Una salida profesional
2008 / 05 / 09 - Les Noticies
El considerable aumentu de la población de les cuenques del Caudal y del Nalón por mor de la industrialización permite que s’lcuentren y compartan el mesmu espaciu de fuelga y de trabayu un gran númberu d’inmigrantes del occidente y oriente d’Asturies, del norte de Llión y de los conceyos vecinos. Ideénticu fenómenu al que va ocurrir darréu cola industrialización de la faza costera: Xixón y Avilés.
La bayura de la tonada de la tierra algama protagonismu nos chigres y nes espiches del tiempu de la mano de los meyores cantadores veníos como trayadores de los conceyos cercanos. L’aumentu de la riqueza fizo posible que, por competencia ente chigres, espiches y romeríes, apienzara a pagase a les voces de mayor sonadía. Emprimen los primeros casos de profesionalización y semiprofesionalización de los cantadores de tonada.
Amás de los círculos nos que diba desendolcándose la música culta, la tonada asturiana siguía pelos sos llugares davezu: la romería y el chigre. Dientro de la romería dábase’l doble ámbitu de la música cantada dientro de la ilesia, con acompañamientu de gaita y tambor, y de la tonada interpretada en solo o a la gaita dientro del marcu festivu.
En chigre interpretábase la tonada sola y dientro de les espiches, onde se solía contar con presupuestu más grande, con avcompañamientu de gaita. El chigre avezaba a tar vedáu a les muyeres. A excepción de casos como’l d’Obdulia Álvarez, La Busdonga, que rexentaben los padres ún na plaza de Requexu de Mieres. Otru marcu de desenvolvimientu de la tonada fueran los aconceyamientos de filandón y de trabayos comunales.
D’ehí qu’a lo llargo del sieglu XX se repitiera tantes vueltes la frase del maxisteriu del chigre y el práu pa falar del sistema tradicional de difusión y aprendizaxe de la tonada popular.
Cuando dientro d’un cientu d’años dalguién repase los patrones actuales polos que se rixe l’asturianada tendrá d’alvertir –si’l fenómenu sigue n’espansión- l’aumentu de los casos de profesionalización y semiprofesionalización y la completa desaparición del maxisteriu del práu y del chigre.
Esto último yá se venía faciendo evidente va años. La mayor parte de la nueva xeneración recibió clases personales de daguna de les voces importantes de finales del sieglu XX que se dedicaron a ello. Ye’l casu de Diagmina Noval, Josefina Argüelles o Diamantina Rodríguez, pa les muyeres, o de Alfredo Canga o Luis Estrada, pa los homes.Anue, en bien de casos, dase’l fenómenu d’un cantador que pupila a una de les voces moces col so maxisteriu. Una forma de facelo ye “cantando por” él. O lo que ye lo mesmo, aprendiendo’l so repertoriu y la so manera de cantar.
El blincu a la profesionalización de la nueva xeneración ye palpable. Non solo pol fechu de que bien d’ellos se dediquen profesionalmente a ello, sinon porque dase una toma de conciencia de que’l cantar pue ser una salida profesional nesti momentu.
El fenómenu de la profesionalización de los cantadores de tonada nun ye frecuente. Amás de nes cultures del oriente próximu, nes que se valora especialmente nos cantantes les sos cualidaes vocales, namás se da na peníncula ibérica nos ámbitos del flamencu y del fadu.
La profesionalización representa’l más grande gráu de valoración d’una espresión folclórica y los cantadores qu’acceden a ella adquieren un estatus especial dientro del so ámbitu.
La semiprofesionalización significó pa bien de los cantadores del últimu cuartu de sieglu XX un sobresueldu importante qu’añadir al del so propiu trabayu. Nesti sentíu, l’Asociación d’Intérpretes de la Canción Asturiana (AICA) –la so asociación profesional que funciona como asociación cultural-, trabayó pola dignificación de la profesión estipulando un mínimu por intervención de cada cantador. Asina mesmo, el fechu de ser una asociacón cultural exenta d’IVA, axilizó’l problema burocráticu que significaba pa dellos cantadores la imposibilidá de facturación.
Nel momentu presente ya non solo se ta dando la facturación al travies d’AICA sinon que surden los primeros casos de cantadores con llicencia fiscal propia o’l d’aquellos que factures per medies d’una sociedá llimitada (empresa de contratación o de reperesentación).
Namás se vien dando un fenómenu asemeyáu ente dellos gaiteros, a los que podríamos llamar profesionales de la gaita. Nel restu de los ámbitos de la música folk y de les manifestaciones folclóriques asturianes l’amatuerismu sigue siendo la tónica xeneral.