Regresu al pasáu con Velasco
2011 / 09 / 02 - El Comercio
Tamos d’estrena de década. Mui a primeros de los ochenta. Acaba de crease la primer compañía discográfica, la Sociedá Fonográfica Asturiana. Malapenes tien na cai el discu de Canciones Asturianas, de la Capilla Polifónica Ciudá d’Uviéu, Vaqueiras y otras canciones asturianas, de Juan Uría Maqua, y Esparabanes, de Xulio Ramos.
El segundu discu de Jerónimo Granda arrasa, Terrentemplete morrióte un xatu, depués del descomanáu éxitu de les Coples de carnaval. Suena nes radios. Cántales la xente. Enllena un local de Xixón nel que canta bien de nueches. Cuérrese la voz ente la xente cuando lo fai nuna romería.En L’Entregu promuévese un homenaxe al cantador de tonada Arsenio Fernández, El Polenchu. Llámenlu asina n’alcordanza del Polechu de Gráu, cantador que desapereciera de la escena asturiana camín de exiliu una vez finada la guerra civil. Entama’l conciertu’l Coro San Andrés. El cantador cumple setenta años. Tovía nos va tocar disfrutar d’él y de la so maxistral manera de cantar una bona cantidá d’aós.
Otros cantadores de tonada empiecen a llamar l’atención frente a los de les xeneraciones anteriores. Jorge Tuya graba’l so primer discu. Poco enantes saliera un discu compartíu ente él y María del Rosario Álvarez. Fueran los ganadores del V Concursu de Canción Asturiana de Xixón.L’escritor Lorenzo Novo Mier ta acabante de publicar Asturianaes. Lletres nueves pa sones vieyos. Los cantadores atrévense con delles como “Coyí d’un artu una flor / y esgatuñéme les manes; / munches flores hai n’amor / pero arestes tamién hailes. / Ye que tamién les flores / tienen espines / que, endolcaes n’arume / fain ferides”. Aína incorpórenla al repetoriu bien de voces.
El grupu de rock Asturcón tamién graba un discu. Tien cierta relevancia Tiempu alantre va considerase un predecesor del rock celta. Demientres, n’Avilés, un grupu de xente vien de formar el grupu Trasgu. Tamién, tiempu alantre, va ser consideráu’l padre del nuevu folk. Nun sé si celta. Pero, cuanto menos, folk.
Nun son muches coses. Habría más, pero tampoco paga la pena citales. Pero, trenta años son muncho tiempu. Pasaron bien de coses. Y biendelles guarden relación con qu’un artesanu de gaites abrió un puestu en plenes fiestes de San Matéu. Una gaita afinada que probó un gaiteru nuevu que col tiempu diba ser conocíu como Xuacu Amieva.
El luthier llamábase Alberto Fernández Velasco. La so primera nueva gaita ficiérala a partir d’un modelu d’Arroes. Detrás vinieran los estudios de los modelos del Cogollu, de José la Piedra, del Gaiteru Margolles, de Fresnu… y tantos otros. Hasta dar con una gaita en Do temperáu. La que probó Xuacu Amieva. Delantre de la que se sorprendiera.
Depues viniera una hestoria que yá conocemos. Una xeneración entera de nuevos gaiteros. El surdimientu de les bandes de gaites. El nacimientu d’un nuevu folk. La gaita sonando al par de la Orquesta Sinfónica. Nuevos aires pal rock. Y bien d’otres apuestes. Y, en toes elles, la impronta que diba dexando’l fechu de que la gaita s’afinara. De que la gaita fuera quién a ser un instrumentu más al delláu del restu d’instrumentos.
Esta mesma mañana na qu’escribo llegónos de manera inesperada la noticia de la muerte d’Alberto Fernández Velasco. Una noticia bien triste cuando ún echa la vista atrás y alvierte tol camín recorríu nesto años. Ensin más reconocimientu que’l personal de cada ún de los que lu conocieron y almiraron el so arte.
Asina son les hestories de la nuestra tierra. Pequeñes. Pero, tamién, a la vez, impresionantemente grandes. El que tenga una gaita de Velasco sabe que tien un tesoru. El que lu conciera va poder dicir el restu de la so vida que tuvo la fortuna de conocer a una figura única de la nuestra hestoria.