Jesús Alonso; Jorge Tuy; Aquilino Fernández, Rondera; Ángeles González; Dionisio García; José Manuel Robledo; José Luís Alonso; Rosario González...
Bien d’estos nomes siguimos sintiéndolos cásique en primera llinea. L’ameyoramientu económicu de la dotación de concursos y el pagu al traviés de l’Asociación d’Intérpretes de la Canción Asturina (AICA), va sentar les bases del estatus especial que caltienen los cantadores de tonada con respecto al restu de los músicos ya intérpretes de folclor asturianu.