Una chiscadura de tomate nuna camisa blanca

2011 / 05 / 20 - Les Noticies

Cerróse, como siempre, con un actu nel Teatru Campoamor, la entrega de premios del XIX Concursu y Muestra de Folclor Ciudá d’Uviéu. Aprovechando’l decoráu de la zarzuela en cartel, La del manojo de rosas, de Pablo Sorozabal. Un marcu imponente pa la gran cita que supón alcontrar sobre’l mesmu escenariu a delles de les meyores voces de la tonada, de la gaita, del baille y de la música coral asturiana, presentaes por Esther Fonseca y Carlos Jeannot.

Cerróse, como tien de ser, con una intro musical de pieces asturianes al cargu de la Orquestina de la Escuela de Música Manolo Quirós d’Uviéu, na que podíen vese a dellos músicos bien conocíos del panorama asturiana, xunto a un grupu de bailladores y les voces d’Anabel Santiago y María Llatores. Con un programa lo bastante guapu y llamativu como pa dexar claru’l nivel de lo que diba venir darréu.

Cerróse, como ye d’avezu, cola presencia de tolos ganadores en toles modalidaes. Empezando polos intérpretes de la modalidá de Canción Asturiana Masculina que subieron na primera parte al escenariu del puestu décimo segundu al segundu pa que, como nel restu de les modalidaes, el primeru de cada categoría compartiera espaciu y foto oficial. N’orden inversu, del puestu doce al segundu, estos fueron los galardonaos: José García, Francisco José López, Fernando Valle Roso, Aquilino Fernández, Héctor Braga, Salvador Vázquez, José Antonio González, José Manuel Robledo, Andrés Cueli, Juan Robledo y Jorge Tuya.

Cerróse, igualmente, cola presencia de les intérpretes de la modalidá de Canción Asturiana Femenina. Nesta ocasión accediendo, tamién n’orden inversu, dende la sesta a la segunda. Elles fueron: Silvia Suárez, Águeda Riera, María Sánchez Blanco, Laudelina Hortal y Lorena Corripio.

Cerróse, detrás d’ellos, cola presencia de los ganadores de los premios al meyor Gaiteru Solista. Tamién nesta ocasión, en primer llugar, accediendo al escenariu del sestu al segundu clasificáu, que fueron: Hugo Noval, Daniel González, José L. Fernández, Álvaro Álvarez y Javier Menéndez.

Cerróse, nesti casu cola presencia de los directores de les diferentes formaciones, colos galardonaos nel apartáu de Coros de Voces Mistes. Que, tamién del sestu al segundu, fueron: el Coro Padre Coll de La Felguera, la Coral Polifónica de Llanera, la Coral Dafne d’Uviéu, l’Orfeón de Castrillón y l’Agrupación Coral Avilesina.

Cerróse, nesta ocasión de dos en dos, colos premiaos na modalidá de Pareyes de Baille, esta vez non vistíos col paxellu tradicional sinon col traxe de fiesta propiu d’una gala d’estes característiques. Tamién de la sesta a la segunda, ellos fueron: Laura Prado y Diego García, María Menéndez y Jairo López, Estefanía Moro y Andrés Martínez, Carolina Suárez y Luis Fernández, y Estela García y Arsenio Ruíz.

Cerróse, como piesllu nesta primera parte de lo que diben ser les entregues de premios de tolos finalistes, colos propios de la modalidá de Tonada Xuvenil. Tamién del sestu al segundu, ellos fueron: Lucio José González Mier, Tamara López, Esteban Verdeja, María Llatores y Manuel J. Gómez.

Cerróse, depués de tanta entrega de premios, pa dar piesllu a la primera parte, cola actuación d’Héctor Braga y d’Anabel Santiago, acompañaos tamién d’un bon grupu de músicos. Les voces de los dos percorrieron seis temes tradicionales, bien propios pal marcu nel que se presentaben y atendiendo dafechamente al públicu al que diben dirixíos, que disfrutó con ellos.

Cerróse con una segunda parte que s’abrió directamente cola entrega de premios a los campeones de toles modalidaes y cola presencia, pa facer entrega d’una reproducción del Picu Urriellu y un diploma acreditativu, de l’Alcalde d’Uviéu, Gabino de Lorenzo, y de la directora del diariu La Nueva España, Ángeles Rivero. Pol orden siguiente, fueron accediendo al escenariu: Celestino Rozada, Premiu Manolo Delgado a la Canción Asturiana Masculina; Marisa Valle Roso, Premiu La Busdonga a la Canción Asturiana Femenina; Jesús Fernández, Premiu Remis Ovalle al Gaiteru Solista; el Coro Bloque al Cantu del Colexu d’Apareyadores y Arquitectos Técnicos d’Asturies, Premiu José María Marcilla a los Coros de Voces Mistes, que recoyeron el so director, Óscar Allen, y el so presidente, Carlos Franganillo; María Vázquez y Paulino García, Premiu Antón Sastre Bilbao a les Pareyes de Baille; y Alberto Fernández Conde, Premiu Carlos Menéndez Jeannot a la Tonada Xuvenil.

Cerróse, como yera mester depués de tantu premiu, cola actuación de tolos primeros galardonaos tres del discursu –esti añu bastante comidíu pa lo que tien d’avezu-. Álvaro Fernández Conde interpretó magnificamente “Soi natural de Carreñu”, coles ganes de siempre de comese’l mundu y arrancando dellos de los más grandes aplausos de la mañana. Siguióla Marisa Valle Roso que, acompañada a la guitarra por Rodrigo Sturm, interpretó “La colombiana” que dexara grabada Orestes Menéndez a mediaos del sieglu XX y punxo al públicu en pie. Detrás baillaron la “Xota’l Centru” María Vázquez y Paulino García y dexaron constancia del so bon facer. Al que siguieron les notes del gaiteru que los acompañó nel baille, Jesús Fernández, que fizo les delicies del públicu con un “Floréu de Remis” impagable. Celestino Rozada, con “Adiós al valle de Viangu”, que volvió a poner al patiu de butaques de pie. Y cerróse’l capítulu d’actuaciones premiaes col Coro Bloque al Cantu con “Las cuatro palomas”, dirixíos por Óscar Allen y despidíos con una bona ración d’aplausos.

Cerróse, enfin, con un par de pieces de la zarzuela La del manojo de rosas, interpretaes pola Orquesta Uviéu Filarmonía y cantaes polos solistes Maite Alberola y David Menéndez.

Cerróse, en xunto, con un éxitu impresionante namás emporcáu poles voces de la cantadora Josefina Argüelles, la Calandria de Vegaotos, miembru del Xuráu, durante l’actuación de Marisa Valle Roso, glayando como una posesa dende’l patiu de butaques: “¡Una asturiana! ¡una asturiana!” Desconociendo que la pieza que taba interpretando yera un homenaxe a una de les voces más grandes y más desconocíes de la canción asturiana, Orestes Menéndez. Y, más que nada, desconociendo les más elementales normes de la educación. La xente alredor d’ella abucheóla y mandóla callar, y el públicu en xeneral cerró l’actuación cola ovación más cerrada del día. De toles formes, non contenta cola so gala de mala educación, tovía nel patiu del teatru, a la hora de la salida, tuvo unes males palabres pa con ella.

Con too, una bona mañana de música asturiana, a pesar de la chiscadura de tomate na camisa blanca que significó la salida de pata bancu de Josefina Argüelles, la Calandria de Vegaotos, una vieya gloria que se quedó namás en vieya cuando perdió la gloria. Y nun sabe, siquiera, llevar con dignidá esa vieyera.