El galardón errante 2011
2011 / 06 / 03 - Les Noticies
A la mesma hora del Barcelona-Mánchester del sábadu pasáu. Según los medios de comunicación: paralizada media España y media Inglaterra pol partíu. Son expresiones feches, pero nun tengo por qué duldar de que seya un datu ciertu. La otra media España y media Inglaterra, la que nun taba viendo’l partíu, de xuru que taben en sitios como yo: en Sariegu, nel Llagar de Trabanco, viendo el VII Encuentru Coral La Sidra y la Mar.
El llenu ye completu. Los organizadores sabiénlo. Yá me lo dixeran más d’una selmana enantes. El que quier ver el partíu ve’l partíu y el que quier ver los coros vien ver los coros. Nun hai interferencies. Si a dalguién-y presten les dos coses, escueye y quédase cola meyor. Lo guapo ye tener siempre pa escoyer.
Participaben el Coru Errante Comarca de la Sidra, organizador del eventu, l’Agrupación Coral de Porceyu, de Xixón, el Coro Pedra Blanca de Cesantes, de Pontevedra, y el Coru El León de Oro de Lluanco. El motivu, amás del propiu encuentru, la entrega del Galardón Errante 2011, nesta ocasión al citáu Coru El León de Oro.
Los motivos incorporábense nel folletu que s’entregaba a la entrada del actu: “Si cantar ye la expresión por excelencia de mostrar de forma espontánea los momentos d’allegría que la vida nos ofrez, vosotros algamastis el triple méritu de: expresalo dafecho dende la vuestra encantadora mocedá, siendo un exemplu pa toos; de compartir la vuestra felicidá con tolos que tenemos la suerte de sentivos; y de promocionar la nuestra música coral y Asturies entero ellí auquiera actuéis como acredita la bayura de premios consiguíos”.
Cerraron el turnu d’intervenciones y ficiéronlo, como avecen, de manera magnífica. El llugar yera bien especial: un llagar de sidra, enllenu toneles, enllenu xente que sabía apreciar una bona actuación coral. Abrieron con “Yera una flor”, de J. Romo, y continuaron con otra pieza del mesmu autor: “Enterradme en la arena”. Depués, una vez caliente la voz y l’ambiente, disfrutaron y ficieron disfrutar a un públicu entregáu con “A tu lado”, de J. Busto, y “Pasaxe astur”, de J. Gavito.
Acabó’l conciertu con toos ellos riba l’escenariu del Llagar Trabanco de Sariegu interpretando “Fariñona y marañuela”, d’A. Alcántara, una alcordanza de la so tierra orixinaria, Lluanco, y tamién un exerciciu de virtuosismu que fue contestáu pol públicu en pie nuna ovación de les que marquen un conciertu.
El León de Oro fundárase en Lluanco, alredor del chigre que-y da nome, en 1996 pol so actual director, Marco Antonio García de Paz y ta integráu por 39 voces mites, de xente bien mozo na so mayor parte. Nel so curtiu andar el Coru tien collechao premios nos principales certámenes corales españoles, upándose en dos ocasiones col Gran Premiu Nacional de Cantu Coral (2003 y 2006) al consiguir primeros premios nes modalidaes de polifonía y folclor.
A nivel internacional El León de Oro participó nes principales cites del Gran Prix européu, nes qu’algamó importantes reconocimientos, proclamándose finalista del Gran Premiu Européu de Cantu Coral 2009 cellebráu en Tours (Francia) representando al Certame Cittá di Arezzo (Italia) onde l’añu anterior consiguiera siete primeros premios. Agora mesmo vien de tornar del oncenu Certame Coral Internacional de Maribor (Esloveña) con un segundu premiu.
Na so faceta discográfica, El León de Oro tien publicaos dos cedés, Lux Aurumque, del añu 2004, y Paxarines, del 2008. Anguañu ta finando’l so tercer trabayu pal sellu austriacu Phylartis Viena, cola primera grabación mundial de la obra coral del compositor Ermano Wolf Ferrari.
Abriera esti VII Encuentru Coral La Sidra y la Mar l’anfitrión, el Coru Errante Comarca de la Sidra, una formación que surde nel 2003 de les manes del so director, Luis Rodríguez. Dende’l 2006 vien entregando el Galardón Errante pa premiar el llabor d’aquelles persones, grupos de trabayu, instituciones o empreses que contribuyeran col so trabayu al fomentu, difusión y promoción de la música y el cantu d’Asturies en xeneral. Hasta esti añu tiense concedío a l’Axencia Asturiana d’Emigración, nel 2006, a la Obra Social de CaxAstur, nel 2007, a la Federación Coral d’Asturies (FECORA), nel 2008, a la Televisión del Principáu d’Asturies (TPA), nel 2009, y a La Nueva España, nel 2010.
Tres de la primera actuación del Coru Errante Comarca de la Sidra vinieron les de l’Asgrupación Coral de Porceyu, de Xixón, y la Coral Pedra Blanca de Cesantes, de Pontevedra, como tamién de manera intercalada la de los cantadores de tonada Jorge Tuya y José Manuel Robledo, Lolo Cabranes, y el gaiteru Milio Martínez, toos ellos grandes representantes d’esta comarca sidrera.Un bon momentu pa disfrutar d’un gran conciertu de música coral, que tuvo de colofón amás la magnífica actuación del Coru El León de Oro. Una guapa manera de demostrar, en xunto, que no too ye fútbol –por más qu’aporfien con ello los medios de comunicación.