Festival de Campeones de L'Entregu

2011 / 06 / 24 - Les Noticies

Dase una gran diferencia ente’l momentu de participación d’un cantador en concursu y cuando tien de facelo nuna exhibición. Más que nada cuando esta exhibición de fai por por d’obtener un bon resultáu na clasificación del concursu. Asisto esti vienres pasáu al Festival de Campeones de Samartín del Rei Aurelio. Poco que ver la tensión de la final nes voces d’Héctor Braga y de Marisa Valle Roso, qu’agora cuando vienen a facer valer el so ganáu primer premiu.

La diferencia nesti Festival de Campeones alvertímosla al sentir la voz de Sara Miranda cantando “Onde yo me pueda dir”. Nun sé la edá que pue tener. Podríen ser catorce. Los nervios correspuéndense colos de dalguién que tría un escenariu los sos primeros pasos. Con too la so interpretación gana al públicu. Nadie pide una actuación soberbia. Cenciallamente gana a toos la so mocedá y el valor d’enfrentase sola a una tonada difícil metanes d’un escenariu. La mesma Marisa Valle, diez años atrás, yera esta voz qu’agora alvertimos en Sara Miranda.

Nel ámbitu de la gaita bien dándose dende va tiempu un procesu asemeyáu. Tres de Sara Miranda intervino Enol García, acompañáu al tambor por Jaime Coto con un más que correcta versión de la Xota Les Tabiernes. Ún de los dos gaiteros oficiales del propiu concursu de L’Entregu ye’l mesmu qu’agora fai les funciones de gaiteru oficial del Festival de Campeones, Pablo Carrera. Tamién diez años atrás yera dalguién como esti bien mozu Enol García.

Enantes de los campeones del Concursu de L’Entregu intervinieron los subcampeones. De la categoría de Juan José Martínez y Lorena Corripio. Juanjo interpretó “Que vas al Cristi” y “Ai de mi que yá nun vuelvo, acompañáu a la gaita pol citáu Pablo Carerra. Una voz segura que siempre roza los primeros puestos de los festivales y que cuenta col agradu del públicu. El nivel de los aplausos señálanoslo.

Lorena Corripio tuvo, como suel facelo nestos dos últimos años, magnífica. Tien una seguridá impresionante. Interpretó “Si vas al puertu del Sueve” y “Qué bien paez un mienru”, les dos a la gaita. Con elles cerró la primera parte del Festival. Una fuerza descomanada. Una potencia de voz. Una seguridá tremenda sobre les tables. Un verdaderu luxu pal que gusta de les tonaes al altu la lleva.

Entemedies, nesa primera parte del Festival de L’Entregu, intervinieron otres voces moces, como Raúl Díaz y Thalía Pereira Noriega. El primeru con “Tengo de subir al puertu”. La segunda con “Como quieres qu’ensin sol”. El primeru lleva yá ciertu tiempu interviniendo en concursos, más que nada nos qu’esisten les modalidaes xuveniles. De la segunda sentiremos falar tiempu alantre.

La primera parte del Festival de Campeones abrióla’l Coru Samartín de Sotrondio, dirixíu por Justo Manuel González Antuña. La segunda pol Coru San Andrés de L’Entregu, dirixíu por Santi Novoa. El primeru con “Siga’l panderu tocando” y “La xana”, de Pepín de Pría. Y el segundu, como yera d’esperar, con dos pieces de Sergio Domingo, “Na montaña” y “En Cenero”.

Tres del Coru de L’Entregu intervino la participante más moza del Festival, Alkicia Villanueva. La so naturalidá sobrepón. El so derroche de sentimientu. Les sos ganes de poder con una tonada complicada que ficiera grande voces como les de Cuchichi o Diamantina Rodríguez. Interpretó “Soi asturianina”. Siguióla poco depués José Francisco Fernández. Una voz bien moza que tamién lleva tiempu riba los escenarios. Tenía ente’l públicu a la so maestra Diagmina Noval. Salió contenta de la so interpretación. Contómelo a la salida.

Los campeones tamién tuvieron el so llugar. Empezó faciéndolo Héctor Braga, con “De la Virxen del Carbayu” y “Nunca baxé pa la mina”, acompañáu nesta ocasión a la gaita. Dexando en casa la tensión que suel amosar nes fases de concursu. Tranquilu, pero reciu. Seguru. Con ganes de merecer el fuerte aplausu col que se lu despidió.

Cerró’l Festival l’actuación de la campeona, Marisa Valle Roso. Un fechu al que s’acaben avezando los espectadores, dafechamente entregaos. Interrpetó “Aquellos gües” a la gaita y despidióse cola ayerana “Del Gumial”, una tonada lo suficientemente solemne como pa, bien interrpetada, dexar un magníficu sabor de boca ente los presentes. Un vezu col que se disfruta, por más qu’ún s’acabe avezando a él.

Tamién el Concursu de L’Entregu contó con un apartáu dedicáu a les pareyes de baille. Intervinieron los subcampeones y los campeones. Aquellos con una “Muñeira” acompañada a la pandereta por Montse Trabanco. Ellos fueron Carla Blanco y Adrián Fernández Trabanco. Los campeones con un “Llixero” acompañáu por Pablo Carrera a la gaita y Moisés Camblor al tambor. Ellos fueron Estefanía Moro y Andrés Martínez. La calidá de dambos quedó manifiesta na interpretación de les dos pieces correspondientes.

Una hora y media. Esa fue la duración del Festival de Campeones de Samartín del Rei Aurelio, cellebráu nel Teatru de L’Entregu. Ficiéronse curtios los noventa minutos. Señal de que la xente disfrutó con esta amuesa de grandes y pequeñes voces y d’interesantes actuaciones que completaron les de los triunfadores.