Madre Asturias pa piano y pa orquesta

2008 / 05 / 02 - Les Noticies

Cada par d’años –y van bien d’ellos- ye raro que’l tenor Joaquín Pixán nun nos avere un nuevu productu musical. Y nesta ocasión la novedá preséntase como reedición, venti años depués, de “Madre Asturias: Colección de Canciones Asturianas”, d’Antón García Abril, y la so versión correspondiente de les composiciones pa piano, nesti casu interpretaes por Rosa Torres-Pardo.

Asina, lo que fuera nel so momentu una apuesta importante dientro del panorama de la renovación de los lieder asturianos va venti años, conviértese agora nun regresu a la esencia d’aquel piñu de cantares, bien d’ellos costruyíos sobre una estructura y melodía tradicional y bien d’otros sobre poemes orixinales de José León Delestal y composiciones del propiu García Abril. Nel casu de les lletres tradicionales, tamién cuenten con una adaptación correspondiente del citáu León Delestal.

Estes Canciones Asturianes diéranse a conocer en Madrid el 12 d’abril de 1984 nel Teatru Real –d’aquella sala de conciertos-, cola Sinfónica de Madrid dirixida por Jorge Rubio, como nos lo recuerda José Luis Pérez de Arteaga nes notes introductories del CD. Unes notes que s’agradecen nos sos comentarios cantar a cantar, técnicos y precisos.

Por más que nel so momentu fuera impresionante la versión orquestal d’estos cantares –grabada pola London Philharmonic Orchestra dirixida por Jesús López Cobos-, nesta ocasión quiero llamar l’atención sobre’l primeru de los CD’s del pack qu’integra esta edición y nel qu’aparez l’actual versión pisnística. Con too, ye igualmente recomendable la versión orquestal planteada nesta grabación –y qu’aparez nel DVD-, cola Orquesta Sinfónica del Principáu d’Asturies dirixida por Maximiano Valdés (nuna grabación que se ficiera’l 30 de xineru de 2005 nel Auditoriu Prícnipe Felipe d’Uviéu).

El piano de Rosa Torres-Pardo, atacáu nos momentos grandes y dafecho midíu hasta la tenrura nos momentos calmos, amuesa los meyor d’esta serie de Cantares. Recuerda la más sentida de les nuestres tradiciones llíriques, la del piano de Baldomero Fernández nos acompañamientos magníficos que dexara grabaos a primeros de sieglu a les grandes voces clásiques de la tonada de la época.

La pianista da nome a los “Encuentros con Rosa-Pardo” que dende l’añu 1998 vienen cellebrándose nel llugar de Robles de L.laciana y que nestes diez ediciones que lleva, baxo la organización del pintor Eduardo Arroyo, tiense convertío nuna de les principales cites interdisciplinares artístiques del territoriu español. Destaquen na so producción les interpretaciones de les “Goyescas” de Granados y la “Rapsodia” d’Albeniz con Víctor Pable Pérez y la Orquesta Sinfónica de Tenerife.

Joaquín Pixán siempre-y tuviera un especial apreciu a esta serie de cantares, pol trabayu en xunto ente dos personalidaes pa él mui queríes y respetaes, el compositor García Abril y el poeta León Delestal. Al ser cásique un trabayu d’encargu nel que’l propiu tenor tuvo muncho que ver y más que decidir, “Madre Asturias” convirtióse na so obra más emblemática –anque quiciás non la más reconocida pol públicu asturianu-.

La edición actual ye magnífica, sobre un diseñu mui comidíu d’Astur Paredes, nel que s’inclúin dos CD, el correspondiente a la versión al piano y el de la versión orquestal- y un DVD con cuatro cortes bien diferenciaos: unesimáxenes d’Asturies sobre un textu de Javier Almuzara, el conciertu citáu de la Orquesta Sinfónica del Principáu d’Asturies, la grabación del cantar “Adiós Xana” y el Making Off de tol proyectu.

La voz de Joaquín Pixán alviértese nún de los sos meyores momentos, amosando tola bayura de matices que da enfrentase a un proyectu estimáu d’una manera especial. Na versión pianística l’orden ye’l propiu de les composiciones –que se trestocara na versión orquestal-.

Esta estimación especial alviértese dende’l primer lied, les “Vaqueiras” que se convierten nuna de les sos pieces más queríes pola vinuclación a la so propia tierra. El piano ye nelles el instrumentu de percusión más impresionante posible.

Ente les catorce compisicones hai pa tolos gustos, abarcando una amplia paleta de rexistros espresivos: la señaldá en “Nun te pares a mio puerta”, la tristura de “Ella lloraba por mi”, l’allegría de “Una estrella se perdió”... Como tamién pa qu’apareza dalguna que me resulta dafecho menor dientro del conxuntu, como “El Naranjo de Bulnes” o “El canto del urogallo”.

Detrás del proyectu aparecen los nomes d’una llarga serie de personalidaes y empresarios asturianos y españoles, asina como’l patrociniu d’un conxuntu d’empreses que ficieron posible esti caru productu final. Como ún de los promotores ye’l propiu Gobiernu del Principáu d’Asturies, a mi llegóme’l pack como regalu de protocolu. Espero de toes formes que, por más qu’estos regalos seyan parte d’un protocolu y d’una bolsa de publiciaes varies, llegue a xente qu’aprecie un trabayu fechu con cariñu.