Blo

< P'atrás  |   P'alantre >


Xeneración 21

2011 / 06 / 16 - Les Noticies

Xeneración 21

A lo llargo del añu 2001 xestóse la edición del CD La tonada de la mina. Editóse al añu siguiente. Fue una de les grandes sorpreses del momentu. Más que nada porque cambió’l conceptu de discu de tonada recopilatoriu. En cuanto a l’amuesa de los qu’interveníen nel discu y, tamién, en cuanto a la presentación. El primer tema yera toa una declaración de principios: l’asturianada de reciente composición “La mina y el mar”. La voz qu’abría la d’Anabel Santiago.

Escoyóse’l tema de les tonaes mineres. Pero, pensándolo bien, cualuquier otru tema diba poderr sirvir al mesmu propósitu. Les tonaes mineres nun conformen un xéneru. Cenciellamente falen d’un trabayu, d’una cultura entera relacionada col mundu de la mina. Una cultura na que cabe too: l’esfuerzu, les hestories d’amor, les degracies, l’amistá, el paisaxe, la muerte. O verdaderos himnos como “Viva la xente minera”, qu’interpretaba nel discu un gaiteru: Óscar Fernández.

Lo dafechamente importante de La tonada de la mina yera dar pasu a una xeneración, a un grupu de persones que llevaba tiempu cantando pero que compartía’l sentimientu y la necesidá de facer coses diferentes ensin necesidá de xar de facer lo mesmo que veníen faciendo dende tiempu les xeneraciones anteriores de cantadores. Pero, principalmente, una xeneración que demostraba asina que, coles mesmes armes que tolos sos maestros, yeren quien a abrir les puertes a un futuru enllenu de posibilidaes pal ámbitu de l’asrturianada. Liliana Castañón, la tercera voz del discu, yera’l meyor de los exemplos.

El llibretu del discu yera a la vez un álbum de fotos, un averamientu a la hestoria gráfica de la minería y un bon acompañamientu pa les hestories que relataben los cantares Hestories que, nestos mesmos años, yá falaben d’un tiempu que se nos taba escapando de les manes. Como la de “La carbonera” qu’interpretaba Urbano Prieto.

Xunto a Anabel Santiago, Óscar Fernández, Liliana Castañón y Urbano Prieto, la voz de Rosario González venía a representar a la xente de más edá pero que non por ello dexaba de corpartir los mesmos criterios qu’aquellos a los que llegaba a sacar hasta venti años de diferencia. Rosario González, como tamién Mariluz Cristobal Caunedo, veníen a exercer de madres d’estes nueves propuestes y, la so trayectoria posterior, vino a demostrar que taben perfectamente incluyíes nesta nueva xeneración.

El discu cerrábase cola intervención d’una última persona, ayena en bona midida al campu de l’asturianada propiamente dicha, pero qu’incorporaba nel discu un par de temes onligaos sí de lo que se taba falando yera de representar en xuntu al mundu de la mina. Toi refiriéndome al gaiteru Berto Varillas y a cantares como’l “Chalaneru” y, como non, como’l “Santa Bárbara bendita”.

La tonada de la mina completóse al añu siguiente col discu Cantares de mina, que completaba l’anterior cola imcoporación d’otres voces de tonada, como les de Marisa y Fernando Valle Roso, Bibiana Sánchez, Sergio Agüeros y Ángeles González, hermana de Rosario González y tamién reputada campeona del xéneru. Ella yera la qu’abría’l discu con un tema tan obligáu como “A la madre del mineru”.

Xunto a toos ellos, y cumpliendo la mesma función que Berto Varillas nel discu anterior, Cantares de mina incluyía dos temes del repertoriu xeneral mineru ayenu a la tonada, interpretaos por Francisco Barrientos y Gustavo Álvarez. Dos voces que resultaron tou un descubrientu, por más que nun volvieran grabar nada.

Esta xeneración de grandes voces que yá lo yeren en bona midida naquellos primeros años del sieglu XXI, son agora dellos de los que siguen sonando nos primeros puestos de los grandes concursos. Con una ventaxa, a esti bon númberu fue amestándose otra serie de grandes voces, como les de Celestino Rozada, María Sánchez o Lorena Corripio. Y toos ellos, en xunto, pa demostrar que l’asturianada yera un xéneru con más futuru que pasáu.

Marisa Valle Roso continua representando lo meyor d’esta xeneración en cuanto a éxitos. Y, con menos de venticinco años, sigue siendo la voz que meyor s’identifica con esti futuru esperanzador pa la tonada asturiana. Nestos momentos alcuéntrase nel estudiu de grabación terminando’l que va ser el so primer trabayu en solitario.

Estos dos trabayos, La tonada de la mina y Cantares de mina, siguen siendo imprescindibles na discoteca de tou bon amante de l’asturianada. Diez años ye tiempu asgaya pa ver el so valor. Pero, más que nada, pa ver qu’esta xente tovía tien los suficientes pocos años como pa siguir dándonos bien de sorpreses.




<< Volver al llistáu