Del Romanticismu a nosotros
2008 / 04 / 25 - Les Noticies
Cuando dientro de doscientos o trescientos años s’estudie’l nuestru tiempu taremos incluyíos na etapa última del romanticismu. Tanto si falamos dende’l puntu de vista artísticu, políticu, social o ideolóxicu. Ún de los casos más evidentes va ser el musical. Y, too ello, porque siguen resistiendo y desenrrollándose nel nuestru tiempu munchos de los sos principios de llibertá, individualismu, democracia, nacionalismu...
Veníase d’un tiempu nel que la belleza dependía, de manera subxetiva, de los obxetos más que de la sensación qu’estos xeneran nos que los contemplen. Dexamos de falar d’orden, d’unidá, de proporción... pa pasar a facelo de senimientos.
La revolución que plantea’l romanticismu ye impresionante. El sentimientu mesmu de ser asturianu ñaz d’esa revolución. Enantes d’ella, ser asturianu yera como ser un horru: un obxetu más del paisaxe. La revindicación del espíritu nacional (“Volkgeist”) asumímosla de manera enforma diferente a otros llugares, pero sigue conteniendo un posu de romanticismu impresionante.
La llibertá que ta tolos terrenos vindica’l movimientu románticu vívese nel arte d’una manera especial. L’artista entiende esta llibertá como la necesidá d’esplorase y d’esplorar el mundu, d’amosalo como parte del so sentimientu personal.
Los grandes músicos europeos del sieglu XIX nun provienen, como hasta entós sucediera, de grandes families de músicos. Agora’l paradigma de músicu yera Beethoven, una figura atormentada d’infancia desgraciada qu’alcontraba na música un mediu de lliberación de la so alma.
El músicu románticu ta arguyosu de sentise aislláu, de ser un xeniu incomprendíu. Los artistes componen obres que naide encarga, destinaes a un públicu imaxinariu, quiciás el públicu del futuru. Esti movimientu románticu xeneral –y el concretu rellacionáu col ámbitu musical-, tardó bien d’años n’averase a la música de los propios pueblos. Y, nos sitios nos que fue entamando, fízolo a la manera romántica: la música del pueblu venía a representar l’alma del pueblu (“the soul of the nation”).
Pero esto nun aportaba malapenes más qu’a los salones busgueses y a los teatros de la capital. El músicu de siempre continuaba siendo un meru intérprete y tresmisor d’una cultura musical que-y venía dada y sobre la que nun se sentía quién a exercer nenguna variación.
La gran esplosión de los medios de comunicación vieno a trestocar tou esi orden. De mano, la mayor difusión de los medios escritos: los intérpetes empezaben a tener nome y esi nome pasaba a ser conocíu más allá del so entornu familiar y vecinal. Depués, l’aniciu de la reproducción sonora col cilindru d’Edison y el gramófonu. Pal final, unos años más tarde, la radio -y la so capacidá p’aportar a los requexos más apartaos del mundu-, acabar llevando’l conceptu de difusión al so estremu.
Ramón García Tuero tenía venticinco años cuando apareció pol escaparate del mundu que yera’l París de la Esposición Universal de 1889. Yera bien conocíu na parroquia d’Arroes como gaiteru. La prensa asturiana del tiempu falara d’él con motivu de la so elección pa representar a la Sidra El Gaitero, colo que’l so nome empezaba a ser conocíu (anque nun se lu sintiera tocar siquiera).
Nel París de les lluces -como recuerda Pieter Minden nel so trabayu sobre “La Tonada Asturina”-, debió sentise un mensaxeru d’un mundu desconocíu. Representaba l’ideal románticu a los güeyos de los que lu sentíen tocar aquel estrañu instrumentu, parte del raigañu d’un pueblu. Acabó siendo la mayor atracción del Pabellón Español. Hasta l’estremu d’acabar creyéndose él mesmu aquello que representaba a los güeyos de los demás.
Ramón García quixo siguir llamándose “El Gaiteru Llibardón” pa nun perder esi sueñu románticu del ser de pueblu. Pero supo como naide, dende’l primer momentu, apovechar tolos recursos que la técnica moderna-y ufiertaba p’acabar convirtiéndose nel músicu más famosu del tiempu.
Dende al menos 1808 venía cantándose “La panadera” n’alcordanza de Xuaca Bovela y Marica Andallón, heroínes romántiques del llevantamientu d’Uviéu. Pero, cuando la graba El Gaiteru Llibardón en 1909, dexa de ser el cantar tradicional que dellos conocíen pa convertise nún de los cantares asturianos por escelencia. Pasaba de ser parte d’un grupu reducíu de persones d’un llugar mui determináu a ser patrimoniu de tou un pueblu.
El romanticismu cambió la nuestra idea del mundu. L’individualismu convertíase nel motor de la sociedá. Hasta que los medios de comunicación acabaron por subvertir aquel ideal románticu no que güei conocemos como la fama o celebridá.
El nuestru primer célebre o famosu nesi sentíu, Ramón García Tuero, regresó a Asturies convertíu nun nuevu dios. Enxamás hasta entós el nome d’un gaiteru trespasara les nuestres fronteres naturales. Enxamás hasta entós un músicu –una profesión menor onde les hubiera- s’asociaba al alma de tou un pueblu.