Elecciones al altu la lleva
2011 / 05 / 13 - Les Noticies
Poco tien que ver esti artículu col volume de la megafonía de los coches de campaña de les elecciones autonómiques y municipales. Por más que, namás en dalgún contáu, siento pelos altavoces música asturiana. La gran olvidada polos grandes partíos. Arrequexada na de pequeñes formaciones con poques –mui poques- posibilidaes. Y, d’ente eses poques, cásique siempre gaita tipu discu d’Hevia o cantarada hestórica modelu Nuberu. Enxamás nada de tonada. Pa otra vez sedrá.
Les elecciones a les que faigo referencia tuvieron llugar dientro d’AICA (Asociación d’Intérpretes de Canción Asturiana). Con campaña electoral previa. Dos candidatures. Nomes conocíos. Poco programa, pero munches voces. En dellos candidatos más que n’otros. Pero munches munches voces. Dalgo qu’entona y cuadra mal cola tonada.
Los que más voces daben yeren, como yera mester, los de la oposición. Una candidatura presidida por José Antonio González Fernández “Cantu la Vara”, al que siguíen José Manuel García, Mariceli Fernández, José Manuel Collado, José García, Manuel García, Carmen Camporro y Francisco Queipo. Teníen muncho de lo que protestar. Según ellos. Dieron cuenta d’ello nun aconceyamientu previu y, el mesmu día del aconceyamientu xeneral, subieron el tonu de la so reivindicación. Llegando al puntu d’impugnar l’acta del aconceyamientu anterior y, dau’l casu, d’impugnar la votación que diba cellebrase.
La otra candidatura yera la de la xente que venía exerciendo estos últimos años. Presídela, como hasta agora, Julio César Baragaño, y acompáñenlu José Manuel Robledo “Lolo de Cabranes”, Narciso Fernández, Lorena Corripio, Blanca Carballo, Francisco Gómez, José Manuel Reguero ya Ismael Tomás. Xente bien conocío y que, polo tanto, nun necesitaben llevantar tanto la voz. Por más qu’acabaron faciéndolo pa demostra-yos a los otros que tamién sabíen facelo al altu la lleva y que, a la llarga, diben tener más xente pa grita-yos el ¡guo!
L’aconceyamientu xeneral, el pasáu cinco de mayu nel Centru Social de Cualloto a partir de les siete de la tarde, sabíase que diba ser tensu. Esta tensión venía d’atrás. Había, lo que se diz, mal ambiente. Compañeros de tola vida enfrentaos. Na mayor parte de los casos, por enfrentamientos que veníen de mui atrás.
Al poco de tomar la palabra, la candidatura opositora pretendió una serie d’impuganciones previes. La primera de les votaciones yá se vio que la perdíen tan mayoriatriamente que’l resultáu final de les votaciones nun diba dir mui allá. Hubo hasta un proyectu d’impugnación del procesu electoral y de la propia votación del día. El tonu de voz subió. Pero’l sangre nun llegó al ríu.
Hubo xente nesti aconceyamientu xeneral. Veíase a la xente con ganes de votar. Non d’aguantar tantos rollos. Pero’l rollu diba pa llargu. Había xente con ganes d’allargar el conceyu. Y nun lo consiguió porque la xente tampoco tá a aquelles altures de les elecciones xenerales como pa munchos rollos. Pa colmo, ún de los que más falaba yera un conocíu pola so capacidá pa falar muncho y nun dicir nada, y la xente cansó.
Al final los resultaos de la votación fueron claros. Cerca d’un cientu de votos pa la candidatura de Julio César Baragaño y poco más d’una decena pa la de José Antonio González “Cantu la Vara”. Poco enantes d’empezar les votaciones estos últimos pidieron a los d’ellos que nun votaran. Pero tampoco-yos debieron de facer munchu casu. Los docena que se quedó ensin votar tampoco contaba como pa dar un vuelcu al resultáu.
En fin que, como comentaba una conocida cantadora moza, de xuru ye preciso cambiar bastantes coses na xestión d’AICA, pero la xente que pretendía esti cambiu tenía mui poca solvencia –según se vio nel resultáu- como pa llevala a cabu. Asina les coses, Julio César Baragaño va siguir de presidente una temporada más.
Recomendaciones xenerales pa un próximu aconceyamientu: encargar la moderación del conceyu a un moderador profesional. Tien d’haber siempre un turnu de palabres. Nun pue falar cada quién cuando más-y pete. Nun se-y pue dar siempre la palabra al que más voces dé. Porque, al final, la xente cansa. Y l’espectáculu del otru día nun ye como pa repitilu.